ފޭސް ތިނަކުން ދޫކުރި ގޯތިތަކުގެ ގުރުއަތުލުމުގެ މަސައްކަތް ފަށައިފި

ބިންވެރިޔާ ސްކީމުގެ ދަށުން ކުރީ ސަރުކާރުން ފަޅުން ދޫކުރި ގޯތިތަކުގެ ތެރެއިން މިހާތަނަށް ބިން ހިއްކި ސަރަހައްދުތަކުން ދޫކޮށްފައިވާ ގޯތިތަކުގެ ގުރުއަތުނެގުމުގެ މަސައްކަތް މިއަދު ފަށައިފިއެވެ.

ގޯތިތައް ލިބިފައިވާ ފަރާތްތަކުގެ މެދުގައި ގުރުއަތުލުން ކުރިއަށްދަނީ ކަލާފާން ސްކޫލް ހޯލުގައެވެ. މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ އިން ބުނީ، ފޭސް ތިނަކުން ދޫކުރި 698 ގޯތީގެ ގުރުއަތުނެގުމުގެ މަސައްކަތް ކުރިއަށްދާއިރު، މީގެ ތެރޭގައި 7 ސައިޒެއްގެ ގޯތި ހިމެނޭކަމަށެވެ.

ހައުސިން މިނިސްޓްރީން ބުނީ، ގޯތިތައް ލިބުނު މީހުންގެ މެދުގައި އަލުން ގުރުއަތުނެގުމަށް ނިންމީ ގޯތިތައް ދޫކުރާ ސަރަހައްދަށް ބަދަލު އައުމާ ގުޅިގެންނެވެ.

ފޭސް ތިނަކުން ދޫކުރާ ގޯތިތަކުގެ ތެރޭގައި ހިމެނެނީ:

- 1650 އަކަފޫޓުގެ 181 ގޯތި

- 2050 އަކަފޫޓުގެ 242 ގޯތި

- 2450 އަކަފޫޓުގެ 132 ގޯތި

- 2850 އަކަފޫޓުގެ 62 ގޯތި

- 3250 އަކަފޫޓުގެ 41 ގޯތި

- 3650އަކަފޫޓުގެ 16 ގޯތި

- 4000 އަކަފޫޓުގެ 24 ގޯތި

ގުރުއަތުލުން ކުރިއަށް ގެންދަނީ ހުޅުމާލެ ތިންވަނަ ފިޔަވަހިން ގޯތި ލިބިފައިވާ ފަރާތްތަކުގެ ތެރެއިން ހޯލަށް ހާޒިރުވާ ފަރާތްތަކުގެ ހާޒިރުގައި މިނިސްޓްރީގެ މުވައްޒަފުންނެވެ. މިގޮތުން، ގުރުއަތުލުން ކުރިއަށްދާއިރު، ގޯތި ލިބޭ ފަރާތްތަކުގެ ތެރެއިން ކޮންމެވެސް އެއް ފަރާތަކަށް ހޯލަށް ވަދެވޭނެ ކަމަށް ބުންޏެވެ. އަދި ހާޒިރުވާއިރު އެ މީހެއްގެ ދިވެހިރައްޔިތެއްކަން އަންގައިދޭ ކާޑު ގެންނަން ވަނީ އެދިފަ އެވެ.