މަސްވެރިކަމުގެ އެންމެ މުހިއްމު ވައުދުތަކުގައި މިއަހަރު ކުލަޖެހިގެންދާނެ: ޝިޔާމް

މިއަހަރަކީ މަސްވެރި ސިނާޢަތުގެ ތަރައްޤީގެ ރައީސްގެ އެންމެ މުހިއްމު ވަޢުދުފުޅުތަކުގައި ކުލަޖެހިގެންދާނޭ އަހަރަށް ވާނޭކަމަށް މަސްވެރިކަމާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިހާރު ހުވަދު އަތޮޅުގެ ބައެއް ރަށްތަކަށް ކުރައްވަމުން ގެންދަވާ ޒިޔާރަތުގައި އެމަނިކުފާނު އަރިހު ހުންނަވައި، އެކްސްގައި ކުރެއްވި ޕޯސްޓެއްގައި މަސްވެރިންގެ ވަޒީރު ޝިޔާމް ވިދާޅުވީ، ރާއްޖޭގެ އެންމެ މަސްވެެރިން ގިނަ ހުވަދުއަތޮޅަށް ރައީސް މިހާރު ކުރައްވަމުން ގެންދަވާ ދަތުރުފުޅުގައި ހުވަދުއަތޮޅު ދެކުނުބުރީގެ ގިނަ ރަށްތަކަކަށް ދަތުރުކުރެއްވި އިރު ފާހަގަކުރެވުނު އެއްކަމަކީ މަސްވެރިކަމުގެ ސިނާއަތުގެ ތަރައްޤީއަށް އެމަނިކުފާނު ކުރައްވަމުން ގެންދަވާ ކަންކަމާ އަދި ކުރައްވަން ރާއްވަވާފައިވާ ކަންކަން މަސްވެެރި ކޮމިއުނިޓީ ތަކުން ވަރަށް ބޮޑަށް ބަލައިގަންނަކަން ކަމަށެވެ.

ރައްޔިތުން ރައީސްއަށް އަރުވާ ލަފާ ވަރަށްބޮޑަށް ބަލައިގަންނަކަން ފާހަގަކުރައްވަމުން ވަޒީރު ވިދާޅުވީ، މިއަހަރަކީ މަސްވެރިކަމުގެ ސިނާޢަތުގެ ތަރައްޤީގެ ރައީސްގެ އެންމެ މުހިއްމު ވަޢުދުފުޅުތަކުގައި ކުލަޖެހިގެންދާނޭ އަހަރުކަމަށެވެ.

މަސްވެރިކަމުގެ ސިނާއަތުގެ ތަރައްޤީއަށް މި ސަރުކާރުން ވެފައިހުރި ވައުދުތަކުގައި މިއަހަރު ކުލަޖެހިގެންދާނޭކަމަށް ޝިޔާމް ވިދާޅުވިއިރު، މިހާރު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގައި ރައީސް ޑރ.މުއިއްޒު ވަނީ މަސްވެރިންނަށް ނުދީ ހުރި ހުރިހާ ފައިސާއެއް މިހާރު ދީ ނިންމާފައިވާކަމަށް ވިދާޅުވެފައެވެ. މިގޮތުން މިހާރު ސަރުކާރުން އަންނަނީ މަސްވެރިން ކިރުވާމަހަށް 48 ގަޑިއިރުގެ ތެރޭގައި ފައިސާދެމުންކަން ރައީސް ވަނީ ފާހަގަކުރައްވާފައެވެ.

ކިރުވާ މަހަށް 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުމަކީ މި ސަރުކާރުގެ ރިޔާސީ ވައުދެެވެ.