އީޔޫއިން ރާއްޖޭގެ ޑިމޮކްރަސީއަށްޓަކައި ކުރިކަންކަމަށް ދިވެހިން ޝުުކުރުވެރިވޭ: ޝާހިދު

އީޔޫގެ ފަރާތުން ރާއްޖޭގެ ޑިމޮކްރަސީއަށްޓަކައި ކުރި ކަންކަމަށްޓަކައި ދިވެހިން ޝުކުރުވެރިވާކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

އެބޭފުޅާ މިހެން ވިދާޅުވީ މިއަދު ކުރުނބާ މޯލްޑިވްސްގައި ފެށުނު "ހަތަރު ވަނަ އީޔޫ-މޯލްޑިވްސް ޕޮލިސީ ޑައިލޮގް" ފެށުމުގެ ގޮތުން ވާހަކަ ދައްކަވަމުންނެވެ.

ޝާހިދު ވިދާޅުވީ ފަހުގެ ތާރީޚުގައި އީޔޫއާއި އީޔޫގެ މެންބަރު ގައުމުތަކުން ރާއްޖޭގެ ޑިމޮކްރަސީއަށްޓަކައި ކުރިކަންކަމަށް ދިވެހިން ޝުކުރުވެރިވާ ކަމަށެވެ. އެގޮތުން ޑިމޮކްރަސީގެ މަގުން ރާއްޖެ ކައްސާލާހިނދު، އީޔޫއިން ކުރި މަސައްކަތުގެ ސަބަބުން ރާއްޖޭގެ ޑިމޮކްރަސީ ހަރުދަނާވެފައިވާކަމަށް މިނިސްޓަރ ޝާހިދު ފާހަގަކުރެއްވިއެވެ.

އެބޭފުޅާގެ ވާހަކަފުޅުގައި ވަނީ ރާއްޖެ އާއި އީޔޫއާ ދެމެދު އޮންނަނީ ލާމަސީލު ގުޅުމެއްކަމަށް ފާހަގަކުރައްވާފައެވެ. އެގޮތުން ވަރަށް ގިނަ ދާއިރާތަކަކުން ރާއްޖެއަށް އީޔޫގެ އެއްބާރުލުން ލިބޭ ކަމަށް މިނިސްޓަރ ވިދާޅުވިއެވެ.

އެގޮތުން މޫސުމަށް އަންނަ ބަދަލުތަކަށް ހޭލުންތެރިކުރުވާ އެ ބަދަލުތަކުން ލިބޭ ގެއްލުން ކުޑަކުރުމާއި ނިރުބަވެރިކަމާއި ހަނގުރާމަ ކުރުމުގެ ދާއިރާއިން އީޔޫ އާއި ރާއްޖޭން ގުޅިގެން މަސައްކަތް ކުރަމުން އަންނަ ކަމަށް ޝާހިދު ވިދާޅުވިއެވެ.

މިއަހަރުގެ ޑައިލޮގްގައި މަޝްވަރާކުރެވޭނެ މައިގަނޑު ދާއިރާތަކަކީ ތަރައްޤީގެ ދާއިރާގައި އެއްބާރުލުން ދިނުން، ޑިމޮކްރަސީ، ގަވަރނަންސް، އިންސާނީ ހައްޤުތައް، މޫސުމީ ބަދަލުތައް އަދި ސަލާމަތީ ދާއިރާގައި އެއްބާރުލުން އިތުރުކުރުމެވެ.

ޕޮލިސީ ޑައިލޮގްގައި ބައިވެރިވެވަޑައިގަންނަވާ އީޔޫ ވަފުދުގެ އިސްބޭފުޅަކަށް ހުންނަވާނީ އީޔޫއަށް ރާއްޖެއަށް ކަނޑައަޅުއްވާފައި ހުންނަވާ ސަފީރު ޓުން ލައި މާރގް އެވެ. އީޔޫގެ ވަފުދުގައި ދެން ހިމެނިވަޑައިގަންނަވަނީ ޔޫރަޕިއަން ޔޫނިއަން، ފްރާންސް، ޖަރމަނީ، ނެދަލެންޑްސް، އޮސްޓްރިއާ، ޗެކް ރިޕަބްލިކް، ސްވިޑްން، ޕޮލެންޑް، ރޮމޭނިއާ، އިޓަލީ އަދި ޔުނައިޓެޑް ކިންގްޑަމްއިން ރާއްޖެއަށް ކަނޑައަޅާފައިވާ މިޝަންތަކުގެ ހެޑް އޮފް މިޝަންސް ނުވަތަ ޑެޕިއުޓީ ހެޑް އޮފް މިޝަންސްއެވެ.

ދިވެހިރާއްޖޭގެ ވަފުދުގައި އިސްކޮށް ހުންނަވާވީ މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދެވެ. މީގެ އިތުރުން މިނިސްޓަރ އޮފް ފައިނޭންސް، މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ، މިނިސްޓަރ އޮފް ޓުއަރިޒަމް، މިނިސްޓަރ އޮފް އިކޮނޮމިކް ޑިވެލޮޕްމަންޓް، މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ، މިނިސްޓަރ އޮފް އެންވާރަމެންޓް އަދި މިނިސްޓަރ އޮފް ހޯމްގެ އިތުރުން ސަރުކާރުގެ އެހެން ބައެއް އިސް ބޭފުޅުން ދިވެހި ވަފުދުގައި ހިމެނިވަޑައިގަންނަވައެވެ.