ޕޮލިސް ކޮމިޝަނަރުކަން ވަގުތީގޮތުން ޑީސީޕީ ފިކުރީއަށް!
ލިޔުންތެރިޔާ
އަބްދުﷲ ހުސައިން
ޕޮލިސް ކޮމިޝަނަރަކަށް ހުންނެވި އަލީ ޝުޖާއު މަޤާމުން އިސްތިއުފާދެއްވުމުން އެމަޤާމަށް ޑެޕިއުޓީ ކޮމިޝަނަރަކަށް ހުންނެވި ފަރުހާދު ފިކުރީ ހަމަޖައްސަވައިފިއެވެ.
ސީޕީކަމުގެ މަޤާމަށް ވަގުތީގޮތުން ފަރުހާދު އައްޔަނުކުރެއްވިކަން ހޯމް މިނިސްޓަރު އަލީ އިހްސާން ވަނީ އެކްސްގައި ކުރެއްވި ޕޯސްޓެއްގައި ޔަޤީންކޮށްދެއްވާފައެވެ. ފަރުހާދު އެމަޤާމަށް އައްޔަނުކޮށްފައިމިވަނީ ވަގުތީ ގޮތުންނެވެ.
ހޯމް މިނިސްޓަރު އަލީ އިހްސާން ވިދާޅުވީ، ކަމިޝަނަރ އޮފް ޕޮލިސް ޢަލީ ޝުޖާޢު އެމަޤާމުން މިއަދު އިސްތިއުފާ ދެއްވުމާއި ގުޅިގެން ޤާނޫނުގައިވާ ގޮތުގެ މަތިން ކަމިޝަނަރ އޮފް ޕޮލިސްގެ މަސްއޫލިއްޔަތު ވަގުތީގޮތުން އަދާކުރައްވަން ޑެޕިއުޓީ ކަމިޝަނަރ އޮފް ޕޮލިސް ފަރުހާދު ފިކުރީ ކަނޑައަޅަޅުއްވާފައިވާ ކަމަށެވެ.
ޑެޕިއުޓީ ކޮމިޝަނަރ އޮފް ޕޮލިސްގެ މަގާމަށް މީގެ ކުރިން ފަރުހާދު އައްޔަނުކުރެއްވީ، 2024 ވަނަ އަހަރުގެ ފެބުރުއަރީމަހުގެ 16 ވަނަ ދުވަހުއެވެ. އޭނާ ދިވެހި ފުލުހުންގެ ޚިދުމަތާ ގުޅިވަޑައިގެންނެވީ 1991 ވަނަ އަހަރުގެ މާޗްމަހުގެ 30 ވަނަ ދުވަހުއެވެ. ފަރުހާދު ވަނީ މީގެ ކުރިން ހެޑް އޮފް އޮޕަރޭޝަނަލް ސަޕޯޓް ކޮމާންޑް އަދި ޕީޕަލްސް ޑައިރެކްޓްރޭޓްގެ އެކްޓިންގ ހެޑްގެ މަޤާމު ފުރުއްވާފައެވެ.
ކޮމިޝަނަރ އޮފް ޕޮލިސްގެ މަޤާމުން މިއަދު ޝުޖާއު އިސްތިއުފާ ދެއްވާފައިވަނީ، ހައްވާ ޔުމްނު ރަޝީދު (ޔުމްނު) ވެއްޓުނު މައްސަލާގައި ފުލުހުން ކުރަމުންްގެންދާ ތަހްޤީޤަށް އާއްމުންގެ ގިނަ ބައެއްގެ ފަރާތުން ފާޑުކިއުންތައް އަމާޒުވެފައިވަނިކޮށެވެ. ރައީސުލްޖުމްހޫރިއްޔާ ވަނީ ޝުޖާޢުގެ އިސްތިއުފާ ޤަބޫލުފުޅު ކުރައްވާފައެވެ.
އުމުރުން 21 އަހަރުގެ ޔުމްނު ވެއްޓުނުކަމަށް މައުލޫމާތު ލިބިފައިވަނީ އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށެވެ. ޔުމްނުގެ ހާދިސާ ތަހްޤީޤް ކުރުމަށް ފުލުހުން އިހުމާލުވަމުންދާކަމަށްބުނެ ބައެއް ފަރާތްތަކުގެ ފާޑިއުންތައް ފުލުހުންނަށް އަމާޒުވެފައިވާއިރު، އެކަމާ ގުޅިގެން މުޒާހަރާތަކެއްވެސް ވަނީ ފަށާފައެވެ. މި މުޒާހަރާގެ ތެރޭގައި ސީޕީ އިސްތިއުފާ ދިނުމަށް ގޮވާލާފައިވާއިރު، ޔުމްނުގެ ތަހްޤީޤުގައި ފުލުހުން ބައެއް ކަންކަން ސިއްރުކުރަމުންދާކަމަށްވެސް އެފަރާތްތަކުން ވަނީ ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
