އެމްކިއުއޭއިން ބައެއް ތަންތަނުގެ ހުއްދަތައް ބާތިލްކުރަނީ

މޯލްޑިވްސް ކޮލިފިކޭޝަން އޮތޯރިޓީގެ ހުއްދަ ލިބިފައިވާ ތައުލީމީ ތަންތަނުގައި ހިންގާ ޕްރޮގްރާމްތަކާއި ކޯސްތައް، އެމްކިއުއޭއިން ކަނޑައަޅާފައިވާ މިންގަނޑާއި ހިލާފުވާނަމަ އެތަނަކަށް ދީފައިވާ ޕްރޮގްރާތްތައް ހިންގުމުގެ ހުއްދަ ބާތިލް ކުރާނެ ކަމަށް އެ އޮތޯރިޓީން ބުނެފިއެވެ.

އެމްކިއުއޭއިން ނެރުނު ބަޔާނެއްގައި ބުނީ މަތީ ތައުލީމު ފޯރުކޮށްދޭ ޔުނިވާރސިޓީތަކާއި، ކޮލެޖްތަކުން އެއޮތޯރިޓީއިން ހުއްދަ ދީފައިވާ ގޮތާ ހިލާފަށް ޕްރޮގްރާމްތައް ރާވާ، ހިންގާ އަދި އެ އޮތޯރިޓީން ހުއްދަދޭ މިންގަނޑުތަކާއި ހިލާފަށް އިސްތިހާރު ކުރަމުންދާ ކަމުގެ ޝަކުވާ ލިބެމުން އަންނަކަމަށެވެ.

އެގޮތަށް އަމަލުކުރާ ތަންތަނަށް ދީފައިވާ ހުއްދަ ބާތިލް ކުރެވޭނެ ކަމަށް ފާހަގަކޮށް، އެމްކިއުއޭ އިން ހުއްދަ ދީފައިވާ މިންގަޑުތަކާ ހިލާފަށް ޕްރޮގްރާމްތައް ނުހިންގުމަށްވެސް އެ އޮތޯރިޓީން ވަނީ އިލްތިމާސްކޮށްފައެވެ.

އިތުރަށް އެ ބަޔާނުގައި ބުނެފައިވަނީ، އެފަދަ ގޮތަކަށް އަމަލު ކުރަން ޖެހެނީ ޕްރޮގްރާމްތަކުގެ ފެންވަރު ހިފެހެއްޓުމުގެ އިތުރުން ދަރިވަރުންގެ ހައްގުތައް ރައްކާތެރިކުރުމުގެ މަގްސަދުގައި ކަމަށެވެ.

އެމްކިއުއޭ އިން ބުނީ، އެކެޑަމިކް ޕްރޮގްރާމްތައް ހިންގުމުގެ ހުއްދަ ދިނުމަށްފަހު އެ ކޯސްތައް ހިންގަނީ ހުއްދަދީފައިވާ ފެންވަރަށްތޯ ބެލުމަކީވެސް އެއޮތޯރިޓީގެ ޒިންމާއެއް ކަމަށެވެ. އަދި އެކެޑަމިކް ޕްރޮގްރާމް ހިންގާ ފަރާތުން ޕްރޮގްރާމްގެ ޑޮކިއުމެންޓް އެއޮތޯރިޓީއަށް ހުށަހެޅުމުން ބަލަންޖެހޭ ކަންކަން ބެލުމަށްފަހު، އެއޮތޯރިޓީގެ މިންގަނޑަށް ފެތޭނަމަ ޕްރޮގްރާމްތައް ހިންގުމުގެ ހުއްދަދޭނެ ކަމަށް ވެސް އެ އޮތޯރިޓީން މައުލޫމާތުދެއެވެ.