ބޮޑު އަޣުލަބިއްޔަތަކުން، ރަޝިއާގެ ރައީސްކަމުގެ ފަސްވަނަ ދައުރެއް ޕޫޓިން އަށް ކަށަވަރުވެއްޖެ

ރަޝިއާގެ ރިޔާސީ އިންތިހާބުގައި އެ ގައުމުގެ ރައީސް ވްލަޑިމިއާ ޕޫޓިން އަށް %87.1 ލިބިވަޑައިގެން، އެގައުމުގެ ރައީސް ކަމުގެ ފަސްވަނަ ދައުރަކަށް އިންތިހާބު ވެއްޖެއެވެ.

މި ނަތީޖާ އާއި އެކު ޕުޓިން ވެފައި މިވަނީ، އެގައުމުގެ ރިޔާސީ އިންތިހާބެއްގައި އެންމެ ތަފާތު ބޮޑު ނަތީޖާއަކުން ކާމިޔާބު ކުރެއްވި ފުރަތަމަ ރައީސްއަށެވެ.

މިއީ ރަޝިއާގެ ވެރިކަމާ 1999 ވަނަ އަހަރު ހަވާލުވެވަޑައިގެންނެވި 71 އަހަރުގެ ޕުޓިން ރިޔާސީ އިންތިހާބު ޖެހިޖެހިގެން ކާމިޔާބު ކުރި ފަސް ވަނަ ފަހަރެވެ.

ޕުޓިން އާއި އެކު މި އިންތިހާބުގައި ދެން ވާދަކުރި ތިން ކެނޑިޑޭޓުން ކަމަށްވާ ނިކޮލައި ޚަރިޓޮނޮވް އަށް %4.22 ވޯޓް ލިބުނުއިރު، ލިއޮނިޑް ސްލޫޓްސްކީ އަށް %3.16 އަށް ލިބުމުގެ އިތުރުން ވްލަޑިސްލާވް ޑަވަންކޯވް އަށް ލިބުނީ %4.04 އެވެ.

މި އިންތިހާބުގެ ތެރޭގައި ރަޝިއާގައި ވަނީ ހަމަނުޖެހުންތަކެއް ވެސް ހިނގާފައެވެ. އޭގެ ތެރޭގައި ވޯޓް ފޮށިތަކަށް ފެހި ކުލަ ޖެހުމާއި، ވޯޓްލާ މަރުކަޒުތައް ކައިރި ބަޑި ބޭސް ގޮއްވުން ހިމެނެއެވެ. ނަތީޖާ ސައްހަ ނޫން ކަމަށް ބުނެ އިދިކޮޅުގެ ތާއީދާއި އެކު ހިންގަމުން އައި މި މުޒާހަރާތައް ހުއްޓުވައި، ޖުމްލަ 80 މީހުން އެ ގައުމުގެ ފުލުހުން ހައްޔަރުކޮށްފައިވާ ކަމަށް ރިޕޯޓްތައް ބުނެއެވެ.

ތިން ދުވަހަށް ދެމިގެންދިޔަ މި އިންތިހާބުގެ ވޯޓުލުމަށްފަހު، އިންތިހާބު ކާމިޔާބު ކުރައްވާ ޕުޓިން ވަނީ އޭނާގެ ކާމިޔާބީއަކީ ގައުމު ވަރުގަދަވެ، ފައިދާހުރި ގޮތަކަށް ގައުމުގެ ކަންކަން ކުރިއަށް ގެންދިއުމަށް މަގުފަހިވާނެ ކަމެއް ކަމަށާއި، ޔުކްރޭން ހަނގުރާމަ އަކީ ކޮންމެހެންވެސް ކުރަންޖެހިފައި އޮތް ހަނގުރާމައެއް ކަމަށް ބުނެފައެވެ.