އައްޑޫސިޓީގެ އިދާރީ ހިންގުން ރޫޅިގެންދިއުމަކީ ހިތްދަތިކަމެއް: ނިޒާރު
ލިޔުންތެރިޔާ
އަބްދުﷲ ހުސައިން
އައްޑޫސިޓީގެ އިދާރީ ހިންގުން ރޫޅިގެން ދިއުމަކީ ހިތްދަތި ކަމެއްކަމަށާއި، މިއީ ދެކެން ބޭނުންވި ހާލަތެއް ނޫންކަމަށް އެ ސިޓީގެ މޭޔަރު އަލީ ނިޒާރު ވިދާޅުވެއްޖެއެވެ.
އައްޑޫ މީދު އާއި ހުޅުދޫ އަދި ފޭދޫގައި ވަކިވަކި ރަށު ކައުންސިލްތައް އުފެއްދުމާ މެދު މިއަދު ވަނީ ހިޔާލު ހޯދުމުގެ ވޯޓެއް ނަގާފައެވެ. މި ވޯޓުގައި މީދޫ އަދި ހުޅުދޫގެ ރައްޔިތުންގެ ތެރެއިން ވޯޓު ލީ ގިނަ މީހުން ވޯޓު ދިނީ އެ ރަށްތަކުގައި ވަކި ކައުންސިލެއް އޮންނަ ގޮތަށް ބަދަލުކުރުމަށެވެ.
މިކަމާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި މޭޔަރު ވިދާޅުވެފައިވަނީ، ބައެއް ރަށްތަކުގެ ނަތީޖާ އެގޮތަށް އައިނަމަވެސް އެ ނިންމުމަށް އިހުތިރާމްކުރާ ހާލު މަރުހަބާ ދަންނަވާ ކަމަށެވެ. އެގޮތުން ހުޅުދޫ އަދި މީދޫގެ އިދާރީ ވަކި ވުމަކީ އެރައްޔިތުންގެ ޒަމާންވީ އުދާސްތަކަކަށް ނިމުން ގެނުވާނެ ނިންމުމެއްކަމަށް އުއްމީދު ކުރާކަމަށް މޭޔަރު ވިދާޅުވިއެވެ.
އައްޑޫ ފޭދޫ ރައްޔިތުންގެ ހަރުދަނާ އަދި ދުރުވިސްނޭ ނިންމުން ފާހަގަކުރައްވަމުން ނިޒާރު ވިދާޅުވީ އެ ނިންމުމުން ދައްކުވައިދެނީ އައްޑޫ ސިޓީގައި ދެމިތިބުމަށް ނިންމި ނިންމުމަކީ ތަރައްގީއާއި ކުރިއެރުން ދެމެހެއްޓުމަށް ކޮންމެހެން ބޭނުންވި އަދި އުއްމީދު ކުރެވުނު މުހިންމު ނިންމެވުމެއް ކަމަށެވެ. އައްޑޫ ހުޅުދޫ އަދި އައްޑޫ މީދޫގެ އިދާރީ ވަކިވުމަކީ އެރައްޔިތުންނާއި ދެންތިބި އައްޑޫގެ ރައްޔިތުންނާ އެކު ދެމިއޮތް ޒަމާންވީ އެކުވެރިކަމާއި އަޚްވަންތަކަމަށް އެއްވެސް ބަދަލެއް އަންނަން ޖެހޭ ސަބަބެއްނޫންކަން ފާހަގަކުރައްވަމުން މޭޔަރު ނިޒާރު ވަނީ ކުރިޔަށްވުރެ ގަދަކޮށް އައްޑޫގެ ތަރައްގީއަށް މުޅި އައްޑޫ އެއްކޮށް ނިކުމެ އަތުގުޅާލަން ޖެހޭކަން ފާހަގަކުރައްވާފައެވެ.
ފިތުނަވެރި ބަހުސުތަކުން އެއްކިބާވެ އެކުވެރިކަމާއި އެކު ކުރިއަށް ދާންޖެހޭކަން ފާހަގަކުރައްވައި މޭޔަރު ވަނީ، އައްޑޫ މީދޫ އަދި އައްޑޫ ހުޅުދޫ ރައްޔިތުންނާމެދު ތަފާތުކުރުން ނުބާއްވާނޭކަމުގެ ޔަގީންކަން ދެއްވާފައެވެ.
މިއަދު ނެގި ފެންނަ ނުފެންނަ ވޯޓުގެ ވަގުތީ ނަތީއްޖާ ދައްކާ ގޮތުން މީދޫ އަދި ހުޅުދޫގެ ރައްޔިތުން ބޭނުންވަނީ އެ ރަށްތަކުގައި ވަކި ކައުންސިލެއް އޮންނަ ގޮތަށް ބަދަލުކުރުމަށެވެ. އެހެން ނަމަވެސް ފޭދޫގެ ރައްޔިތުން ބޭނުންވަނީ ސިޓީ ކައުންސިލުގެ ބައެއްގެ ގޮތުގައި އެ ރަށް ބޭއްވުމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
