ބިންގަނޑު ކަނޑައިގެން ދިއުމުގެ ސަބަބުން ސްރީލަންކާގައި 31 މީހަކު މަރުވެއްޖެ

ސްރީލަންކާއަށް މިހާރު ކުރަމުންދާ ބޯ ވިއްސާރާގައި ބިންގަނޑު ކަނޑައިގެން ދިއުމުގެ ސަބަބުން ހިނގާދިޔަ ހާދިސާތަކުގައި އެކި ހިސާބުތަކުން 31 މީހަކު މަރުވެއްޖެއެވެ.

ލަންކާ މީޑިއާތަކުން ބުނީ ސްރީލަންކާގެ އެކި ހިސާބުތަކަާށް ކުރަމުން އަންނަ ވިއްސާރައިގެ ސަބަބުން އެޤައުމުގެ އެކި އަވަށްތަކަށް ބޮޑެތި ގެއްލުންތަކެއް ލިބެމުންދާކަމަށެވެ. މިގޮތުން ހިނގާދިޔަ ހާދިސާތަކުގައި 31 މީހުން މަރުވެފައިވާއިރު، 15 އަށްވުރެ ގިނަ މީހުން ވީނުވީއެއް ނޭނގިގެއްލިފައިވާކަމަށް އެޤައުމުގެ މީޑިއާތަކުން ވަނީ ރިޕޯޓްކޮށްފައެވެ.

ސްރީލަންކާގެ ޑިޒާސްޓާ މެނޭޖްމަންޓް ސެންޓަރުން ބުނީ ހާލުގައި ޖެހުމުން މިހާރުވެސް 4،000 ގިނަ ފަރަތްތަކަށް އެހީތެރިކަން ފޯރުކޮށްދީފައިވާކަމަށެވެ. ސްރީލަންކާއަށް މިހާރު ކުރަމުންދާ ވިއްސާރާގައި އެންމެބޮޑަށް ގެއްލުން ލިބުނު އެއް ސަރަހައްދަކީ ބެޓިކޯލާ ޑިސްޓްރެކްޓެވެ. އެ އަވަށަށް 300 މިލިލީޓަރުގެ ވާރޭ ވެހުނުއިރު، މިއީ އަދި މި ފަހުގެ ތާރީހެއްގައި ރެކޯޑެކެވެ.

ބޭ އޮފް ބެންގާލްގައި ނުރައްކާތެރި ތޫފާނެއް އުފެދިފައިވާއިރު، މި ތޫފާން ވަނީ އޮތީ ބެޓިކޯލާ އާ ނިސްބަތުން ކައިރީގައެވެ.

މޫސުން ގޮސްވެފައިވާއިރު، ސްރީލަންކާ ސަރުކާރުން ވަނީ މާދަމާ ކިޔެވުން ބަންދުކޮށް އާއްމު ދަތުރުފަތުރުގެ ކޮންމެހެން ދޭންޖެހޭ ހިދުމަތްތައް ނޫން އެހެން ހިދުމަތްތައް ވަގުތީގޮތުން ހުއްޓާލުމަށް ނިންމާފައެވެ.