ސްވިސް އެއާގެ ބޯޓެއްގެ އިންޖީނުގައި އަލިފާން ރޯވެ، 6 މީހަކަށް އަނިޔާވެއްޖެ

އިންޑިއާގެ ވެރިރަށް ދިއްލީގެ އިންދިރާ ގާންދީ އިންޓަނޭޝަނަލް އެއާޕޯޓުން ފުރަން އުޅުނު ސްވިސް އިންޓަނޭޝަނަލް އެއާލައިންސްގެ ބޯޓެއްގެ އިންޖީނުގައި އަލިފާން ރޯވެ، 6 މީހަކަށް އަނިޔާވެއްޖެއެވެ.

މި ހާދިސާގައި ހިނގައިފައިވަނީ އިންޑިއާ ގަޑިން ރޭ ދަންވަރު 1:08 ގައެވެ. އަދި ހަ ފަސިންޖަރަކަށް އެކިވަރުގެ އަނިޔާ ލިބިގެން ހޮސްޕިޓަލުގައި ދަނީ ފަރުވާދެމުންނެވެ.

ހާދިސާ ހިނގައިދިޔަ ގޮތް ފެންނަ ވީޑިއޯ

ދިއްލީން ސްވިޒަލޭންޑްގެ ޒިއުރިކަށް ދަތުރުކުރުމަށް ހަމަޖެހިފައި އޮތް ފްލައިޓް ނަންބަރު އެލްއެކްސް 147، އެއާބަސް އޭ-330 މަރުކާގެ ބޯޓުގެ އިންޖީނަށް މައްސަލައެއް ދިމާވީ މިއަދު ފަތިހު 1:08 ހާއިރު ރަންވޭމަތިން ނައްޓާލަން ދުއްވަމުން ދަނިކޮށެވެ. އިންޖީނުން އަލިފާން ފެނުމާއެކު، ޕައިލެޓުން ވަނީ ވަގުތުން ޓޭކް-އޮފް މެދުކަނޑާލައި، ފަސިންޖަރުން ރައްކާތެރިކަމާއެކު ބޭލުމުގެ މަސައްކަތް ފަށާފައެވެ.

މި ބޯޓުގައި ޖުމްލަ 228 ފަސިންޖަރުންނާއި 4 ތުއްތު ކުދިން ތިއްބެވެ. އެއާލައިނުން މައުލޫމާތު ދީފައިވާ ގޮތުގައި، ގިނަ ފަސިންޖަރުން ބާލާފައިވަނީ ކުއްލި ހާލަތްތަކުގައި ބޭނުންކުރާ އިމަޖެންސީ ސްލައިޑްތައް މެދުވެރިކޮށެވެ. ނަމަވެސް، ސްލައިޑް ބޭނުންކުރަން އުނދަގޫވި ބައެއް ފަރާތްތަކަށް ސިޑި މެދުވެރިކޮށް ބޯޓުން ފޭބުމުގެ އިންތިޒާމް ހަމަޖައްސައިދީފައިވާ ކަމަށް އޮފިޝަލުން ވިދާޅުވިއެވެ.

ސްވިސް އެއާލައިންސް އިން ނެރުނު ބަޔާނެއްގައި ބުނެފައިވަނީ، ހާދިސާގައި އަނިޔާވި ފަސިންޖަރުންނަށް ބޭނުންވާ އެހީތެރިކަން ފޯރުކޮށްދެމުންދާ ކަމަށާއި، ބޯޓުގެ ކުރޫއަށް އެއްވެސް ގެއްލުމެއް ލިބިފައިނުވާ ކަމަށެވެ. އަދި ބޯޓުން ބޭލި ފަސިންޖަރުންނަށް ބޭނުންވާ ހޮޓާ އަދި ދަތުރުފަތުރުގެ ކަންކަން ހަމަޖެއްސުމަށް އެއާލައިންގެ ޓީމުތަކުން ދަނީ މަސައްކަތް ކުރަމުންނެވެ.

މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ސްވިސް އެއާލައިންގެ ޓެކްނިކަލް މާހިރުންގެ ޓީމެއް ދިއްލީއަށް ދަތުރުކުރުމަށް ވަނީ ހަމަޖެހިފައެވެ. އެއާލައިނުން ބުނި ގޮތުގައި، މި މައްސަލަ ތަހުގީގު ކުރުމުގައި އިންޑިއާގެ ކަމާބެހޭ ފަރާތްތަކާ ގުޅިގެން ފުރިހަމައަށް މަސައްކަތް ކުރާނެ ކަމަށާއި، ފަސިންޖަރުންގެ ސަލާމަތާއި ރައްކާތެރިކަމަކީ އެ ކުންފުނިން އެންމެ އިސްކަންދޭ ކަންތައް ކަމަށެވެ.