ޗައިނާގެ އެފްޓީއޭ ފެށުމުން ވެސް ދިވެހި ވިޔަފާރިތަކަށް ހިމާޔަތް ލިބޭނެ: މިނިސްޓަރ ސައީދު
ޗައިނާގެ އެފްޓީއޭ ފެށުމުން ވެސް ދިވެހި ވިޔަފާރިތަކަށް ހިމާޔަތް ލިބޭނެކަމުގެ ޔަޤީންކަން އިކޮނޮމިކް މިނިސްޓަރު ސައީދު ދެއްވައިފިއެވެ.
މިނިސްޓަރ ސައީދު ޗައިނާއާއެކު ވެފައިވާ މިނިވަން ވިޔަފާރީގެ އެއްބަސްވުން (އެފްޓީއޭ) ފެށުމުން ދިވެހި ވިޔަފާރިތަކަށް ހިމާޔަތް ލިބޭނެކަމުގެ ޔަގީންކަން ދެއްވައިފައިވާއިރު، މި އެއްބަސްވުމަށް އަމަލުކުރުމަށް ސަރުކާރުން ނިންމާފައިވަނީ 2025 ވަނަ އަހަރުގެ ޖެނުއަރީ 1 ގައެވެ.
ރައީސް އޮފީހުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި، މިނިސްޓަރ ސައީދު ވިދާޅުވީ މި އެއްބަސްވުމުގެ ދަށުން ޗައިނާގެ ބޮޑެތި ވިޔަފާރިތަކާ ދިވެހި ވިޔަފާރިތަކަށް އެއްހަމައެއްގައި ވާދަކުރަން ނުޖެހޭނެ ކަމަށެވެ.
"ރާއްޖޭގައި އެ ބޭފުޅުންނަށް [ޗައިނާ ކުންފުނިތަކަށް] ހަރަކާތްތެރިއެއް ނުވެވޭނެ އީކުއަލް ޓާފެއްގައި. އަޅުގަނޑުމެން ހުންނާނެ ރެސްޓްރިކްޝަންތަކެއް ލާފައި ދިވެހި ކުންފުނިތައް ހިމާޔަތް ކުރަން،"
މިނިސްޓަރ ސައީދު ވިދާޅުވިއެވެ.
ޓޫރިޒަމް ދާއިރާގައި ޗައިނާގެ އޭޖެންޓުންނަށް ރާއްޖޭގައި ހަރަކާތްތެރިވެވޭނެ ފުރުސަތު ނުލިބޭނެކަން މިނިސްޓަރު ފާހަގަކުރެއްވިއެވެ. އަދި މި އެއްބަސްވުމުގެ ދަށުން ޗައިނާއިން ރާއްޖެއަށް އެތެރެކުރާ މުދަލުގެ 91 އިންސައްތަ ބާވަތުން ޑިއުޓީ ދައްކަން ނުޖެހޭނެ ކަމަށްވެސް ސައީދު ވިދާޅުވިއެވެ.
މީގެއިތުރުން، ރާއްޖެއިން ޗައިނާއަށް މަހުގެ 296 ބާވަތެއް ސުން ޕަސެންޓު ޑިއުޓީގައި އެކްސްޕޯޓް ކުރެވޭނެ ކަމަށް މިނިސްޓަރު ވިދާޅުވިއެވެ. އަދި މިކަމުގެ ސަބަބުން ބޭރު ގައުމުތަކުން މަހުގެ ބާވަތްތައް ގެނެސް ވެލިއު އެޑްކޮށް ޗައިނާއަށް ރީއެކްސްޕޯޓް ކުރުމުގެ ފުރުޞަތު ލިބިގެންދާނެ ކަމަށްވެސް ފާހަގަކުރެއްވިއެވެ.
މި އެއްބަސްވުމަކީ ދިވެހި ވިޔަފާރިތަކަށާއި އިޤްތިޞާދަށް ވަރަށް ބޮޑު ފައިދާތަކެއް ލިބިގެންދާނެ އެއްބަސްވުމެއް ކަމުގައި މިނިސްޓަރު ސައީދު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
