މިއަދު ރޯދަ ވީއްލަން ފޭކު ހަވާދުލީ ބިސް ނުވަތަ ޓޮމާޓޯލީ ބިސް ކިހިނެއް ވާނެ؟

ހަވާދުލީ ބިހަކީ އެކި މީހުން އެކި ގޮތަށް ތައްޔާރު ކުރާ އެއްޗެކެވެ. ބައެއް މީހުން ހަވާދުލައިގެން ހަވާދުލީ ބިސް ހަދާއިރު އަނެއް ބަޔަކު ހަދަނީ ޓޮމާޓޯ ޕޭސްޓް ލައިގެން “ހަވާދުލީ” ބިހެވެ. ނުވަތަ ޓޮމާޓޯލީ ބިހެވެ. މިއަދު ވޮއިސް ގެ ބަދިގެއިން މި ގެނެސްދެނީ ޓޮމާޓޯ ހަވާދުލީ ބިހުގެ ރެސިޕީ އެވެ.

ފުށްގަނޑު ތައްޔާރުކުރުން

ބޭނުންވާ ތަކެތި

3/4 1 ޖޯޑު ފުށް

1 ސައިސަމުސާ ލޮނު

3/4 ޖޯޑު ތެޔޮ

ހޫނު ފެން

ތައްޔާރުކުރާނެ ގޮތް:

1. ބޯތަށްޓެއްގައި ފުށާއި ލޮނާއި ތެޔޮ ފޮދު އެއްކޮށްލާށެވެ.

2. ދެން މަޑުމަޑުން ހޫނު ފެންފޮދު އަޅަމުން ފުށްގަނޑު މޮޑެން ފަށާށެވެ. ފުށްގަނޑު މޮޑޭނީ އެ މަޑުކޮށް އަދި ކުޑަކޮށް އިލާސްޓިކްކޮށް އޮންނަ ވަރު ވަންދެނެވެ.

3. މޮޑުނު ފުށްގަނޑުން ވަށްކޮށް ގުޅަ ހަދާލާށެވެ. ގާތް ގަނޑަކަށް 20 ގުޅަ ހެދޭނެއެވެ.

މަސްގަނޑު ތައްޔާރު ކުރުން

ބޭނުންވާ ތަކެތި:

1 ފިޔާ (ތުނިކޮށް ކޮށާފައި)

1/2 ޖޯޑު ހުނި

1/2 ސައިސަމުސާ ގާނާފައިހުރި އިނގުރު

1/4 ސައި ސަމުސާ ލޮނު (ނޫނީ ރަހަލާ ވަރަށް)

1/2 ލުނބޯ

1 މަސްދަޅު

1/4 ސައިސަމުސާ ރީނދޫ

ގިތެޔޮ މިރުސް (ތުނިކޮށް ކޮށާފައި)

ހިކަނދިފަތް (ތުނިކޮށް ކޮށާފައި)

ތައްޔާރުކުރާނެ ގޮތް:

1) ބޯތަށްޓަކަށް ފިޔާއާއި، އިނގުރާއި، ލޮނާއި، އަޅާފައި ލުނބޯ ހުތް ޖަހައިގެން ރަނގަޅަށް މޮޑޭށެވެ.

2) ދެން ހިކަނދިފަތާއި، ގިތެޔޮމިރުހާއި، މަސްދަޅާއި، ރީނދޫކޮޅުވެސް އެއަށް އަޅާފައި އަނެއްކާވެސް ހުރިހާ އެއްޗެއް ރަނގަޅަށް އެއްވަންދެން މޮޑެލާނީއެވެ. އެއަށްފަހު ހުނި ކޮޅު އަޅާލައިގެންވެސް ރަނގަޅަށް މޮޑެލާށެވެ.

3) ދެން މޮޑުނު މަސްގަނޑުންވެސް 20 ގުޅަ ޖަހާލާށެވެ.

4) އެއަށްފަހު ފުށް ގުޅަ ފަތާ ކޮށްލުމަށްފަހު އޭގެ ތެރެއަށް މަސްހުނި ގުޅައެއް ލުމަށްފަހު މަސްގަނޑުގެ ވަށައިގެން ފުށްގަނޑު ލައްޕާލާށެވެ. ދެން ބިހެއްގެ ބައްޓަން ނިކުންނާނެގޮތަށް ވަށާލާށެވެ.

5) ދެން 5 ޖޯޑު ފެނުގެ ތެރެއަށް ½ މޭޒުމަތީ ސަމުސާ ތެޔޮ އެޅުމަށްފަހު އެ ކެކި ގަތުމުން ބިސްތައް އެއަށް އަޅައި 15 މިނެޓް ވަންދެން ކައްކާލާފައި ތައްޓެއްގެ ތެރެއަށް ލުހެލާށެވެ.

ބިހުގައި ޓޮމާޓޯ ލުން

ބޭނުންވާ ތަކެތި:

3 މޭޒުމަތީ ސަމުސާ ޓޮމާޓޯ ޕޭސްޓް

1/3 ޖޯޑު ފްރައިޑް ޗިކަން ސޯސް

1 ސައި ސަމުސާ ސޯޔާ ސޯސް

1/2 ސައި ސަމުސާ އޮއިސްޓަރ ސޯސް

1 ސައި ސަމުސާ ކުކުޅު ހަވާދު

1 ބޮޑު ފިޔާ (ތުނިކޮށް ކޮށާފައި)

2 ލޮނުމެދު (ކުދިކޮށް ކޮށާފައި)

1/2 ސައި ސަމުސާ އިނގުރު (ގާނާފައި)

ހިކަނދިފަތް

ލޮނު (ރަހަ ލާވަރަށް)

1/2 ޖޯޑު ކާށީ ކިރު ނުވަތަ ފެން

ރާނބާފަތް

ގިތެޔޮ މިރުސް

ތެޔޮ

ތައްޔާރުކުރާނެ ގޮތް

1) ތެއްޔަކަށް ތެޔޮ ފޮދެއް އަޅައި ހޫނު ކޮށްލުމަށްފަހު، ފިޔާއާއި، ލޮނުމެދު، އިނގުރު، ހިކަނދިފަތް އަދި ރާނބާފަތް އެއަށް އަޅައި މަޑު ގިނީގައި އެ ތަކެތި މޯޅި ވަންދެން ކައްކާލާށެވެ.

2) ދެން އޭގެ ތެރެއަށް ގިތެޔޮ މިރުހާއި ޓޮމާޓޯ ޕޭސްޓާއި، ސޯޔާ ސޯހާއި، އޮއިސްޓަރ ސޯސް، ފްރައިޑްޗިކަން ސޯސް އަދި ހަވާދު ކޮޅު އެޅުމަށްފަހު ގާތްގަނޑަކަށް 3 މިނެޓް ވަރު ވަންދެން ކައްކާލާށެވެ.

3) އެއަށްފަހު ކާށީގެ ކިރު ފޮދު އަދި ލޮނު ކޮޅުވެސް އަޅާލައި އެކުލަވައި ލުމަށްފަހު އޭގެ ތެރެއަށް ކެއްކި ބިސްތައް އަޅާލާށެވެ.

4) ރަނގަޅަށް ބިސްތަކުގެ ބޭރުގައި ޓޮމާޓޯ އުނގުޅުމަށްޓަކައި ބިސްތައް ސޯސް ގަނޑުގެ ތެރޭގައި ފުރޮޅާލާ ހަދާށެވެ.

5) ރަނގަޅަށް އެކުލެވުމިން އުނދުން ނިއްވާލާށެވެ.