އެމްއެންޔޫ ފަހި ދުވަސް 2026 ފަށައިފި
ލިޔުންތެރިޔާ
ސްޓާފް ރައިޓަރ
ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އިން އިންތިޒާމުކޮށްގެން ބާއްވާ "އެމްއެންޔޫ ފަހި ދުވަސް 2026" ރަސްމީކޮށް ހުޅުވައިފިއެވެ. މި ހަރަކާތަކީ މަތީ ތައުލީމަށް ހޭލުންތެރިކުރުވުމަށާއި، ކެރިއަރ ގައިޑެންސް ދިނުމުގެ އިތުރުން އެއް ތަނަކުން ކޯސްތަކަށް ކުރިމަތިލުމުގެ ފުރުސަތު ދަރިވަރުންނަށް ފަހިކޮށްދިނުމަށް ބާއްވާ ހަރަކާތެކެވެ.
މި ހަރަކާތް ކުރިއަށް ދަނީ 2026 ޖުލައި 11 އިން 12 އަށް، ކޮންމެ ދުވަހަކު ހަވީރު 4:00 އިން ރޭގަނޑު 10:00 އަށް އެމްއެންޔޫގެ މަރުކަޒީ އިދާރާގައެވެ.
އެމްއެންޔޫއިން ބުނި ގޮތުގައި، މި އިވެންޓުގެ އެންމެ މުހިންމު އެއް ބަޔަކީ "ވަން-ސްޓޮޕް އެޑްމިޝަން ސެންޓަރު" އެވެ. މި ސެންޓަރު މެދުވެރިކޮށް ޔުނިވަރސިޓީން ހިންގާ އެކި ދާއިރާތަކުގެ ކޯސްތަކާ ބެހޭ ފުރިހަމަ މައުލޫމާތު ލިބުމުގެ އިތުރުން، އެޑްމިޝަން ފޯމު ހުށަހެޅުމާއި ރަޖިސްޓްރީވުމުގެ ކަންކަން އެމްއެންޔޫގެ މުވައްޒަފުންގެ އެހީތެރިކަމާއެކު ވަގުތުން ފުރިހަމަ ކުރެވޭނެއެވެ. މީގެ އިތުރުން، ދަރިވަރުންގެ ޝައުގުވެރިކަމާއި ގާބިލިއްޔަތު ހުރި ދާއިރާތަކުން ކުރިއަށް ދިއުމަށް ބޭނުންވާ ކެރިއަރ ގައިޑެންސްވެސް މި ހަރަކާތުގެ ތެރެއިން ފޯރުކޮށްދެއެވެ.
މި ހަރަކާތުގައި އެމްއެންޔޫގެ އެކި ފެކަލްޓީތަކާއި ސެންޓަރުތަކުން ދަނީ އަމަލީ ތަޖުރިބާ ލިބޭނެ ތަފާތު ހަރަކާތްތަކެއް ކުރިއަށް ގެންދަމުންނެވެ. އޭގެ ތެރޭގައި ސައިންސް އެކްސްޕެރިމެންޓްތަކާއި، އިންޖިނިއަރިންގ އަދި ޓެކްނޮލޮޖީގެ ގޮންޖެހުންތަކާއި، ކުރެހުމާއި ފަންނުވެރިކަމުގެ ހަރަކާތްތަކުގެ އިތުރުން ފިޒިއޮތެރަޕީ އަދި މެރިޓައިމް ދާއިރާގެ ދައްކާލުންތައް ހިމެނެއެވެ.
މި އަހަރުގެ ފަހި ދުވަހުގައި އެމްއެންޔޫގެ ޕާޓްނަރުންގެ ގޮތުގައި ހެލްތު ޕްރޮޓެކްޝަން އެޖެންސީ (އެޗްޕީއޭ)، ޕަބްލިކް ސަރވިސް މީޑިއާ (ޕީއެސްއެމް)، މޯލްޑިވްސް ސްޓޭޓް ޝިޕިންގ (އެމްއެސްއެސް) އަދި ފިޒިއޯ ސޮލިއުޝަންސް ފަދަ އިދާރާތަކުން ބައިވެރިވެ، އެ ދާއިރާތަކުން ހުރި ވަޒީފާގެ ފުރުސަތުތަކާ ގުޅޭ މައުލޫމާތު ދަނީ ހިއްސާކުރަމުންނެވެ.
އެމްއެންޔޫއިން ވަނީ ހުރިހާ ދަރިވަރުންނަށާއި ބެލެނިވެރިންނަށް، އަދި އާންމު ފަރާތްތަކަށް މި ފުރުސަތުގެ ބޭނުން ހިފުމަށް ދައުވަތު އަރުވާފައެވެ. މި ހަރަކާތް މާދަމާ ރޭގަނޑު 10:00 އާ ހަމައަށް އެމްއެންޔޫގެ މަރުކަޒީ އިދާރާގައި ކުރިއަށްދާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
