ޕީއެސްއެމްއިން ބިގަށް 78.5 މިލިއަން ރުފިޔާ ދައްކަން ކުރި ޙުކުމް ބާތިލްކޮށްފި

ޕަބްލިކް ސާވިސް މީޑިއާ (ޕީއެސްއެމް) އިން އަމިއްލަ ވިޔަފާރި ކުންފުންޏެއްކަމަށްވާ ބިޒްނަސް އިމޭޖް ގްރޫޕް (ބިގް) އަށް 78.5 މިލިއަން ރުފިޔާ ދައްކަން ކޮށްފައިވާ ޙުކުމް ހައިކޯޓުން ބާތިލުކޮށްފިއެވެ.

މޯލްޑިވްސް ނޭޝަނަލް ބްރޯޑްކާސްޓިންގ ކޯޕަރޭޝަން (އެމްއެންބީސީ) އިން ބިގަށް 78.5 މިލިއަން ރުފިޔާ ދައްކަންޖެހޭކަމަށް ކަނޑައަޅައި އެ ފައިސާ ދެއްކުމަށް ސިވިލް ކޯޓުން 2016 ވަނަ އަހަރު ހުކުމް ކުރީ، އެ ކުންފުންޏާއި އެކު އެމްއެންބީސީ އިން ވެފައިވާ އެއްބަސްވުމެއްގެ ދަށުން އެ ކުންފުންޏަށް ދައްކަންޖެހޭ 5 މިލިއަން ރުފިޔާ ނުދައްކައިގެންކަމަށް ބުނެއެވެ.

އޭރު މި މައްސަލައިގައި ސިވިލް ކޯޓުން ހުކުމް ކުރި އިރުވެސް ދައުލަތުގެ މީޑިއާ ޕީއެސްއެމްގެ ދަށުން ހިންގަމުން ދިޔަ ނަމަވެސް އެ މައްސަލައިގައި ޕީއެސްއެމް ބައިވެރި ކޮށްފައިނުވާކަން ފާހަގަކޮށްލެވެއެވެ.

ހަމައެކަނި 5 މިލިއަން ރުފިޔާ ދައްކަން ޖެހޭއިރު، ޕީއެސްއެމް އިން ބިގަށް 78.5 މިލިއަން ރުފިޔާ ދައްކަން ޖެހޭތީ 2019 ވަނަ އަހަރު ޕީއެސްއެމްއިން އެހުކުމް އިސްތިއުނާފް ކުރުމަށް ހައިކޯޓަށް ހުށައެޅިނަމަވެސް، މުއްދަތު ހަމަވިފަހުން އިސްތިއުނާފަށް ހުށަހެޅިކަމަށް ބުނެ އެކޯޓުން ވަނީ މައްސަލަ ބަލައިނުގަތުމަށް ނިންމާފައެވެ. ޕީއެސްއެމްއިން ހައި ކޯޓުގެ މި ނިންމުން 2021 ވަނަ އަހަރު ސުޕްރީމް ކޯޓަށް އިސްތިއުނާފް ކުރަން ހުށައެޅުމުން އެ ކޯޓުން ވަނީ އެ މައްސަލަ އިސްތިއުނާފް ކުރެވޭނެކަމަށް ނިންމައި، އެ މައްސަލަ ބަލައިގަތުމަށް ހައިކޯޓަށް އަމުރުކޮށްފައެވެ.

އެއާއިއެކު ހައިކޯޓުން ވަނީ މި މައްސަލަ ބެލުމަށްފަހު އެމްއެންބީސީ އިން ބިގަށް ދައްކަން ޖެހޭ 78.5 މިލިއަން ރުފިޔާ ދައްކަން ކުރި ހުކުމް ބާތިލުކޮށް މި މައްސަލަ އަލުން ބެލުމަށް ސިވިލް ކޯޓަށް އަމުރުކޮށްފައެވެ.

މި ހުކުމްގައި ހައި ކޯޓުން ވަނީ އެމްއެންބީސީގެ މައްޗަށް ކޮށްފައިވާ ހުކުމެއް ޕީއެސްއެމްގެ މައްޗަށް ތަންފީޒު ނުކުރެވޭނެކަމަށާއި، އެމްއެންބީސީއަކީ އުވާލާފައިނުވާއިރު، މިއީ އެކުންފުނީގެ ޒިންމާ އަކަށް ވާއިރު އެކަމަށް ޕީއެސްއެމް ޒިންމާ އުފުލަން ނުޖެހޭނެ ކަމަށް ބުނެފައެވެ. އަދި މި މައްސަލަގައި 2016 ވަނަ އަހަރު ހުކުމް އިއްވި އިރުވެސް ޕީއެސްއެމް  ބައިވެރިކޮށްފައިނުވާކަން ހުކުމްގައި ފާހަގަކޮށް، ސުޕްރީމް ކޯޓުން ވަނީ ސިވިލް ކޯޓުން މި މައްސަލަ އަލުން ބަލާއިރު، ޕީއެސްއެމް ބައިވެރި ކުރުމަށް ވެސް އަމުރުކޮށްފައެވެ.

މި ހުކުމް މިދިޔަ ސަރުކާރުގައި ވެސް ހައި ކޯޓުގައި ބާތިލުކޮށްފައިވީ ނަމަވެސް، އެ ހުކުމްގައި ބަޔާންކޮށްފައިވާ ފައިސާގެ ތެރެއިން 30 މިލިއަން ރުފިޔާ، ޕީސީބީގެ އެންގުމާއި އެއްގޮތަށް ފިނޭންސް މިނިސްޓްރީން ލޯނެއް ނަގައިގެން ބިގަށް ދޫކުރިކަން ފާހަގަކޮށްލަން ޖެހެއެވެ.