ހޯރަފުށީގައި ދުއްވާފައި ދިޔަ ސައިކަލެއްގެ ފުރޮޅު ފަޅައިގެންގޮސް ނުރައްކާތެރި އެކްސިޑެންޓެއް؛ އަނިޔާވި އެކަކު މާލެ ގެނެސް ފަރުވާދެނީ

ހއ. ހޯރަފުށީ އެއާޕޯޓް މަގުގައި ދުއްވާފައި ދިޔަ ސައިކަލެއްގެ ފަހަތު ފުރޮޅު ފަޅައިގެން ގޮސް ހިނގި ނުރައްކާތެރި އެކްސިޑެންޓެއްގައި ދެ އަންހެނަކަށް އަނިޔާވެ، އޭގެ ތެރެއިން އެކަކަށް މާލެ ގެނެސް ފަރުވާދޭން ފަށައިފިއެވެ.

ވޮއިސް އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، ހޯރަފުށީ އެއާޕޯޓް މަގުގައި އެކްސިޑެންޓެއް ހިނގައިގެން އުޅޭކަމުގެ މައުލޫމާތު ލިބިފައިވަނީ 26 ސެޕްޓެމްބަރު 2026 ވީ ދުވަހުގެ ރޭ 12:33 އެހައިކަންހާއިރު ކަމަށެވެ.

މި މައުލޫމާތު ލިބުމާ ގުޅިގެން ފުލުހުން އެ ސަރަހައްދަށް ގޮސް މައުލޫމާތު ސާފުކުރިއިރު، މި ހާދިސާ ހިނގަން މެދުވެރިވީ އެއާޕޯޓު މަގުން ދެކުނުން އުތުރަށް ދުއްވާފައި ދިޔަ ސައިކަލުގެ ފަހަތު ފުރޮޅުގެ ހަން ފަޅައިގެން ގޮސް، ސައިކަލު ވެއްޓިގެން ކަމަށް އޮފިޝަލް ވިދާޅުވިއެވެ.

މި އެކްސިޑެންޓުގައި އަނިޔާވެފައިވަނީ ސައިކަލު ދުއްވަން އިން 43 އަހަރުގެ އަންހެނަކަށާއި، ސައިކަލުގެ ފަހަތުގައި އިން 36 އަހަރުގެ އަންހެނަކަށެވެ. މި ދެ މީހުންނަށް ވެސް ހާދިސާ ހިނގި ރޭ ވަނީ ކުޅުދުއްފުށި ރީޖަނަލް ހޮސްޕިޓަލަށް ގެންގޮސް ފަރުވާދޭން ފަށާފައެވެ.

ނަމަވެސް، އަނިޔާވި މީހުންގެ ތެރެއިން ސައިކަލުގެ ފަހަތުގައި އިން 36 އަހަރުގެ އަންހެން މީހާ އިތުރު ފަރުވާއަށް މިހާރު ވަނީ މާލެ ގެނެސް އައިޖީއެމް ހޮސްޕިޓަލުގައި ފަރުވާދޭން ފަށާފައި ކަމަށް އޮފިޝަލް ވިދާޅުވިއެވެ.

މި ހާދިސާއާ ގުޅިގެން ބަލަންޖެހޭ އިތުރު ކަންކަން އެ އިދާރާއިން މިހާރު ދަނީ ތަހުގީގު ކުރަމުންދާ ކަމަށްވެސް ވިދާޅުވިއެވެ.