އަމިއްލަ ގޮތުން އިންތިޚާބުގައި ވާދަކުރުމަށް ރުކުމާ އީސީއަށް ފޯމް ހުށަހަޅުއްވައިފި
މެމްބަރު މުހައްމަދު އަބްދުލްކަރީމް (ރުކުމާ) އަމިއްލަ ގޮތުން އިންތިޚާބުގައި ވާދަކުރައްވަން އިލެކްޝަންސް ކޮމިޝަން (އީސީ) އަށް ފޯމު ހުށަހަޅުއްވައިފި އެވެ.
ރުކުމާ ވަނީ އަންނަ އެޕްރީލް މަހުގެ ހަވަނަ ދުވަހުގައި ބާއްވާ މަޖިލީހުގެ އިންތިޚާބުގައި އެމްޑީޕީގެ ޕްރައިމަރީގައި ވާދަކުރައްވާ ނާކާމިޔާބުވެ ވަޑައިގެންފައެވެ.
ރުކުމާއާއެކު ވާދަކުރައްވާ ޓިކެޓް ކާމިޔާބް ކުރައްވާފައިވަނީ ހުސައިން ޝަމީމް އެވެ.
ރުކުމާ މިއަދު އިލެކްޝަނަށް ފޯމް ހުށަހެޅުއްވި އިރު އޭނާއާއެކު އޭނާއަށް ތާއީދުކުރައްވާ ގިނަ އަދަދެއްގެ މީހުން ބައިވެރިވެފައިވެއެވެ.
ރުކުމާ އަމިއްލަ ގޮތުން ވާދަކުރެއްވުމަށް ނިންމާފައިވާއިރު އޭނާ ވަނީ ޕްރައިމަރީއިން ނާކާމިޔާބްވުމުން އެމްޑީޕީން ވަކިވެފައެވެ. އެޕާޓީއިން ވަކިވުމަށްފަހު އޭނާ ވިދާޅުވެފައިވަނީ އޭނާ އެމްޑީޕީން ވަކިވެވަޑައިގަތީ އެޕާޓީގައި އިޚްލާސްތެރިންނާއި އަދާވާތްތެރިން ވަކިނުވާ ދަރަޖައަށް ކަންތައްތައް ދިއުމުން ކަމަށެވެ. އަދި ޚާއްސަކޮށް އެމްޑީޕީ އުފައްދަން މަސައްކަތް ކުރި މީހުންގެ މަސައްކަތް ޕާޓީގެ އިސް ބައެއް ފަރާތްތަކުން ބަލައި ނުގަންނަ ކަމަށްވެސް އޭނާ ވިދާޅުވެފައިވެއެވެ.
ރުކުމާ އަމިއްލަ ގޮތުން މަޖިލީހުގައި ވާދަކުރެއްވުމަށް ފޯމް ހުށަހަޅުންވާފައި މިވަނީ ޕްރައިމަރީން ބަލިވިޔަސް އިންތިޚާބުގައި ވާދަކުރެވޭނެ ކަމަށް ސްޕްރީމް ކޯޓުން ނިންމުމުން ނެވެ.
އެމްޑީޕީގެ ޓިކެޓްގައި މަޖިލީހަށް ވާދަކުރައްވަން ޕްރައިމަރީގައި ވާދަކޮށް ނާކާމިޔާބުވި ބައެއް މެންބަރުން އަންނަނީ އަމިއްލަ ގޮތުން އެ އިންތިޚާބުގައި ވާދަކުރައްވާނެ ކަން އިއުލާން ކުރަމުންނެވެ. އެކަމާއި ގުޅިގެން އެމްޑީޕީގެ ރައީސް މުހައްމަދު ނަޝީދު ވިދާޅުވެފައިވަނީ ޕާޓީގެ މެންބަރުން އަމިއްލަ ގޮތުން އިންތިޚާބުގައި ވާދަކުރުމަކީ ޕާޓީއަށް ބޭވަފާތެރިވުން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
