"ޖީއެސް އަންހެން ވޮލީބޯޅަ ޓޯނަމަންޓް 2024"، ފެބުރުއަރީ 10 ގައި

ކުލަބު ޖީއެސްގެ ފަރާތުން އިންތިޒާމްކޮށްގެން ހއ.ހޯރަފުށީ މިއަހަރު ބޭއްވުމަށް ހަމަޖެހިފައިވާ "ޖީއެސް އަންހެން ވޮލީބޯޅަ ޓޯނަމަންޓް 2024" ފެބުރުއަރީ 10 ގައި ބޭއްވުމަށް ނިންމައިފިއެވެ.

މިމުބާރާތަކީ ހއ. ހޯރަފުށީގައި ހަރަކާތްތެރިވާ ކުލަބު ޖަމިއްޔާތަކާއި، ސަރުކާރުގެ އޮފީސްތަކާއި ސަރުކާރު ހިއްސާވާ ކުންފުނިތަކާއި، އަމިއްލަ ކުންފުނިތަކުގެ އިތުރުން އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ބާއްވާ މުބާރާތެކެވެ.

ޗެންޕިްއަން ޓީމަށް 10,000 ރުފިޔާ އަދި ރަނަރަޕް ޓީމަށް 5,000 ގެ ފައިސާގެ އިނާމެއް ހުށަހަޅާފައިވާ މިމުބާރާތް ކުރިއަށް ގެންދިއުމަށް ހަމަޖެހިފައިވަނީ މަދުވެގެން ހަތަރު ޓީމު ބައިވެރިވާނަމައެވެ.

މުބާރާތުގައި ޓީމްތައް ރަޖިސްޓަރީކުރުމަށް ހުޅުވާލުމަށް ހަމަޖެހިފައި ވަނީ 2024 ޖެނުއަރީމަހުގެ 8 ވަނަ ދުވަހު އެވެ. އަދި ޓީމުތައް ރަޖިސްޓަރީ ކުރުމަށް ފޯމު ހުށަހެޅުމަށް ކަނޑައެޅިފައިވާ އެންމެ ފަހުގެ ތާރީޚަކީ 2024 ޖެނުއަރީ މަހުގެ 13 ވަނަ ދުވަހެވެ.

މީގެ އިތުރުން މުބާރާތުގައި ބައިވެރިވާ ޓީމުތަކުން ޓީމު ލިސްޓު ހުށަހެޅުމަށް ހުޅުވާލުމަށް ހަމަޖެހިފައި ވަނީ ޖެނުއަރީމަހުގެ 14 ވަނަ ދުވަހުއެވެ. އަދި ޓީމު ލިސްޓް ހުށަހެޅޭނެ އެންމެ ފަހު ދުވަހަކީ 2024 ފެބުރުއަރީ މަހުގެ ތިންވަނަ ދުވަހެވެ.