ޤަވާއިދާ ހިލާފަށް އުޅޭ ހުރިހާ ބިދޭސީން އެއް އަހަރު ތެރޭ ހޯދާނަން: އިހުސާން
ޤަވާއިދާ ހިލާފަށް އުޅޭ ހުރިހާ ބިދޭސީން އެއް އަހަރު ތެރޭ ހޯދާނެކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ މިނިސްޓަރު އަލީ އިހުސާން ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، މާފަންނު މެދު ދާއިރާގެ މެންބަރު އިބްރާހީމް ރަޝީދު، ހޯމް މިނިސްޓަރ އަލީ އިހުސާނަށް ކުރައްވާ ސުވާލަށް ޖަވާބުދެއްވުމަށް މަޖިލީހަށް ހާޒިރުވެވަޑައިގެން ޖަވާބުދެއްވަމުންނެވެ.
އިހުސާން ވިދާޅުވީ ރާއްޖޭގައި ބިދޭސީންގެ ދަފްތަރެއް ކައުންސިލްތަކުގައި އޮތުމަކީ މުހިއްމު ކަމެއް ކަމަށެވެ. ނަމަވެސް، ކައުންސިލްތަކުގައި ބިދޭސީންގެ ޑޭޓާބޭސް އަށް އެކްސެސް ނެތުމަކީ އެފަދަ ކަމެއް އެހާ ފަސޭހައިން ކުރެވިދާނެ ކަމެއް ނޫންކަމަށާއި ކުރިއަށް އޮތް އެއް އަހަރުގެ ތެރޭގައި ރާއްޖޭގައި ތިބި ހުރިހާ ބިދޭސީންގެ ޑޭޓާބޭސް ނަގާ އޭގެ އެކްސެސް ކައުންސިލްތަކަށް ދޭނެ ކަމަށްވެސް އިހުސާން ވިދާޅުވިއެވެ.
އަޅުގަނޑުމެން މިހާރު ސަރުކާރުގެ ޓާގެޓަކީ، ކުރިއަށް އޮތް އެއް އަހަރުގެ ތެރޭގައި، ރާއްޖޭގައި ތިބި ހުރިހާ ބިދޭސީން. ހއ ތުރާކުނުން ފެށިގެން އައްޑު އަތޮޅު ގަމާ ދޭތެރޭގައި ހުރި ހުރިހާ ރަށެއްގައި ތިބި ހުރިހާ ބިދޭސީންގެ ފިންގާޕްރިންޓް ނެގި، އެ ޑޭޓާބޭސްތަކަށް އެޅި، ކައުންސިލްތަކަށް އެ ފިންގާޕްރިންޓް ޑޭޓާބޭސްތަކަށް އެކްސެސް ދެވި، އެތަނަށް އަންނަ ކޮންމެ ބިދޭސީއަކީ އިނގިލި ޖައްސާލީމައި ކާކުތޯ ޑޭޓާބޭސްތަކަށް އިނގޭވަރު ކޮށްދިނުން. އަޅުގަނޑުމެން އަމާޒު ހިފާފައި މިއޮތީ އެއް އަހަރުގެ ތެރޭގައި މި މަސައްކަތް ފުރިހަމަ ކުރަން
ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ މިނިސްޓަރު އަލީ އިހުސާން ވިދާޅުވިއެވެ
އިހުސާން އިތުރަށް ވިދާޅުވީ، މިކަން މިގޮތަށް ކުރެވިއްޖެނަމަ، ކައުންސިލުތަކަށް އެ ބާރު ލިބި ބިދޭސީންގެ ތެރެއިން ފުރާ ބަޔަކު ފުރިކަމާއި އެނބުރި އަންނަ ބަޔަކު އައިކަންވެސް މި ޑޭޓާބޭސް ގެ ޒަރިއްޔާއިން ލިބިގެންދާނެ ކަމަށެވެ.
މިހާރުވެސް އެކިއެކި މައްސަލަތަކުގައި ހައްޔަރުކުރަމުންދާ ބިދޭސީން އައިޑީ ނުކުރެވުމުގެ ސަބަބުން ދިމާވާ އުނދަގޫތަކުގެ ވާހަކަ އިހުސާން ވަނީ ފާހަގަ ކުރައްވާފައެވެ. އެހެންކަމުން، މިފަދަ ޑޮކިއުމެންޓޭޝަނެއް އޮތުމަކީ މުހިންމު ކަމެއް ކަމަށް އިހުސާން ވަނީ ވިދާޅުވެފައެވެ.
ޤަވާއިދާ ޚިލާފަށް އުޅޭ ބިދޭސީންގެ މައްސަލައަކީ ރާއްޖޭގައި ވަރަށް ބޮޑުވެފައިވާ މައްސަލައެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
