ހޮނިހިރު ދުވަހު ފަނޑިޔާރުންނާއި ޕީޖީ އައްޔަންކޮށް، މަޖިލިސް ޗުއްޓީއަށް

އަންނަ ހޮނިހިރު ދުވަހު ބާއްވާ ރައްޔިތުންގެ މަޖިލީހުގެ ޖަލްސާގައި އުއްތަމަ ފަނޑިޔާރާއި ސުޕްރީމް ކޯޓުގެ ފަނޑިޔާރަކު އައްޔަން ކޮށް، ޕްރޮސިކިއުޓާ ޖެނެރަލް އައްޔަންކުރުމަށް ފަހު މަޖިލިސް ޗުއްޓީއަށް ދާނެ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

މިއަދު ޖަލްސާ ފައްޓަވައިދެއްވައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، މާދަމާވެސް ޖަލްސާއެއް ބޭއްވުމަށް ނިންމާފައިވާ ކަމަށާއި ހޮނިހިރު ދުވަހުވެސް ޖަލްސާއެއް ބާއްވަން ނިންމާފައިވާކަމަށެވެ.

އެގޮތުން މާދަމާގެ ޖަލްސާގައި ލާމަރުކަޒީ ބިލުގެ މަސައްކަތާއި ބަޖެޓުގެ މަސައްކަތްވެސް ނިންމާނެ ކަމަށް ވިދާޅުވިއެވެ. ހޮނިހިރު ދުވަހުގެ ޖަލްސާގައި އާ ފަނޑިޔާރުންނާއި ޕީޖީ އައްޔަން ކުރާނެ ކަމަށެވެ. ހޮނިހިރު ދުވަހުގެ ޖަލްސާއަށް ފަހު މަޖިލިސް ދެން ދާނީ ޗުއްޓީއަށް ކަމަށް ނަޝީދު ވިދާޅުވިއެވެ.

އެހެންކަމުން މިއަދާއި ހޮނިހިރު ދުވަހު މަޖިލީހުގެ މަސައްކަތް ގިނަވެފައި ތަފާތުވާނެ ކަމަށެވެ. މަޖިލިސްގެ މިދައުރު މިމަހުގެ ހަތަކަށް ވަނީ މިހާރު އިތުރުކޮށްފައެވެ.

ހޮނިހިރު ދުވަހު ފަނޑިޔާރުންނާއި ޕީޖީ އައްޔަން ކުރައްވާނެ ކަމަށް ނަޝީދު ވިދާޅުވި އިރު، އުއްތަމަ ފަނޑިޔާރު ކަމަށް އަހުމަދު މުއުތަސިމް އަދުނާން އާއި ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރަން ފޮނުވި ހުސްނުއްސުއޫދު، އަދި ޕީޖީ ކަމަށް އައްޔަން ކުރަން ރައީސް ފޮނުއްވި ހުސެން ޝަމީމްގެ ނަން ދިރާސާ ކުރުމަށް ޖުޑީޝަރީ ކޮމިޓީއަށް މިހާރުވަނީ ފޮނުވައިފައެވެ.