މިއީ އެމްޑީޕީއަށް އުނދަގޫ ދުވަސްތަކެއް؛ ނަމަވެސް މިކަމުން އަރައިގަނެވޭނެ: ރައީސް ނަޝީދު

އެމްޑީޕީ މިވަގުތު ދަތި ދުވަސްތަކެއް ތަޖުރިބާ ކުރަމުންދާ ކަމަށާއި، އެހެންނަމަވެސް މި ހާލަތުން އެމްޑީޕީ އަރައިގަންނާނެ ކަމާމެދު އެއްވެސް ޝައްކެއް ނުކުރައްވާ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ނަޝީދު އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ، އެމްޑީޕީއަށް ކުރިމަތިވެފައިވާ ޙާލަތުން އަރައިގަތުމަށް އެންމެ މުހިންމީ ޕާޓީގެ އެއްބައިވަންތަކަން ކަމަށް މިއަދު އެމްޑީޕީގެ ގިނަ މެންބަރުން ބުނަމުންދާ ކަމަށެވެ.

މިކަމާ ގުޅުވައި ރައީސް ނަޝީދު ވަނީ 1933 ވަނަ އަހަރު ހިނގާދިޔަ "މޯޓަރު ބޯޓުގެ ގަޑުބަޑު" ގެ ހާދިސާގައި، އަމީން ދީދީ ވިދާޅުވެފައިވާ ބަސްފުޅެއްގެ ހަނދުމައައުކުރައްވާފައެވެ.

އެގޮތުން އަމީން ދީދީ އެދުވަހު ވިދާޅުވެފައިވަނީ، އެންމެ މުހިންމީ ކެބިނެޓުގެ އެއްބައިވަންތަކަން ކަމަށާއި، ކެބިނެޓުގެ އެކަކަށް ލިބޭ ގެއްލުމެއް އަނެކަކަށް ވެސް ލިބެންޖެހޭނެ ކަމަށެވެ.

އަދި އެކަންތައް ހިނގާދިޔަ ގޮތާ ގުޅޭގޮތުން ރައީސް ނަޝީދު ވިދާޅުވީ، ފަހުން ދެ ފަރީދާއި އަމީން ދޫކޮށް އެންމެންނަށް ޖެހުނީ މޯޓަރު ބޯޓުގައި "ކޮޅުނބަށް" ދާން ކަމަށެވެ. އެދުވަހު ކެބިނެޓު އެއް އަހަރު އެތަނުގައި ތިބި އިރު، ދަރަވަންދޫގޭ ޙުސައިން ޞަލާޙުއްދީން ލިޔުއްވި ޅެން ބައިތެއް މިވަގުތަށް މުނާސަބު ކަމަށް ވެސް ރައީސް ނަޝީދު ވިދާޅުވިއެވެ.

"އުނިކަން ނުވާ މާތް ދޫފުޅުން، އެދުވަހު ވިދާޅުވީ، ޔުނިޓީ އަކީ ފަހެ ޙަސަދަޔާ، މަކަރަށް ނުވާނެ ބާ؟"

2023 ވަނަ އަހަރުގެ ރިޔާސީ އިންތިޚާބުގެ ކުރީން އެމްޑީޕީގެ އެތެރޭގައި އުފެދުނު ޚިޔާލުތަފާތުވުންތަކާއެކު ޕާޓީ ދެ ފެކްޝަނަކަށް ބެހިގެންދިޔައެވެ. ފެކްޝަނުގެ އެއްފަރާތުގައި ކުރީގެ ރައީސް އިބްރާހީމް މުހައްމަދު ޞާލިޙު ހުންނެވިއިރު، އަނެއް ފަރާތުގައި ހުންނެވީ ނަޝީދެވެ.

އެ ކޯޅުމުގެ ތެރެއިން ނަޝީދުގެ ފެކްޝަނުގެ މެންބަރުން ޕާޓީ ދޫކޮށް އައު ޕާޓީއެއްވެސް ހެދިއެވެ. ނަމަވެސް މި އަހަރުގެ ތެރޭގައި، އެ ޕާޓީގެ މެމްބަރުން އަލުން އެމްޑީޕީއާ ވަނީ ގުޅިފައެވެ. އެ ގުޅުނު ފަހުންވެސް ޕާޓީގެ އެތެރޭގައި ހަލަބޮލިކަން ކުޑަ ނުވާކަން ފާހަގަކޮށްލަންޖެހެއެވެ.