މިއޮތީ މީރުކޮށް ރިހާކުރު ފަތަފޮޅި ތައްޔާރު ކުރާނެ ގޮތުގެ ރެސިޕީ

ފަތަފޮޅި އަކީ ޒަމާނުއްސުރެ ދިވެހިން ކައި އުޅޭ ދިވެހިވަންތަ، މީރު ހެދިކާ އެކެވެ. މިއަދު ވޮއިސްގެ ބަދިގެއިން މި ގެނެސްދެނީ މީރުކޮށް ރިހާކުރު ފަތަފޮޅި ތައްޔާރު ކުރާނެ ގޮތުގެ ރެސިޕީއެވެ.

ބޭނުންވާ ތަކެތި

1 ޖޯޑު ހަނޑޫ (ފެނުއަޅައި މަޑުކޮށް، އެހާ ހިމުން ނޫންކޮށް މުގުރާފަ)

1 ބޮޑު ފިޔާ (ތުނިކޮށް ކޮށާފައި)

1/2 ޖޯޑު ހުނި

1/2 ޖޯޑު ވަޅޯމަސް (ހިމުން ކޮށްފައި)

1/2 ސައިސަމުސާ ގާނާފައިހުރި އިނގުރު

1/2 ސައިސަމުސާ ގާނާފައި ހުރި ލޮނުމެދު

1/4 ސައި ސަމުސާ އަސޭމިރުސް

1 1/4 ސައި ސަމުސާ ލޮނު (ނޫނީ ރަހަލާ ވަރަށް)

2 ލުނބޯ

1/4 ސައިސަމުސާ ރީނދޫ

ގިތެޔޮ މިރުސް (ތުނިކޮށް ކޮށާފައި)

ހިކަނދިފަތް (ކުދިކޮށް ކޮށާފައި)

4 ވަރަކަށް ހިކިމިރުސް (ބިތްގަނޑުމަތީ ފިހެފައި)

1 ސައި ސަމުސާ ރިހާކުރު

ދިއްގާ ފަތް

ތައްޔާރުކުރާނެ ގޮތް

1) ބޯތަށްޓަކަށް ފިޔާއާއި، އިނގުރާއި، ލޮނުމެދާއި، ލޮނާއި، އަޅާފައި ލުނބޯ ހުތް ޖަހައިގެން ރަނގަޅަށް މޮޑޭށެވެ.

2) ދެން ހިކަނދިފަތާއި، ގިތެޔޮމިރުހާއި، ހިކިމިރުހާއި، ރިހާކުރާއި، އަސޭމިރުހާއި، ރީނދޫކޮޅުވެސް އެއަށް އަޅާފައި އަނެއްކާވެސް ހުރިހާ އެއްޗެއް ރަނގަޅަށް އެއްވަންދެން މޮޑެލާނީއެވެ. އެއަށްފަހު ހުނި ކޮޅު އަޅާލައިގެންވެސް ރަނގަޅަށް މޮޑެލާފައި މަސް އަޅައިގެންވެސް މޮޑެލާށެވެ.

3) ދެން މޮޑުނު މަސްގަނޑުގެ ތެރެއަށް ފުނޑާފައިހުރި ހަނޑޫ އަޅާފައި މޮޑެލާށެވެ. ދެން ކުޑަފެންފޮދެއް އަޅައި ކުޑަކޮށް ދިޔާކޮށްލާށެވެ.

4) އެއަށްފަހު، ދިއްގާ ފަތުގެ އެއް ފަޅިއަށް މަސްހުނިގަނޑު އަޅައި އެއްވަރުކޮށްލުމަށްފަހު އަނެއްފަޅި އޭގެ މަތީގައި ބާއްވައި މަސްހުނިގަނޑު ފޮރުވާލާށެވެ. ބާކީ ފޮޅިތައްވެސް މިހެން ހަދާލާށެވެ.

5) ދެން ބިތްގަނޑު އުނދުން މައްޗަށް އުދައި، ހޫނު ވުމުން ފޮޅިތައް އޭގެ މަތީ ބާއްވައިގެން ފިހެލާށެވެ. އުނދުން ބަހައްޓަންވާނީ މަޑު ގިނީގައެވެ.