މަކުނު ވިދުރި އަކީ 'އައު ކޮވިޑެއް' ނޫން، މި ބަލި ހުއްޓުވޭނެ: ޑަބްލިއުއެޗްއޯ

މަކުނު ވިދުރި އަކީ ކޮވިޑް-19 ފަދަ އާ ބަލިމަޑުކަމެއް ނޫންކަމަށާއި، މި ބަލީގެ ވައިރަހާއި އަދި އެ ކޮންޓްރޯލް ކުރެވޭނެ ގޮތްތަކާ ބެހޭގޮތުން ވަރަށް ގިނަ މަޢުލޫމާތު އެނގިފައިވާކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހާމަކޮށްފިއެވެ.

ދުނިޔޭގެ ސިއްޙީ ޖަމްޢިއްޔާއިން ބައިނަލްއަޤްވާމީ ސިއްޙީ ނުރައްކަލެއްގެ ގޮތުގައި އިޢުލާނުކޮށްފައިވާ މަކުނި ވިދުރީގެ އަލަށް ފެނުނު ކްލޭޑް 1ބީ ސްޓްރެއިނާ ބެހޭގޮތުން އިތުރު ދިރާސާތަކެއް ކުރަން ޖެހުނު ނަމަވެސް، ބަލި ފެތުރުން ހުއްޓުވޭނެކަމަށް އެ ޖަމްޢިއްޔާގެ ޔޫރަޕްގެ ޑިރެކްޓަރު ހާންސް ކްލޫޖް ވަނީ ވިދާޅުވެފައެވެ.

"މޮންކީޕޮކްސްއަކީ އައު ކޮވިޑެއް ނޫން، މޮންކީޕޮކްސް ކޮންޓްރޯލް ކުރާނެ ގޮތް އަޅުގަނޑުމެންނަށް އެނގޭ. އަދި ޔޫރަޕްގެ ސަރަޙައްދުގައި، އޭގެ ފެތުރުން މުޅިން ނައްތާލުމަށް ބޭނުންވާ ފިޔަވަޅުތައްވެސް އެނގޭ،"

ކްލޫޖް ވިދާޅުވިއެވެ.

ކްލޫޖް  ވިދާޅުވީ ކޮންމެ މަހަކު ޔޫރަޕްގެ ސަރަހައްދުގައި ކްލޭޑް 2 އެމްޕޮކްސް ސްޓްރެއިންގެ ގާތްގަނޑަކަށް 100 އައު ކޭސް ރިޕޯޓުކުރެވެމުންދާ ކަމަށާއި،  ބަލި ފެތުރުމުގެ މައިގަނޑު ގޮތަކީ ބަލި ޖެހިފައިވާ މީހާގެ ހަންގަނޑު އެހެން މީހުންގެ ގައިގައި ބީހުން ކަމަށެވެ.

އެހެންނަމަވެސް އޭނާ ވިދާޅުވީ އެމްޕޮކްސް ބަލީގެ ހަލުވި މަރުހަލާގައި ހުންނަ މީހަކަށް، ޚާއްސަކޮށް އަނގައިގައި ފޮޅު ހުރެއްޖެނަމަ، ކުޅުގެ ޒަރީއާއިން ގާތުގައި އުޅޭ މީހުންނަށް ބަލި ފެތުރުމުގެ ފުރުސަތު އޮތް ކަމަށެވެ.

ކްލޫޖް ގެ އިތުރުން، ޑަބްލިއުއެޗްއޯގެ ތަރުޖަމާނު ޠާރިޤް ޖަސާރެވިޗް ވިދާޅުވީ ޑަބްލިއުއެޗްއޯއިން މާސްކު އެޅުމަށް ލަފާ ނުދޭ ކަމަށާއި، ލަފާދެނީ ބަލި ފެތުރެމުންދާ ތަންތަނުގައި ދިރިއުޅޭ، ބަލީގެ ނުރައްކާ އެންމެ ބޮޑެތި މީހުން ވެކްސިން ފުރިހަމަ ކުރުމަށްކަމަށެވެ.

މީގެ ކުރިން 2022 ވަނަ އަހަރުގެ ޖުލައި މަހު، ކްލޭޑް 2ބީ ސްޓްރެއިންގެ ބައިނަލްއަޤްވާމީ ފެތުރުމާ ގުޅިގެން ވެސް ދުނިޔޭގެ ސިއްޙީ ޖަމްޢިއްޔާއިން ބައިނަލްއަޤްވާމީ ސިއްޙީ ނުރައްކަލެއް އިޢުލާނުކުރިއިރު، މި އިންޒާރު 2023 ވަނަ އަހަރުގެ މެއި މަހު ވަނީ ނިމުމަކަށް ގެނެސްފައެވެ.

ވައިރަހަކުން ޖެހޭ މި ބަލި ޖެހުމުން، ފްލޫ ފަދަ އަލާމާތްތައް ފެނުމާއި އެކު ގައިގައި ފޮޅުތަކެއް ނަގައެވެ. މި ބަލީގެ ސަބަބުން ބައެއް ފަހަރު ފުރާނައަށް ނުރައްކާތެރިވާއިރު، ކުޑަކުދިންނާއި، މާބަނޑު އަންހެނުންނާއި، އެޗްއައިވީ ފަދަ ބަލިތަކުގެ ސަބަބުން ހަށިގަނޑުގެ ދިފާޢީ ނިޒާމު ބަލިކަށިވެފައިވާ މީހުންނަށް މި ބަލީގެ ނުރައްކާ ބޮޑެވެ.