އީދަށް މާލެ ދިއްލާލަން ކުރި މަސައްކަތަށް ކުރީ ސަރުކާރުން ދުއްތުރާކުރި: ޑެޕިއުޓީ މޭޔަރު

އީދަށް މާލެ ސަރަހައްދު ދިއްލާލުމަށް ކުރި މަސައްތަށް ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން އުނދަގޫތަކާއި ދުއްތުރާތައް ކުރިމަތިކުރުވި ކަމަށް މާލެ ސިޓީގެ ޑެޕިއުޓީ މޭޔަރު މުހައްމަދު އަރީޝް ވިދާޅުވެއްޖެ އެވެ.

އަރީޝް މިހެން ވިދާޅުވީ ކުރިއަށް އޮތް ފިތުރު އީދު ދުވަހަށް މާލެ ސަރަހައްދު ދިއްލާލުމަށް އީދު ލައިޓްތައް ޖެހުމުގެ މަސައްކަތް ފެށިކަން ފާހަގަ ކުރައްވާ ކުރެއްވި ޕޯސްޓެއްގަ އެވެ. އީދަށް މާލެ ސަރަހައްދު ދިއްލާލުމުގެ މަސައްކަތް ފެށީ މާލެ ސިޓީގެ މޭޔަރު ކަމުގައި ރައީސް މުއިއްޒު ހުންނެވި ދުވަސްވަރު އެވެ.

ހަގީގީ އީދެއްގެ އުފާ ދިވެހީންނަށް ހޯދާ ދިނުމަށް ފެއްޓެވި މި މަސައްކަތަށް އާންމުންގެ ވަރަށް ބޮޑު ތަރުހީބެއް ލިބުނެވެ.

އަރީޝް މިއަދު ވިދާޅުވީ އީދަށް މާލެ ސިޓީ އާއި ވިލިމާލެ އަދި ހުޅުމާލޭ ގައި ކުލަބޮކި ޖަހާ މުޅި މާލެ އޭރިޔާ ދިއްލާލުން މީ މާލެސިޓީގެ މޭޔަރަކަމުގައި ރައީސް ޑރ. މުޙައްމަދު މުޢިއްޒު ހުންނެވިއިރު ވަރައް ކުލަގަދަކޮއް ކުރައްވަމުން ގެންދެވި މަސައްކަތެއް ކަމަށެވެ.

އަދި ވިދާޅުވީ އެއީ އޭރުގެ ސަރުކާރުގެ އުންދަގޫތަކާ ކުރި ދުއްތުރާ ތަކުގެ ތެރޭން ވެސް ކާމިޔާބު ކަންމަތީ ކުރި ޗާލު ކަމެއް ކަމަށެވެ.

މިއަދު ރައީސް މުއިއްޒުގެ ސީދާ އިރުޝާދުގެ ދަށުން ސިޓީސް މިނިސްޓްރީން އެކަން ކުރަމުން ގެންދާކަން ފާހަގަ ކުރައްވާ އަރީޝް ވިދާޅުވީ އެ މަސައްކަތަށް ސިޓީ ކައުންސިލްގެ ފުރިހަމަ އެއްބާރުލުމާއި އެހީތެރިކަން އޮންނާނެ ކަން މިނިސްޓަރު އާދަމް ޝަރީފް އުމަރަށް ދެންނެވި ކަަމަށެވެ.

ސަރުކާރުން މި އަހަރު ވަނީ 65 ރަށެއްގައި އީދު ލައިޓް ހަރުކުރުމަށް ނިންމާފަ އެވެ. ސިޓީސްތަކާއި އަތޮޅުގެ ވެރިރަށްތައް އިތުރަށް ދިއްލާލާނެ އެވެ.