ސީއެޗްއެސްއީގެ ކުރީގެ އިމާރާތުގައި އަލުން އޭލެވެލް ކިޔަވައިދޭން ފަށަނީ

މާލޭގައި ހުރި ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީއެޗްއެސްއީ) ގެ ކުރީގެ އިމާރާތުގައި އަލުން އޭލެވެލް ކިޔަވައިދިނުމުގެ އިންތިޒާމް ހަމަޖެހިގެންދާނެ ކަމަށް ތައުލީމާއި ބެހޭ ވަޒީރު އިސްމާއީލް ޝަފީއު ވިދާޅުވެއްޖެއެވެ.

ވަޒީރު ޝަފީއު ފޭސްބުކްގައި ކުރެއްވި ޕޯސްޓެއްގައި ވިދާޅުވީ، މާލެއަކީ ދިވެހިރާއްޖޭގައި އެންމެ ގިނަ ދަރިވަރުން ކިޔަވަމުންދާ ރަށް ކަމަށާއި، މި އަހަރުވެސް މާލޭގައި ގްރޭޑް 10 ގައި 1700 ދަރިވަރުން ތައުލީމު ހާސިލް ކުރަމުންދާ ކަމަށެވެ.

އެހެންކަމުން، މާލޭގައި އޭލެވެލް ކިޔަވައިދޭނެ ސަރުކާރުގެ ސްކޫލެއް ނެތުމަކީ އެކަމުގެ ދަތިކަން ގިނަ ދަރިވަރުންނަށާއި ބެލެނިވެރިންނަށް ފޯރަމުންދާކަމެއްކަން ފާހަގަކުރައްވާ ވަޒީރު ޝަފީއު ވިދާޅުވީ، މިކަމަށް ހައްލެއް ހޯދައިދިނުމުގެ ގޮތުން މިއަންނަ ސެޕްޓެމްބަރު މަހު އޭލެވެލް ކިޔެވުން ފެށުމުގެ ކުރިން، ކުރީގެ ސީއެޗްއެސްއީ އިމާރާތުގައި އޭލެވެލް ކިޔެވެމުގެ އިންތިޒާމު ހަމަޖަހިގެން ދާނެ ކަމަށެވެ.

"މިކަމަށް ހައްލެއް ހޯދައިދިނުމުގެ ގޮތުން މިއަންނަ ސެޕްޓެމްބަރު މަހު އޭލެވެލް ކިޔެވުން ފެށެންވާއިރަށް ކުރީގެ ސީ.އެޗް.އެސް.ސީގެ އިމާރާތުގައި އޭލެވެލް ކިޔެވެމުގެ އިންތިޒާމު ހަމަޖަހިގެން ދާނެވާހަކަ ދަންނަވަމެވެ."

ވަޒީރު ޝަފީއުގެ ޕޯސްޓްގައި ވިދާޅުވިއެވެ.

ވަޒީރު ޝަފީއު ވިދާޅުވީ، ސަރުކާރުގެ އޭލެވެލް ސްކޫލެއް މާލޭގައި ހުޅުވުމުން، މާލެއިން ހުޅުމާލެއަށް ދަތުރުކުރާ އޭލެވެލް ދަރިވަރުންގެ އަދަދު މަދުވާނެ ކަމަށާއި، ގާތުން ތައުލީމު ފޯރުކޮށްދިނުމުގެ ސިޔާސަތު ތަންފީޒު ކުރެވި، އޭލެވެލްގެ ތައުލީމަށް ސަރުކާރުން ކުރާ ހޭދަވެސް މީހާރަށްވުރެ ކުޑަކުރެވޭނެ ކަމަށެވެ.

މިކަމުގެ ސަބަބުން، މިހާރު ހުޅުމާލޭގައި ގާއިމު ކުރެވިފައިވާ ސީއެޗްއެސްއީ އަށް އެއްވެސް ބަދަލެއް ނާންނާނެ ކަމަށް ވެސް ވަޒީރު ޝަފީއު ވިދާޅުވިއެވެ.

1979 ވަނަ އަހަރު ހުޅުވި ސީއެޗްއެސްއީ ހުޅުމާލެ އަށް ބަދަލުކުރަން ނިންމީ 2020 ވަނަ އަހަރުއެވެ. ސީއެޗްއެސްއީ ގެ ކުރީގެ އިމާރާތް ހުރި ބިން އަމީނިއްޔާ ސްކޫލަށް ދީފައިވާއިރު، 2023 ވަނަ އަހަރުން ފެށިގެން ސީއެޗްއެސްއީ ހިންގަމުން އަންނަނީ ހުޅުމާލޭގެ ފުރަތަމަ ފިޔަވަހީގައެވެ.