އޮސްޓްރޭލިއާގެ ބޮޑުވަޒީރު ދެވަނަ ދައުރަކަށް އިންތިޚާބުވެވަޑައިގަތުމާ ގުޅިގެން ރައީސް މުޢިއްޒުގެ ތަހުނިޔާ
ލިޔުންތެރިޔާ
ޚަދީޖާ އަރުފާ
އޮސްޓްރޭލިއާގެ ބޮޑުވަޒީރު، ލޭބަރ ޕާޓީގެ ލީޑަރު އެންތަނީ އެލްބަނީސް، ދެވަނަ ދައުރަކަށް އިންތިޚާބުވެވަޑައިގަތުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަހުނިޔާގެ މެސެޖެއް ފޮނުއްވައިފިއެވެ.
ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އިތުރު ދައުރަކަށް ބޮޑިވަޒީރު ކަމަށް އިންތިޚާބުވެވަޑައިގެންނެވުމަކީ ރައްޔިތުން އެމަނިކުފާނުގެ ލީޑަރޝިޕަށް ކުރައްވާ އިތުބާރުގެ ހެއްކެއް ކަމަށެވެ.
އަދި ކުރިމަގުގައިވެސް ރާއްޖެއާއި އޮސްޓްރޭލިއާއާއި ދެމެދު އޮތް ގުޅުން އިތުރަށް ދަމަހައްޓާ ވަރުގަދަކޮށް، ގުޅިގެން މަސައްކަތް ކުރެވޭނެކަމަށް އުއްމީދުކުރައްވާކަމަށްވެސް ވިދާޅުވިއެވެ.
އޮސްޓްރޭލިއާގެ އިންތިޚާބީ ކޮމިޝަނުން ބުނެފައިވާ ގޮތުގައި، އެގައުމުގެ ގާަނޫނު ހަދާމަޖިލީހުގެ އިންތިޚާބުގެ ވޯޓުގެ 68 އިންސައްތަ ގުނާ މިހާރު ވަނީ ނިމިފައެވެ. އަދި ވަގުތީ ނަތީޖާ ދައްކާ ގޮތުން، ޤާނޫނުހަދާ މަޖިލީހުގެ 150 ގޮނޑީގެ ތެރެއިން 81 ގޮނޑި އެންތަނީގެ ލޭބަރ ޕާޓީން ކާމިޔާބުކުރާނެ ކަމަށް ބެލެވެއެވެ. މިއީ މިހާރު ހިނގަމުންދާ ދައުރުގައި ލޭބަރ ޕާޓީއަށް ލިބިފައިވާ ގޮނޑީގެ އަދަދަށްވުރެ އިތުރު އަދަދެކެވެ.
މި ކާމިޔާބީއާއެކު ވޭތުވެދިޔަ 20 އަހަރު، އޮސްޓްރޭލިއާގެ ބޮޑުވަޒީރުކަން ޖެހިޖެހިގެން 2 ދައުރު ހޯއްދެވި ފުރަތަމަ ބޭފުޅާއަށް އެންތަނީ ވަނީ ވެފައެވެ. އޮސްޓްރޭލިއާގައި ބޮޑުވަޒީރުކަމުގެ މަޤާމުގެ ދަޢުރަކީ 3 އަހަރުގެ މުއްދަތެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
