މައްކާއަށް އަމާޒުކޮށް ދޭން އުޅުނު ހަމަލާ، ރައީސް ވަރަށް ބޮޑަށް ކުށްވެރިކުރައްވައިފި

މުސްލިމުންގެ އެންމެ މުގައްދަސު މިސްކިތްކޮޅު ހުރި މައްކާގެ މާތް ބިމަށް ދޭން އުޅުނު ހަމަލާ, ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެންމެ ހަރުކަށި އިބާރާތުން ކުށްވެރި ކުރައްވައިފި އެވެ.

އެ ހަމަލާ ކުށްވެރި ކުރައްވާ އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ މުސްލިމުންގެ މަތިވެރި ހަރަމްފުޅު ހުރި މަައްކާއަށް އަމާޒު ކުރެވޭ ނުރައްކާތެރި ކޮންމެ ހަމަލާ އަކީ އަދި ކޮންމެ އަމަލަކީ މުޅި މުސްލިމު އުންމަތާއި ދެކޮޅު އަމަލެއް ކަމަށެވެ. އެފަދަ އެއްވެސް ކަމެއް ބަލައިނުގަނެވޭނެ ކަމުގައި ވިދާޅުވި އެވެ.

މީގެ އިތުރުން ރައީސް ވަނީ މައްކާއާ އެ ސިޓީގައި އުމްރާގެ އަޅުކަމަށް ގޮސް ތިބި މީހުންނާއި މައްކާ ސިޓީގެ އާންމުންގެ ރައްކާތެރިކަން ކަށަވަރު ކުރުމަށް ސައުދީގެ އެއާ ޑިފެންސް ފޯސްއިން ދިން އަވަސް އަދި ރައްދު ހަމަލާތަކަށް ތައުރީފު ކުރައްވާފަ އެވެ. ރާއްޖެ އޮތީ ސައުދީގެ ރައްޔިތުންނާއެކު ކަމުގައި ވެސް ވިދާޅުވި އެވެ.

އެމަނިކުފާނުގެ މެސެޖުގައި ނިރުބަވެރި މިފަދަ ހަމަލާތައް ވަގުތުން ހުއްޓާލުމަށް ގޮވާލެއްވި އެވެ. އަދި ހާލަތު ގޯސްނުކޮށް މަޝްވަރާއިން ސުލްހައާ ހައްލު ހޯދުމަށް ހުރިހާ ފަރާތްތަކަށް ވެސް އިލްތިމާސް ކުރެއްވި އެވެ.

ސަޢޫދީ ޢަރަބިއްޔާއިން މި ޙާދިސާ ސިފަކޮށްފައިވަނީ ޓެރަރިޒަމްގެ ޢަމަލެއްގެ ގޮތުގައެވެ. އެ ޤައުމުން ބުނީ މައްކާއަށް އަމާޒުކުރި މިއީ ދެވަނަ ފަހަރު ކަމަށެވެ. ފުރަތަމަ ފަހަރު ބެލިސްޓިކް މިސައިލަކުން 2017 ވަނަ އަހަރުގެ ޖުލައި 27 ގައި މައްކާއަށް ހަމަލާ ދޭން މަސައްކަތްކުރި ކަމަށް ސަޢޫދީން ބުނެފައިވެއެވެ.

ހޫތީންގެ ސިޔާސީ ބިއުރޯގެ މެންބަރު ޙިޒާމް އަލް އަސަދު ވަނީ ރިޔާޛުން ކުރާ ތުހުމަތު ސިފަކޮށްފައިވަނީ ބޮޑު ދޮގެއް ކަމުގައެވެ. މައްކާގެ ވައިގެ ސަރަޙައްދާ ދިމާއަށް ހޫތީންގެ ޑްރޯންއެއް ދަތުރުކުރި ކަމަށް ސަޢޫދީން ބުނެފައިވެއެވެ.

"މާތް ވެގެންވާ މައްކާއަށް އަމާޒުކުރި ކަމުގެ ދަޢުވާއަކީ ކުރިންވެސް ދައްކާފައިވާ މިހާރު އެއްވެސް މީހަކު ނުހެއްލޭ ފަދަ ދޮގެއް" ކަމަށް އަލް އަސަދު ބުނެފައިވެއެވެ.