ޓްރަމްޕް ސަލާމަތުން ހުރީތީ އުފާކުރަން: މޯދީ
ލިޔުންތެރިޔާ
އަޙްމަދު އާހިލް ސަޢީދު
އެމެރިކާގެ ރައީސް ޑޮނަލްޑް ޓްރަމްޕަށް އަމާޒުކޮށް ދިން ހަމަލާއި ގުޅިގެން، ޓްރަމްޕް ސަލާމަތުން ހުންނެވުމުން އުފާކުރައްވާ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.
މި ހާދިސާ ހިނގާފައިވަނީ ވޮޝިންގްޓަން ހިލްޓަން ހޮޓަލުގައި ބޭއްވި "ވައިޓް ހައުސް ކޮރެސްޕޮންޑެންޓްސް" ހަފުލާގައެވެ.
ބޮޑުވަޒީރު މޯދީ އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޓްރަމްޕާއި، އަނބިކަނބަލުން މެލަނިއާ ޓްރަމްޕްގެ އިތުރުން ނައިބު ރައީސް ޖޭޑީ ވެންސް އެއްވެސް ގެއްލުމެއް ނުލިބި ސަލާމަތުން ތިއްބެވިކަން އެނގުމުން ހިތްހަމަޖެހުން ލިބިވަޑައިގެންފައިވާ ކަމަށެވެ. އަދި އެބޭފުޅުންގެ ސަލާމަތާއި ދުޅަހެޔޮކަމަށް އެދިވަޑައިގަންނަވާ ކަމަށްވެސް މޯދީ ވިދާޅުވިއެވެ.
މޯދީގެ ޕޯސްޓް
ޑިމޮކްރަސީއެއްގައި އަނިޔާވެރިކަމަށް އެއްވެސް ޖާގައެއް ނެތްކަން ފާހަގަކުރައްވަމުން، މިފަދަ އަމަލުތައް ހަރުކަށި އިބާރާތުން ކުށްވެރިކުރަންޖެހޭ ކަމަށް ބޮޑުވަޒީރު މޯދީ ވިދާޅުވިއެވެ. މިއީ 2024 ވަނަ އަހަރުން ފެށިގެން ރައީސް ޓްރަމްޕަށް އަމާޒުކޮށް ދެވުނު މިފަދަ ތިންވަނަ ހަމަލާއެވެ.
ހަތިޔާރު އެޅި މީހަކު ހޮޓަލުގެ ލޮބީ ތެރެއަށް ވަދެ، ހަފުލާ ކުރިއަށްދިޔަ ހޯލާ ދިމާލަށް ބަޑިން ހަމަލާދޭން ދަނިކޮށް ސީކްރެޓް ސާވިސްގެ އޭޖެންޓުން ވަނީ އެމީހާ އަތުލައިގަނެ ހައްޔަރުކޮށްފައެވެ. މި ހާދިސާގައި އޭނާގެ ބަޑި ޖަހައި އެއް އޮފިސަރަކު ޒަހަމްކޮށްފައިވާއިރު އިތުރު އެއްވެސް ބޭފުޅަކަށް އަނިޔާއެއް ލިބިފައެއް ނުވެއެވެ.
ހާދިސާއަށްފަހު ރައީސް ޓްރަމްޕް ވަނީ ސީކްރެޓް ސާވިސްއާއި ގާނޫނު ތަންފީޒުކުރާ އިދާރާތަކުން ދެއްކި ހިތްވަރަށް ތައުރީފު ކުރައްވާފައެވެ. އަދި ހަމަލާދިން މީހާ މިހާރު ހުރީ ފުލުހުންގެ ބެލުމުގެ ދަށުގައި ކަމަށާއި، ތަހުގީގު ކުރިއަށްދާ ކަމަށް އެމެރިކާގެ ކަމާބެހޭ ފަރާތްތަކުން ވަނީ ބުނެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
