ސްޓެލްކޯ މަހިބަދޫ އިންޓަ އޮފީސް ވޮލީ މުބާރާތް: ސީދާ ތިން ސެޓުން ވައިކިންގްސް ބަލިކޮށް ވޮރިއާޒް ފައިނަލަށް
ސްޓެލްކޯ މަހިބަދޫ އިންޓަ އޮފީސް ވޮލީބޯޅަ މުބާރާތުގެ އަންހެން ޑިވިޝަންގެ ފުރަތަމަ ސެމީ ފައިނަލް މެޗު ސީދާ ތިން ސެޓުން ކާމިޔާބުކޮށް، މަހިބަދޫ ކައުންސިލް (ވޮރިއާޒް) ޓީމު މުބާރާތުގެ ފައިނަލުން ޖާގަ ހޯދައިފިއެވެ.
އިއްޔެ ކުޅުނު ފޯރިގަދަ މި ސެމީ ފައިނަލް މެޗުގައި މަހިބަދޫ ކައުންސިލް (ވޮރިއާޒް) ވާދަކުރީ ވައިކިންގްސް ޓީމާ ދެކޮޅަށެވެ. މުޅި މެޗުގައިވެސް މޮޅު ކުޅުމެއް ދައްކައި ވޮރިއާޒް އިން ވަނީ ފުރަތަމަ ސެޓު 25-11 އިން ފަސޭހަކަމާއެކު ގެންގޮސްފައެވެ.
ދެވަނަ ސެޓުގައި ވައިކިންގްސް އިން ކުޅުން ރަނގަޅުކޮށް ވާދަކުރި ނަމަވެސް، ވޮރިއާޒް އިން ވަނީ 25-20 އިން މި ސެޓު ކާމިޔާބުކޮށްފައެވެ. އަދި މެޗުގެ ތިންވަނަ ސެޓު 25-15 އިން ކާމިޔާބުކޮށް ވޮރިއާޒް ވަނީ ސީދާ ތިން ސެޓުން މެޗު ކާމިޔާބުކޮށް ފައިނަލުގެ ފުރަތަމަ ޖާގަ ކަށަވަރުކޮށްފައެވެ.
މި މެޗުގެ މޮޅު ކުޅުންތެރިޔާގެ މަގާމު ހޯދީ މަހިބަދޫ ކައުންސިލް (ވޮރިއާޒް) ޓީމުގެ ޖާޒީ ނަންބަރު 10، ސައުޝަން އާދަމް އެވެ. އޭނާ ވަނީ މެޗުގައި މޮޅު ކުޅުމެއް ދައްކައި ޓީމު މޮޅުކޮށްދިނުމުގައި މުހިންމު ދައުރެއް އަދާކޮށްފައެވެ.
މި މުބާރާތުގެ އަންހެން ޑިވިޝަންގެ ދެވަނަ ސެމީ ފައިނަލް މެޗު މިއަދު ކުޅުމަށް ހަމަޖެހިފައިވާއިރު، މި މެޗުގައި ބައްދަލުކުރާނީ މަހިބަދޫ ހޮސްޕިޓަލުގެ އެލީޓް ޓީމާއި އދ. އަތޮޅު ތަޢުލީމީ މަރުކަޒުގެ ޓީމެވެ. މިއަދުގެ މެޗުން މޮޅުވާ ޓީމަކަށް ފައިނަލުގައި ވާދަކުރަން ޖެހޭނީ މަހިބަދޫ ކައުންސިލް (ވޮރިއާޒް) އާއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
