ޕީޖީގެ މަޤާމަށް ބޭފުޅަކު އައްޔަންކުރަން ދައުރުން ބޭރުން ދެ ޖަލްސާއެއް ބާއްވަނީ
ލިޔުންތެރިޔާ
ޚަދީޖާ އަރުފާ
ޕްރޮސެކިއުޓަރ ޖެނެރަލްގެ މަޤާމަށް އަލުން ބޭފުޅަކު އައްޔަންކުރުމަށް ދައުރުން ބޭރުން ދެ ޖަލްސާއެއް ބާއްވަން ރައްޔިތުންގެ މަޖިލީހުން ނިންމައިފިއެވެ.
މަޖިލީހުގެ މި ދައުރުގެ ފަހު ޖަލްސާ ބާއްވާފައިވަނީ ރޭގައެވެ. އެ ޖަލްސާގައި، ޕްރޮސެކިއުޓަރ ޖެނެރަލްގެ މަގާމުގައި ހުންނެވި ޙުސައިން ޝަމީމް އެ މަގާމުން ވަކިކުރަން ވަނީ ފާސްކޮށްފައެވެ. އެގޮތުން، ޝަމީމު މަގާމުން ވަކިކުރުމަށް ފެންނަކަމަށް 65 މެމްބަރުން ވޯޓުދެއްވިއެވެ. ވަކިކުރަން ނުފެންނަކަމަށް ވޯޓުދެއްވީ 9 މެމްބަރުންނެވެ.
ޤާނޫނުގައި ބަޔާންކޮށްފައިވާ ގޮތުން، ޕްރޮސިކިއުޓަރ ޖެނެރަލްގެ މަޤާމު އެއްވެސް ޙާލަތެއްގައި ހުސްވެއްޖެނަމަ، މަޤާމު ހުސްވާތާ އެންމެ ލަސްވެގެން ތިރީސް ދުވަހުގެ ތެރޭގައި އެ މަޤާމަށް މީހަކު ޢައްޔަންކުރަންވާނެއެވެ.
މިކަން ފާހަގަކުރައްވައި، ރައްޔިތުންގެ މަޖިލީހުގެ މި ދައުރުގެ އެންމެ ފަހު ޖަލްސާގެ ރިޔާސަތު ބެލެހެއްޓެވި މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވީ އައު ޕީޖީއެއް އައްޔަނު ކުރުމުގެ މަސައްކަތް ކުރިއަށް ގެންދިޔުމަށް ދައުރުން ބޭރުގައި ދެ ޖަލްސާއެއް ބާއްވަންޖެހޭނެކަމަށެވެ.
."ޕްރޮސިކިއުޓަރ ޖެނަރަލްގެ މަގާމު ހުސްވެއްޖެނަމަ، އެ މަގާމަށް އާ ބޭފުޅަކު 30 ދުވަހުގެ ތެރޭގައި އައްޔަން ކުރަން ޖެހޭކަމަށް ޕްރޮސިކިއުޓާ ޖެނަރަލްގެ ގާނޫނުގައި ބަޔާންކޮށްފައިވޭ. އެހެންނަމަވެސް އަޅުގަނޑުމެން ރިސެސްއަށް ދާތީވެ، ދައުރުން ބޭރުގައި ދެ ޖަލްސާއެއް ބާއްވަންޖެހޭނެ ޕްރޮސެކިއުޓަރ ޖެނެރަލް އައްޔަން ކުރެއްވުމަށްޓަކައި. އެއީ ރައީސުލްޖުމްހޫރިއްޔާ ނަންފުޅު ފޮނުއްވުމުން އިއްވަން ބާއްވާ ޖަލްސާ އާއި ދެން ނަންފުޅު ކޮމިޓީއަށް ފޮނުވުނީމަ، ކޮމިޓީން ނިންމާފަ އެންގުމުން ނަންފުޅު ފާސްކުރުމަށް ބާއްވާ ޖަލްސާ"
މަޖިލީހުގެ ނައިބު ރައީސް އަޙްމަދު ނާޒިމް
ނާޒިމް ވިދާޅުވީ ދައުރުން ބޭރުން ޖަލްސާ ބޭއްވުމުގެ 3 ދުވަސް ކުރިން މެމްބަރުންނަށް ނޯޓިސް ފޮނުއްވާނެކަމަށެވެ.
ޕްރޮސެކިއުޓަރ ޖެނެރަލްގެ މަގާމުން ޝަމީމް ވަކިކުރުމުގެ މައްސަލަ ރައްޔިތުންގެ މަޖިލީހަށް ހުށަހެޅުއްވީ، ހުޅުދޫ ދާއިރާގެ މެމްބަރު މުޙައްމަދު ޝާހިދެވެ. މިމައްސަލަ ޖުޑީޝަރީ ކޮމިޓީގައި ދިރާސާކޮށް ޖަވާބުދާރީވުމުގެ ފުރުސަތު ޝަމީމަށްދިނުމަށްފަހު ކޮމެޓީން ވަނީ، ޝަމީމް މަގާމުން ވަކިކުރަން ފާސްކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
