ދީނީ ނަޒަރުން ބަލާއިރު ޚިދުމަތް ދިނުމުގެ އެކި ސަފުތަކުގައި، އަންހެނުން ބައިވެރިވުން ހުއްދަ: ޝަހީމް

ދީނީ ނަޒަރުން ބަލާއިރު މުޖުތަމައުއަށް ޚިދުމަތް ދިނުމުގެ އެކި ސަފުތަކުގައި އަންހެނުން ބައިވެރިވުން ހުއްދަކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ކޮންގްރެސް ޕާޓީގެ މާފަންނު މެދުދާއިރާގެ ޖަގަހަ ހުޅުވުމަށް ބޭއްވި ހަފްލާގައި ވާހަކަދައްކަވަމުން އިސްލާމިކް މިނިސްޓަރު ވިދާޅުވީ، ބައެއް ރަށްރަށުގައި ކަނބަލުން މަޤާމުތަކަށް ކުރިމަތިލުމާ ގުޅޭގޮތުން ބައެއް ފަރާތްތަކުން އުސޫލްތަކާ ހިލާފަށް ދީނީ ފަތުވާތައް ދެމުންދާކަމުގެ ޝަކުވާ ބައެއް ބޭފުޅުންގެ ފަރާތުން ލިބިފައި އެބަހުރިކަމަށެވެ.

ކަނބަލުންނަށް މި ކުރިމަތިވަމުންދާ ކަންކަމާ ބަހެއް ނުބުނެ ހަނުހުރުމަކީ އެންމެ އެދެވިގެންވާކަމެއް ނޫންކަމަށް ފާހަގަކުރައްވަމުން މިނިސްޓަރު ވިދާޅުވީ، ލޯކަލް ކައުންސިލްތަކުގެ ދައުރަކީ ހިދުމަތް ދިނުމުގެ ދައުރެއް ކަމަށާއި، އެގޮތުން މުޖުތަމައުއަށް ޚިދުމަތް ދިނުމުގެ އެކި ސަފުތަކުގައި އަންހެނުން ބައިވެރިވުމަކީ ދީނީގޮތުން ހުއްދަކަމެއް ކަމަށެވެ.

ދީނީ ނަޒަރުން ބަލާއިރުގައި ޚިދުމަތް ދިނުމުގެ އެކި ސަފުތަކުގައި އަންހެނުން ބައިވެރިވުމަކީ އެއީ ހުއްދަ ކަމެއް. އެއީ އިސްލާމް ދީން ތަރުހީބުދޭ ކަމެއްވެސްމެ. ރަސޫލުﷲ صلى الله عليه وسلم ގެ ހަޔާތްޕުޅުން ފެށިގެން މުސްލިމް އުންމަތުގެ އިސްކަނބަލުން އިސްލާމީ އުންމަތާއި އިސްލާމީ ހަޟާރަތު ބިނާކުރުމުގައި ވަރަށް މުހިންމު ދައުރުތަކެއް އަދާކޮށްފައިވޭ. ހަނގުރާމަތަކުގެ މައިދާންތަކުގަވެސް ހަނގުރާމަވެރިންނަށް ޚިދުމަތް ދިނުމުގަވެސް އަދި ޒަޚަމްވެގެން އަންނަ މީހުންނަށް ފަރުވާކުރުމުގަވެސް މިސްކީނުންނަށް ކާންދިނުމުގަވެސް އަދި ބައެއް ހާލަތްތަކުގައި ކަނބަލުން ހަނގުރާމައިގެ މައިދާނުގައި ކީރިތި ރަސޫލުﷲ صلى الله عليه وسلم ގެ ދިފާއުގައި ހަނގުރާމަކުރައްވާފައިވޭ

އިސްލާމިކް މިނިސްޓަރު ޑރ. ޝަހީމް

މިނިސްޓަރު ވިދާޅުވީ އިސްލާމީ ތާރީހަށް ބަލާއިރު،  މިކަންކަން ހިނގާފައި މިވަނީ އިސްލާމީ އުސޫލުތަކުގެ ތެރޭގައި، އަދި އިސްލާމީ އަޚުލާޤުގެ ތެރެއިންކަމަށެވެ. އެހެންކަމުން އިސްލާމީ އަޚުލާޤުގެ ތެރޭގައި ޤާބިލުކަން ހުރި ކޮންމެ ކަނބަލަކަށް މުޖުތަމައަށް ޚިދުމަތްކުރުމަށްޓަކައި ވަޒީރު ކަމާއި، ކައުންސިލްގެ ރައީސްކަމާއި، ކައުންސިލްގެ މެންބަރަކަމުގެ އިތުރުން މޭޔަރަކަށްވެސް ވެވިދާނެކަމަށް ޝަހީމް ވިދާޅުވިއެވެ މީގައި ބަލަން ބޭނުންވަނީ އެމީހަކީ އެކަމަށް ގާބިލް އަދި މަސްއޫލިއްޔަތުތައް އަދާކުރެވޭނެ މީހެއްތޯވެސް މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވީ މިކަންކަމަށް ބަލައި ދެޖިންގެ މީހުންނަށް ތަފާތު ނުވާނޭހެން އަންހެނުންނަށްވެސް އިންތިހާބުތަކުގައި ވާދަކުރެވޭނޭ ކަމަށެވެ.