ކައުންސިލް އިދާރާގެ އައު އިމާރާތް އަޅާނެ ރަށްތައް ކަނޑައަޅާނެ މިންގަނޑު އާންމުކޮށްފި
ލިޔުންތެރިޔާ
ޚަދީޖާ އަރުފާ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރެއްވި ގޮތަށް 50 ރަށެއްގައި ކައުންސިލް އިދާރާ އިމާރާތް ކުރުމުގެ މަޝްރޫއު ކުރިއަށް ގެންދިއުމަށް، ރަށްތައް ކަނޑައަޅާނެ ގޮތުގެ މިންގަނޑެއް ލޯކަލް ގަވަމަންޓް މިނިސްޓްރީން އާންމުކޮށްފި އެވެ.
ލޯކަލް ގަވަމަންޓް މިނިސްޓްރީން އިއްޔެ ކުރި އިއުލާނެއްގައި ވަނީ ކޮންޓްރެކްޓާ ފައިނޭންސް އުސޫލުން އިމާރާތް ކުރާ 50 ކައުންސިލު އިދާރާ ކަނޑައެޅުމުގައި ބޭނުންކުރާނެ މިންގަނޑުތަކާއި މާކްސް ދެވޭނެ ގޮތް އާންމުކޮށްފަ އެވެ.
އެއީ؛
ރަށުގެ އާބާދީ އަށް 20 މާކްސް
ކައުންސިލުންގެ ވަސީލަތްތަކަށް 20 މާކްސް
ޢިމާރާތުގެ ހާލަތު (ޢިމާރާތުގެ އައުބައުމިން) އަށް 20 މާކްސް
ކައުންސިލަރުން މަސައްކަތް ކުރާނެ ޖާގަ އަށް 10 މާކްސް
މުވައްޒަފުން މަސައްކަތް ކުރާނެ ޖާގަ އަށް 10 މާކްސް
އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެމްބަރުންގެ ޖާގަ އަށް 10 މާކްސް
ކަންގަތި އެވޯޑް ލިބިފައިވާނަމަ 10 މާކްސް
އެލްޖީއޭއިން ވަނީ އެ މިންގަނޑުތަކާއި މާރކްސް ދެވިފައިވާ ގޮތާމެދު އެއްވެސް ޚޔާލެއް އޮތް ނަމަ 28 މާރިޗު 2024 ވާ ބުރާސްފަތި ދުވަހުގެ މެންދުރު 1:00 ގެ ކުރިން [email protected] އަށް މެއިލްކޮށް ދިނުމަށް އެދިފައެވެ.
ރައީސް މުޢިއްޒު ހދ. މަކުނުދޫ އަށް ވަޑައިގެން އެރަށުގެ ރައްޔިތުންނާ ބައްދަލުކޮށް ދެއްކެވި ވާހަކަފުޅުގައި، އެމަނިކުފާނު ވަނީ، ކައުންސިލްތަކުގެ އިމާރާތްތަކަށް ދިމާވެފައިވާ މައްސަލަ ހައްލުކުރުމަށް ޚާއްޞަ އިސްކަމެއް ދީގެން، އިންވެސްޓަރ ފައިނޭންސްގެ އުޞޫލުން ކައުންސިލް އިދާރާތަކުގެ ޢުމްރާނީ ތަރައްޤީއަށް ޚާއްޞަ މަސައްކަތްތަކެއް ކުރައްވަމުން ގެންދަވާނެ ކަމަށް ވިދާޅުވެފައެވެ.
އެގޮތުން މިއަހަރުތެރޭގައި 50 ރަށެއްގައި، 50 ކައުންސިލް ޢިދާރާ ޢިމާރާތް ކުރައްވާނެ ކަމަށް އެމަނިކުފާނު ވިދާޅުވިއެވެ.
"ރައްޔިތުންނަށް މި ޚިދުމަތް ދޭންހުރި ކައުންސިލްތަކަށް ބޭނުންވާ މަރުކަޒުތައް އަޅައި ދިނުމަށްޓަކައި ފަށާ މަސްރޫއެއް، މި މަޝްރޫއުގެ ފުރަތަމަ ފިޔަވަހީގައި ، ފަންސާސް ރަށެއްގައި ފަންސާސް ރަށު ކައުންސިލް އޮފީސް އަޅުގަނޑުމެން ޢިމާރާތްކޮށްދޭނަށް" މަކުނުދޫގައި ވާހަކަފުޅު ދައްކަވަމުން ރައިސުލްޖުމުހޫރިއްޔާ ވިދާޅުވިއެވެ.
ރައީސް އިތުރަށް ވިދާޅުވީ އެމަނިކުފާނު ގެ އުންމީދަކީ އަދި މަސައްކަތް ކުރައްވާނީ ކައުންސިލް އޮފީސް އިމާރާތްކުރުމުގެ މަސައްކަތް 50 ރަށުގައި އެއްފަހަރާ ފެށުމަށް ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
