އިންޑިއާ-ނިއުޒިލޭންޑް އެފް.ޓީ.އޭ މަޝްވަރާތަކުގެ ދެވަނަ ބުރު ނިންމާލައިފި
ލިޔުންތެރިޔާ
ސްޓާފް ރައިޓަރ
އިންޑިއާއާއި ނިއުޒިލެންޑާއި ދެމެދު ގާއިމްކުރުމަށް މަސައްކަތްކުރަމުންދާ މިނިވަން ވިޔަފާރީގެ އެއްބަސްވުމުގެ މަޝްވަރާތަކުގެ ދެވަނަ ބުރު ނިންމާލައިފިއެވެ.
މިއެއްބަސްވުމާ ގުޅޭ މަޝްވަރާތަކުގެ ދެވަނަ ބުރު ކުރިއަށް ދިޔައީ އިންޑިއާގެ ވެރިރަށް ނިއުދިއްލީގައި، މިމަހުގެ 14 އިން 25 އަށެވެ. ދެވަނަ ބުރުގެ މަޝްވަރާތަކުގައި މުދަލާއި ޚިދުމަތުގެ އިތުރުން އިންވެސްޓްމަންޓާއި ވިޔަފާރިއަށް މަގުފަހުކުރުމާއި ބެހޭ މަޝްވަރާތައް ކުރިއަށް ދިޔަކަމަށް އިންޑިއާގެ ކޮމާރސް މިނިސްޓްރީއާއި ހަވާލާދީ ރޮއިޓަރސްއިން ރިޕޯޓްކުރިއެވެ.
އެފް.ޓީ.އޭގެ މަޝްވަރާތަކުގެ ތިންވަނަ ބުރު އޮންނާނީ ނިއުޒިލެންޑްގެ ވެރިރަށް ވެލިންޓަންގައެވެ. އޭގެ ކުރިން މަޝްވަރާތަކުގެ ތައްޔާރީތައް ވަރޗުއަލްކޮށް ކުރިއަށްދާނެކަމަށް މައުލޫމާތު ލިބެއެވެ.
ނިއުޒިލެންޑާއެކު އިންޑިއާއިން ގާއިމްކުރާ އެފް.ޓީ.އޭގެ މަޝްވަރާތަކުގެ ދެވަނަ ބުރު ނިންމާލިއިރު، އިންޑިއާއިން އިނގިރޭސިވިލާތާއެކު މިދިޔަ ހަފްތާގައި ވަނީ އެފް.ޓީ.އޭ ގައި ސޮއިކޮށްފައެވެ. އަދި އެމެރިކާއާއި ވިލާތުގެ އިއްތިހާދާއެކުވެސް މިނިވަން ވިޔަފާރީގެ އެއްބަސްވުންތައް ގާއިމްކުރުމަށް އިންޑިއާއިން ދަނީ މަޝްވަރާ ކުރަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
