ރާއްޖޭގެ ހުރިހާ ރަށަކަށް ލެބޯޓްރީގެ ޚިދުމަތް ލިބޭގޮތަށް ހަދަނީ

ކުރިއަށް އޮތް އަހަރެއްހާ ދުވަހުގެ ތެރޭގައި ދިވެހިރާއްޖޭގެ ހުރިހާ ރަށަކަށް ލެބޯޓްރީގެ ޚިދުމަތް ފޯރުކޮށްދިނުމަށް ސަރުކާރުން އަމާޒުކޮށްފިއެވެ.

މިކަން ވަނީ މިއަދު ލ.އަތޮޅުގައި މޯބައިލް ލެބޯޓްރީގެ ޚިދުމަތް ތައާރަފްކުރުމަށް އޮތް ރަސްމިއްޔާތުގައި ވާހަކަފުޅު ދައްކަވަމުން ހެލްތް މިނިސްޓަރ އަބްދުﷲ އަމީން ވަނީ މިކަން ހާމަކުރައްވާފައެވެ.

އަމީން ވިދާޅުވީ ހެލްތް މިނިސްޓްރީގެ އަމާޒަކީ ރައީސުލްޖުމްހޫރިއްޔާާ އިބްރާހިމް މުހައްމަދު ޞާލިހު ވައުދުވެ ވަޑައިގެންނެވި ފަދައިން ކުރިއަށް އޮތް އަހަރެއްހާ ދުވަހުގެ ތެރޭގައި ރާއްޖޭގެ ހުރިހާ ރަށަކަށް ލެބޯޓްރީގެ ޚިދުމަތް ފޯރުކޮށްދިނުންކަމަށެވެ. އެގޮތުން ލ.އަތޮޅުގައި މި ފެށި މޯބައިލް ލެބޯޓްރީ ފަދަ ޚިދުމަތްތައް މުޅި ރާއްޖެއަށް ފުޅާކުރައްވާނެކަމަށް އަމީން ވިދާޅުވިއެވެ.

މިނިސްޓަރ އިތުރަށް ވިދާާޅުވީ ރާއްޖޭގައި ޑޮކްޓަރީ ބޭސްފަރުވާގެ ހިދުމަތް ދޭތާ 50 އަހަރު ވެގެންދިޔައިރު، ރާއްޖޭގެ ހުރިހާ ރަށަކަށް ޑޮކްޓަރީ ބޭސްފަރުވާގެ ހިދުމަތް ފޯރުކޮށްދީފައިވާކަމީ ކާމިޔާބީއެއް ކަމަށެވެ.

މިއަދު ތައާރަފްކުރި “ލެބޯޓަރީގެ ޚިދުމަތުގެ ފަސޭހަކަން ރަށަށް” ލ. އަތޮޅު ލ. ކުނަހަންދޫ، ލ. މާމެންދޫ، ލ. މުންޑޫ، ލ. ދަނބިދޫ ލ. ކުނަހަންދޫ، ލ. ދަނބިދޫ، ލ. މުންޑޫ އަދި ލ. މާމެންދޫގައި މޯބައިލް ލެބޯޓްރީ ސާރވިސަސް ލިބޭނެއެވެ.