އުއްތަމަ ފަނޑިޔާރު ކަމަށް ކުރިމަތިލެއްވީ ތިން ބޭފުޅެއް

އުއްތަމަފަނޑިޔާރުގެ މަގާމަށް ހުޅުވާލި ފުރުސަތުގައި އެ މަގާމަށް ތިން ބޭފުޅަކު ކުރިމަތިލައްވައިފި އެވެ.

އެ މަގާމަށް ހުޅުވާލީ އުއްތަމަ ފަނޑިޔާރުގެ މަގާމުގައި ހުންނެވި އަހުމަދު މުތަސިމް އަދުނާން ފަނޑިޔާރުކަމުގެ މަގާމުން ޝަރަފްވެރިކަމާއެކު ރިޓަޔާ ކުރެއްވުމުންނެވެ.

އެ ފުރުސަތު އޮތީ މިއަދު މެންދުރު 12:00 އާ ހަމައަށް ހުޅުވާލާފަ އެވެ. ޖޭއެސްސީން ބުނި ގޮތުގައި އެ މަގާމަށް ތިން ބޭފުޅަކު ވަނީ ކުރިމަތިލާފަ އެވެ.

* އަބްދުﷲ މުހައްމަދު - ފެމެލީ ކޯޓްގެ ގާޒީ, ކްރިމިނަލް ކޯޓްގެ ކުރީގެ އިސް ގާޒީ

* ޝުޖާއު އުސްމާން - ހައިކޯޓްގެ ކުރީގެ އިސް ފަނޑިޔާރު

* އަބްދުލްޣަނީ މުހައްމަދު - ސުޕްރީމް ކޯޓްގެ ކުރީގެ ފަނޑިޔާރު

މި ބޭފުޅުންގެ ތެރެއިން ފަނޑިޔާރު ކަމުގައި މިހާތަނަށް ދެމި ހުންނެވީ ފެމެލީ ކޯޓްގެ ފަނޑިޔާރު އަބްދުﷲ މުހައްމަދު އެވެ.

ޝުޖާއު އުސްމާން މަގާމުން އިސްތިއުފާ ދެއްވީ 2020 ވަނަ އަހަރު އެވެ. އެއީ އޭރު އޮތް ރައްޔިތުންގެ މަޖިލީހަށް ޝުޖާއު ވަކިކުރެއްވުމަށް ޖޭއެސްސީން މައްސަލަ ފޮނުވުމުންނެވެ. އިސްތިއުފާ ނުދެއްވި ނަމަ މަޖިލީހުން އޭނާ ވަކި ކުރައްވާނެ އެެވެ.

ސުޕްރީމް ކޯޓްގެ ކުރީގެ ފަނޑިޔާރު އަބްދުލްޣަނީ މުހައްމަދު މަގާމުން ވަކިކުރެއްވީ 2019 ވަނަ އަހަރު އެވެ.

އުއްތަމަފަނޑިޔާރުކަމަށް ކުރިމަތިލާ މީހެއްގެ ޝަަރުތަކީ އުމުރުން 30 އަހަރުވެފައިވާ މީހަކަަށްވުމާއި ފަަނޑިޔާރުކަމުގައި ނުވަތަ ގާނޫނީ ވަކީލުކަން ކުރުމުގައި ނުވަތަ ފަނޑިޔާރުކަމައި ވަކާލާތުކުރުމުގައި ހަތް އަހަރު ދުވަހުގެ ތަޖުރިބާ ލިބިފައިވުމެވެ.

އުއްތަމަ ފަނޑިޔާރު މުއުތަސިމްއަކީ ރާއްޖޭގައި ޝަރަފްވެރިކަމާއެކު މަގާމުން ރިޓަޔަރ ކުރައްވާ ފުރަތަމަ އުއްތަމަ ފަނޑިޔާރަށެވެ. މީގެ ކުރިން އައްޔަންކުރެއްވި ހުރިހާ އުއްތަމަ ފަނޑިޔާރުންނަކީ މަގާމުން ދުރުކުރެއްވި ބޭފުޅުންނެވެ.

އުއްތަމަ ފަނޑިޔާރުކަމުގެ މަގާމަށް މުއުތަސިމް ރިޓަޔާ ކުރެއްވުމާއި ގުޅިގެން ސުޕްރީމް ކޯޓު ވަގުތީ ގޮތުން ހިންގުމުގެ ޒިންމާ ފަނޑިޔާރު އަބްދުالله ހަމީދުއާ ވަނީ ހަވާލުކޮށްފަ އެވެ.