ލޯނު ނުދައްކައިގެން ބީއެމްއެލުން މާލެއިން ގޯއްޗެއް ވިއްކާލަނީ

ބޭންކް އޮފް މޯލްޑިވްސް އިން ނަގާފައިވާ ލޯނަކަށް ފައިސާ ނުދައްކައިގެން މާލެއިން ގޯއްޗެއް ވިއްކާލުމަށް ބޭންކުން އިއުލާނުކޮށްފިއެވެ.

ބީއެމްއެލުން ވިއްކާލުމަށް ނިންމާފައިވަނީ، މ.ބީޗްކޯނަރ އެވެ. މި ގެއަކީ 927.33 އަކަފޫޓުގެ ގޯއްޗެކެވެ. ސިވިލްކޯޓުން ވަނީ ބީއެމްއެލަށް އެ ގެ ވިއްކާލުމުގެ ހުއްދަ މިއަހަރުގެ އޭޕްރިލްމަހު ދީފައެވެ.

ބީޗް ކޯނަރ ނީލަމުގެ އުސޫލުން ވިއްކާލުމަށް އިއުލާނުކޮށްފައިވާއިރު، އެ ގެ ގަތުމަށް ހުށަހެޅޭނެ އެންމެ ދަށް އަގެއްގެ ގޮތުގައި ހަމަޖައްސާފައިވަނީ، 21،888،429 މިލިއަން ރުފިޔާއެވެ. ބީއެމްއެލުން ބުނީ، އެ ގެ ގަތުމަށް ޝައުގުވެރިވާ ފަރާތްތަކުން މިހިނގާ އޮގަސްޓްމަހުގެ 26 ވަނަ ދުވަހުގެ މެންދުރު 12 ގެ ކުރިން ބޭންކަށް ހުށަހަޅަންޖެހޭނޭކަމަށެވެ.

ނީލަމުގެ ކަންކަން ކުރިއަށްގެންދިއުމަށް ނިންމާފައިވަނީ ހުށަހަޅާ ފަރާތްތަކުގެ ހާޒިރުގައި އެންމެ މަތީ އަގެއް ހުށަހަޅާ ފަރާތަކަށެވެ. ނީލަން ކާމިޔާބުކުރާ ފަރާތުން 10 ދުވަހުގެ ތެރޭގައި ފައިސާ ދައްކަން ޖެހޭއިރު، ކަނޑައެޅިފައިވާ ތާރީހަށް ނުދައްކައިފިނަމަ، ދެވަނައަށް އެންމެ މަތީއަގު ހުށަހެޅި ފަރާތަށް ނީލަން ނިންމާލުމުގެ ނުވަތަ އަލުން ނީލަން ފެށުމުގެ އިހުތިޔާރު ބީއެމްއެލަށް ލިބިގެންވެއެވެ.

ބީއެމްއެލުން ބުނީ އެ ގެ ގަތުމުގެ ނީލަމުގައި ބޭންކްގެ ބޯޑް ޑިރެކްޓަރަކަށް ނުވަތަ އެއްވެސް މުއައްޒަފަކަށް ނުވަތަ އާއިލާގެ އެއްވެސް ފަރާތަކަށް ނީލަމުގައި ބައިވެރި ނުވެވޭނޭކަމަށެވެ. އަދި ބޭންކް ހިއްސާވާ ފަރާތެއްގެ ކުންފުންޏަކުން ބިޑަށް ހުށަހަޅާ ނަމަ އެކަން ތަފްސީލުކޮށް ބިޑް ހުށަހަޅާއިރު އެކަން ލިޔެކިޔުމުން އަންގަން ޖެހޭނޭކަމަށެވެ.

ބީއެމްއެލުން ވަނީ މީގެ ކުރުިންވެސް ލޯނު ނުދެއްކުމުގެ މައްސަލަތަކުގައި ގޯތި ވިއްކުމުގެ މުއާމަލާތް ކުރިއަށްގެންގޮސްފައެވެ.