ރައީސް މުޢިއްޒު ވޯޓު ލައްވައިފި؛ އެދިވަޑައިތީ ރައްޔިތުންގެ ގާނޫނީ ޙައްގުގެ ބޭނުންހިފައި އެންމެން ވޯޓްލުމަށް
ލިޔުންތެރިޔާ
ޚަދީޖާ އަރުފާ
ލޯކަލް ކައުންސިލް އިންތިޚާބު، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބު އަދި ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމާއިމެދު ފެންނަ ގޮތެއް ނިންމުމަށް ނަގާ ވޯޓުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވޯޓު ލައްވައިފިއެވެ.
އެމަނިކުފާނު ވޯޓު ލެއްވީ މާފަންނު ދެކެނު ދާއިރާގެ މީހުން ވޯޓްލުމަށް ކަނޑައެޅިފައިވާ ވޯޓު ފޮއްޓަށެވެ. މިވޯޓު ފޮށި ބެހެއްޓިފައިވަނީ ތާޖުއްދީން ސުކޫލުގައިއެވެ.
ވޯޓުލުމަށްފަހު މީޑިއާތަކާއި ވާހަކަފުޅުދައްކަވަމުން ރައީސް މުއިއްޒު ވަނީ ވޯޓުލުމަކީ ކޮންމެ މީހަކަށްވެސް ލިބިފައިވާ ޤާނޫނީ ހައްޤަކަށްވާއިރު އެ ހައްޤު ކޮންމެ މީހަކުވެސް އަދާކުރުމަށް އިލްތިމާސްކޮށްފައެވެ.
”ވޯޓު ލުމަކީ ރައްޔިތުންގެ އަސާސީ ޤާނޫނީ ޙައްގެއް. އެހެންވީމާ ރައްޔިތުންގެ ގާނޫނީ ހައްގު އަދާކުރުމަށް މިއަދުގެ ވޯޓުގައި ބައިވެރިވުމަށް އަޅުގަނޑު އިލްތިމާސްކުރަން“ ރައީސް މުޢިއްޒު ވިދާޅުވިއެވެ.
ތިން އިންތިޚާބުގެ ވޯޓުލުން 8:00 ގައި ފަށާފައިވާއިރު، ވޯޓުލުމުގެ ވަގުތު ހަމަވާނީ ހަވީރު 4:00 ގައެވެ. އޭގެ ފަހުން ވޯޓު ލާން ކިޔުއަށް ނޭރޭނެ ކަމަށާ ނަމަވެސް ކިޔުގައި ތިބޭ މީހުންނަށް ވޯޓު ލެވޭނެ ކަމަށް އިލެކްޝަންސް އިން ބުނެއެވެ.
މިއަދު ކުރިއަށްދާ އިންތިޚާބުގައި 294،876 މީހަކަށް ވޯޓުލުމުގެ ހައްގު ލިބިގެންވެ އެވެ. އެއީ 144،506 އަންހެނުންނާއި 150،370 ފިރިހެނުންނެވެ.
މުޅި ރާއްޖޭގައި 588 ވޯޓު ފޮށި ބަހައްޓާފައިވާއިރު އެ ވޯޓު ފޮށިތަކުގެ ސެކިއުރިޓީ ބެލެހެއްޓުމުގައި ފުލުހުން ހަރަކާތްތެރިވާނެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
