ރައީސް މުޢިއްޒު ބައިވެރިވެވަޑައިގަންނަވާ, ޕީއެންސީ ހަރުގެ ޖަލްސާއެއް މިރޭ

ވެރިކަންކުރާ ޕީއެންސީގެ ލީޑަރ، އަދި އެޕާޓީގެ ރައީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބައިވެރިވެވަޑައިގަންނަވާ ޕީއެންސީ ހަރުގެ ޖަލްސާއެއް މިރޭ އޮންނާނެ ކަމަށް އެ ޕާޓީން ބުނެފިއެވެ.

ޕީއެންސީން އެކްސްގައި ކުރި ޕޯސްޓެއްގައި ބުނެފައިވާގޮތުން މި ޖަލްސާ އޮންނާނީ އެޕާޓީގެ ރަސްމީ ޖަގަހަ (ހ. ވެޔޮވިލާ، އާޓިފިޝަލް ބީޗް ކުރިމަތި)ގައި ކަމަށެވެ.

މި ޖަލްސާ މިރޭ 8:00 ގައި ފެށުމަށް ހަމެޖެހިފައިވާ ހަރުގެ ޖަލްސާގައި ރައީސް މުއިއްޒު ވާހަކަދައްކަވާ ގޮތަށްވެސް ހަމަޖެހިފައިބާ ކަމަށް ބުނެފައިވެއެވެ.

އޭގެ އިތުރުން މި ޖަލްސާގައި ދެން ވާހަކަ ދެއްވުމަށް ހަމަޖެހިފައިވަނީ އިނގުރައިދޫ ދާއިރާގެ މެމްބަރު އަދި ޕީއެންސީގެ ޕީޖީ ލީޑަރު އިބުރާހިމް ފަލާހުއާއި، ފިޝަރީޒް މިނިސްޓަރު އަހުމަދު ޝިޔާމްއެވެ.

މިރޭ ޕީއެންސީގެ ޖަގަހަ ޖަލްސާއެއް ބޭވުމަށް ހަމަޖައްސާފައިވާއިރު، ރާއްޖޭގެ އިގްތިސާދީ އަދި މާލީ ހާލަތާއި ގުޅޭގޮތުން، އިދިކޮޅު އެމްޑީޕީ އަދި އެނޫންވެސް ޕާޓީތަކުން އަންނަނީ ކަންބޮޑުވުން ފާޅުކުރަމުންނެވެ.

ޚާއްސަކޮށް، އަދި ޑޮލަރުގެ ތާށިކަން އިންތިހާއަށް މަތިވެ، ބޭންކު އޮފް މޯލްޑިވްސްއިން އިއްޔެ އެ ބޭންކުގެ ފައިސާ ޑެބިޓް ކާޑުތަކަށް ޑޮލަރ ވިއްކުން ހުއްޓާލަން އިއުލާން ކުރުމާއި ގުޅިގެން ގިނަބައެއްގެ ނުރުހުން ސަރުކާރަށް އަމާޒުވިއެވެ. އެހެންނަމަވެސް ހަމަ އިއްޔެ ބޭންކުން ވަނީ އެމްއެމްއޭގެ އިރުޝާދުގެމަތިން އެނިންމު އަނބުރާ ގެންގޮސްފައެވެ.