އެމްޑީޕީން ޒުވާނުންގެ މުޒާހަރާގައި ބައިވެރިވާނަން: އެމްޑީޕީގެ ރައީސް

އެމްޑީޕީން ޒުވާނުންގެ މުޒާހަރާގައި ބައިވެރިވާނެ ކަމަށާ މުޒާހަރާ ކުރާ ޒުވާނުންނާއި އެމްޑީޕީން ވެސް ދައްކަނީ އެއް ވާހަކައެއް ކަމަސް އެ ޕާޓީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

ޝާހިދު މިހެން ވިދާޅުވީ އެމްޑީޕީގެ ގައުމީ މަޖިލީޙުގެ މިރޭގެ ބައްދަލްވުމުގައި ވާހަކަ ދައްކަވަމުންނެވެ. ކުރީގެ ފޮރިން މިނިސްޓަރު އަދި ސިޔާސީ މައިދާނުގައި މިވަގުތު ހުންނެވި އެންމެ ފާހަގަކޮށްލެވޭ ލީޑަރުންގެ ތެރޭގައި ވެސް ހިމެނިވަޑައިގަންނަވާ ޝާހިދު ވިދާޅުވި ގޮތުގައި ހައްގުތައް ކަށަވަރު ކޮށްދީފައިވާ ގާނޫނު އަސާސީ ވުޖޫދަށް ގެނައުމުގައި އެމްޑީޕީން ވަނީ ބޮޑު ގުރުބާނީއެއް ވެފަ އެވެ.

އަދި އެމްޑީޕީ އަކީ އަބަދުވެސް އެ ހައްގުތައް ދިފާއު ކުރުމަށް މަސައްކަތް ކުރާނެ ޕާޓީއެއް ކަމަށް ވިދާޅުވި އެވެ. އަސާސީ ހައްގުތައް ހިފަހައްޓާ ފޭރިގަތުމަށް އަދި ހުދުމުހުތާރު ވެރިކަމެއް ހިންގުމަށް ފުރުސަތު ދީގެން އެމްޑީޕީ ނޯންނާނެ ކަމަށް ޝާހިދު ވިދާޅުވި އެވެ.

މިނިވަންކަމާއި އިންސާފުވެރިކަމާއި ހަމަހަމަކަން ގާއިމު ކުރުމަށް ގޮވާލާ ޒުވާނުން މިހާރު ކުރަމުންދާ މުޒާހަރާއަށް ތާއީދު ކުރައްވާކަން ހާމަކުރައްވާ ޝާހިދު ވިދާޅުވީ އެމްޑީޕީން އެ ޒުވާނުންނާއި ބައިވެރިވާނެ ކަމަށެވެ.

"އަޅުގަނޑުމެންގެ ތެެރެއިން ޒުވާނުން ނިކުންނާނެ. ރައްޔިތުންގެ ތެރެއިން ނިކުންނަ ޒުވާނުންނާ އަޅުގަނޑުމެން ބައިވެރިވާނަން. އަޅުގަނޑުމެން މި ދައްކަނީ އެއް ވާހަކަ އެއް,"

ޝާހިދު ވިދާޅުވި ގޮތުގައި ގާނޫނު އަސާސީގެ ހިތަކީ އަސާސީ ހައްގުތަކާ ބެހޭ ޗެޕްޓަރެވެ. އެ ޗެޕްޓަރުގައި ހިމެނޭ އެއްވެސް މާއްދާއަކަށް ބަދަލު ގެނެވޭނީ ރައްޔިތުންގެ ވޯޓަކުން ކަމަށް ބަޔާން ކޮށްފައި ވަނީ އެ ހައްގުތަކާ ހިތުހުރި ގޮތަކަށް ކުޅުމުގެ ފުުރުސަތު ނުދިނުމަށް ވިދާޅުވި އެވެ.

ދިވެހި ޒުވާނުން މިއަދު އެ ޗެޕްޓަރުގެ ދިފާއުގައި ނިކުތުމުން އާދަޔާހިލާފު އުފަލަކާއި ހިތްހަމަޖެހުމެއް ލިބިފައިވާ ކަމަށާ އެ ޗެޕްޓަރު ޤާނޫނު އަސާސީގައި ލިޔުނު ދުވަސްވަރު އުފަންވެސް ނުވާ ކުދީންނާއި އޭރު ކުޑަކުދީން ގޮތުގައި ތިބި މީހުން މިއަދު އެ ހައްގުތައް ކަށަވަރު ކުރުމަށް ނިކުތުމަކީ އެ މަސައްކަތުގައި އުޅުނު މީހެއްގެ ހައިސިއްޔަތުން ލިބޭ ހިތްވަރެއް ކަމަށް ވެސް ޝާހިދު ވިދާޅުވި އެވެ.

ޝާހިދު ވިދާޅުވީ އެމްޑީޕީގެ ވެރިކަމުގައި މިހާރުގެ ވެރީންނާއި މި ސަރުކާރު ނިސްބަތްވާ ޕާޓީތަކުން މުޒާހަރާ ކޮށްފައިވާ ކަމަށެވެ. އޭރު ކޮންމެ ރެއަކުހެން އެމަނިކުފާނު ދިރިއުޅުއްވޭ ގެކޮޅު ކައިރީގައި މުޒާހަރާ ކުރާ ކަމަށާ އެއީ އެކި އުމުރުގެ މީހުން ދިިރިއުޅެމުން ދިޔަ ގެއެއް ކަން ޝާހިދު ފާހަގަ ކުރެއްވި އެވެ. އަދި ކުރިމަތީ މިސްކިތެއް ހުންނައިރު ކައިރީގައި ހޮސްޕިޓަލެއް ހުރިކަން ވެސް ފާހަގަ ކުރެއްވި އެވެ.

އޭރު ކިތަންމެ ދަތިވީނަމަވެސް މުޒާހަރާ ކުރުމުގެ ހައްގު ދިން ކަމަށް ވިދާޅުވި އެވެ.

"ވެރިކަން ލިބިވަޑައިގަތީމާ ހަނދާން ނެތޭލެއް މާ އަވަހީ. ގަބޫލުފުޅުކުރައްވަން ޖެހޭނެ ރައީސް މުއިއްޒު ވެސް އަބަދަކު ވެރިކަމުގައި ބަގުނޑި ބައްދައިގެނެއް ބިރުދައްކައިގެނެއް ނުހުންނެވޭނެ, ނޯންނެވޭނެ. ރާއްޖޭގައި މާ ސާފުކޮށް ފެނިފައި އޮތް ކަމެއް މިއީ," ޝާހިދު ވިދާޅުވި އެވެ.