އިންޑިއާގެ އަސްކަރިއްޔާއަށް ގިނަ އަދަދެއްގެ ހެލިކޮޕްޓަރު ގަންނަނީ

އިންޑިއާގެ އަސްކަރިއްޔާގައި ބޭނުންކުރާ އުޅަނދުތައް އައުކުރުމަށް އެގައުމުން ކުރަމުންދާ މަސައްކަތުގެ ދަށުން، 156 ހެލިކޮޕްޓަރު ގަތުމުގެ އެއްބަސްވުމެއްގައި ސޮއިކޮށްފިއެވެ.

އިންޑިއާގެ ޑިފެންސް މިނިސްޓްރީއިން ބުނީ މި ހެލިކޮޕްޓަރުތަކުގެ އަގު 7.3 ބިލިއަން އެމެރިކާ ޑޮލަރަށް އަރާކަމަށެވެ. ދެ އިންޖީނުލީ 'ޕްރަޗާންދް' ނަމަކަށް ކިޔާ މި ހެލިކޮޕްޓަރު އުފައްދަނީ އިންޑިއާގެ ހިންދުސްތާން އެއަރޮނޮޓިކްސް ލިމިޓެޑުންނެވެ. މި ހެލިކޮޕްޓަރުގައި އަޅުވަނީ ފަރަންސޭސީވިލާތުގެ ސަފްރާން މަރުކާގެ އިންޖީނެވެ. އަދި މި ހެލިކޮޕްޓަރުތަކަށް 5 ހާސް މީޓަރަށްވުރެ މަތިން އުދުހުމުގެ ގާބިލްކަން ލިބިގެންވެއެވެ.

އަސްކަރިއްޔާ 'ޒަމާނީ' ކުރުމުގެ މަސައްކަތް އިންޑިއާއިން ކުރަމުންދާއިރު، އެގައުމުން އިސްކަންދެނީ އަމިއްލަ ގައުމުގައި އުފައްދާ އަސްކަރީ އުޅަނދުތަކަށެވެ. އޭރުން އިންޑިއާގެ އަމިއްލަ އަސްކަރީ އުފެއްދުންތެރިކަމުގެ ގާބިލްކަން އިތުރުވެ، ދުނިޔޭގެ ސަޕްލައި ޗެއިންއަށް އަރާ ލޮޅުންތަކުގެ ސަބަބުން އެގައުމުން އޯޑަރުދޭ އުޅަނދުފަހަރު ޑެލިވަރކުރުމަށް ބުރޫ ނާރާނެތީއެވެ.

އަލަށް އޯޑަރު ދިން ހެލިކޮޕްޓަރުތަކުގެ ތެރެއިން 66 ހެލިކޮޕްޓަރު ހޯދަނީ އިންޑިއާގެ ވައިގެ ސިފައިންނަށެވެ. އަދި އަނެއް 90 ހެލިކޮޕްޓަރު ހޯދަނީ އެގައުމުގެ އެއްގަމު ސިފައިންގެ ބޭނުމަށެވެ. ހެލިކޮޕްޓަރުތައް ޑެލިވަރކުރަން ފަށާނީ 3 އަހަރު ފަހުންނެވެ