ފެންވަރު ރަނގަޅު ކުޑަކުދިންގެ ވާހަކަ "މަވެށި" ފޮތްބައި ނެރެފި

ރާއްޖޭގައި މިހާތަނަށް ނެރެފައިވާ އެންމެ ރަނގަޅު ފެންވަރެއްގައި ނެރެފައިވާ ވާހަކަ ފޮތްބައި ނެރެފައިވަނީ ދިވެހިރާއްޖޭގެ އަޑުގައި ބޭއްވި ރަސްމިއްޔާތެއްގައި މިނިސްޓަރ އޮފް އާރޓްސް އެންޑް ކަލްޗަރ ޔުމްނާ މައުމޫނެވެ. މި ރަސްމިއްޔާތުގައި އިންފޮމޭޝަން ކޮމިޝަނަރު ހުސެއިން ފިޔާޒު ގެ އިތުރުން ޕީއެސްއެމްގެ އެމްޑީ އަލީ ހާލިދުވެސް ބައިވެރިވެވަޑައިގެންނެވި އެވެ.

ރަށްފުށުގެ ވެށީގެ ގިނަ ނަންތަކެއް ހިމަނައިގެން ވެށީގެ މައުލޫމާތުތައް ހިމެނޭ ގޮތައް ލިޔެފައިވާ "މަވެށި" ވާހަކަ ފޮތްބަޔަކީ ކުޑަކުދިންނަށް ޙާއްސަކޮށްގެން ލިޔެފައިވާ، ފޮތްބައިގައި ހިމެނޭ ފަސް ވާހަކަ ފޮތަކީ ”އެކުވެރި ތިން މިޔަރު“، ”ބުއްދިވެރި ފިނދަނަ“، ”ނަސީބުދެރަ ކޮވެލި“، ”ކިބުރުވެރި ބުޅާ“، ”ކޮކާލުގެ ހުވަފެން“ އެވެ. މި ވާހަކަތައް ނެރެފައިވަނީ ”މަވެށި“ ސީރިސްގެ ނަމުގަ އެވެ.

މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ޔުމްނާ ވިދާޅުވީ ކުޑަކުދިންނަށް ހާއްސަކޮށް ދިވެހިން ވާހަކަ ފޮތްތައް ނެރުން ވަރަށް މުހިންމު ކަމަށާޢި އެއީ އަބަދުވެސް ހިތްވަރު ދެއްވާނެ ކަމެއް ކަމަށެވެ. ކުޑަކުދިން އަބަދު އިނގިރޭސި ވާހަކަ ދައްކައި ދިވެހި ބަސް ދެކެ ފޫހިވަމުންދާއިރު މިފަދަ ވާހަކަ ފޮތްތަކުން ކުދިންގެ ހިތްތަކުގައި ދިވެހި ބަހަށް ޝައުގުވެރިކަން އުފެއްދޭނެ ކަމަށް މިނިސްޓަރު ވިދާޅުވި އެވެ. އަދި ލިއުމުގެ ގޮތުން ދިވެހި ބަހުގެ ހަމަތަކާއި ފޮތުގެ ފެންވަރު ރަނގަޅު ފޮތް ބަޔެއް ދިވެހި ބަހުން ނެރެދެއްވިކަމަށް ޓަކައި ޝުކުރު އަދާކުރައްވާފައެވެ.

ވާހަކަ ފޮތް ބަޔާ ގުޅޭ ގޮތުން ވާހަކަ ދައްކަަވަމުން ފޮތުގެ މުސައްނިފް ހުސައިން ޝަހުދީ ވިދާޅުވީ އެ ވާހަކަތަކަކީ އޭނާގެ ދަރިންނަށް ނިދާ ގަޑީގައި ކިޔައިދިން ވާހަކަތަކެއް ކަމަށެވެ. ވާހަކައެއް ސިފައެއްގައި ފޮތްތައް ލިޔުނީ އެހެން ކުދިންނަށް ވެސް އެ މެސެޖްތައް ފޯރުކޮށްދެން ބޭނުންވާތީ ކަމަށާއި ޖަޒީރާ ވެށީގައި ހިމެނޭ ނަންތަކާއި ދޫނި ސޫފާސޫފި އަދި ވެށީގައި އުޅޭ ދިރޭތަކެތީގެ ނަންތަކަށް ކުދިން އަހުލުވެރި ކުރުމުގެ ބޭނުމުގަ އެވެ.

”މަވެށި“ގެ ކޮންމެ ވާހަކައެއްގައި ވެސް އިބްރަތަކާއެކު އާ ބަސްތައް ދަސްކޮށްދީފައިވެ އެވެ. އަދި ތިމާވެށީގެ މުހިންމުކަން ފާހަގަކޮށްދީފައިވެ އެވެ. މި ވާހަކަ ފޮތްތައް ފަރުމާކޮށްފައިވަނީ ޒަމާނާއި ގުޅޭހެން ކުލަގަދަ ގިނަ ކުރެހުންތަކާއެކު ޝައުގުވެރި ފެންވަރު ރަނގަޅު ގޮތަކަށެވެ.

ހަނިމާދޫ ދާއިރާގެ ކުރީގެ މެންބަރު ހުސެއިން ޝަހުދީ ކުޑަކުދިންނަށް ހާއްސަކޮށް ލިޔުއްވާފައިވާ ވާހަކަ ފޮތްތައް ނެރެ ވިއްކަންވަނީ ފަށާފަ އެވެ. މި ވާހަކަ ފޮތްތައް މިހާރު މާލޭގެ ބުކްޝޮޕްތަކުން ލިބެން ހުންނާނެ ކަމަށް ވާހަކަ ޕަބްލިޝާސްއިން ބުނެ އެވެ.