އިންޑިއާގައި ދަރިމައިވުމުގެ ނިސްބަތް، އާބާދީ ދެމެހެއްޓޭ މިންވަރަށްވުރެ ދަށަށް

އިންޑިއާގެ ތާރީޚުގައި ފުރަތަމަ ފަހަރަށް އެ ޤައުމުގެ ދަރިމައިވުމުގެ ނިސްބަތް އާބާދީ މަދުނުވެ ހިފެހެއްޓުމަށް ބޭނުންވާ މިންގަނޑަށްވުރެ ތިރިއަށް ގޮސް މުސްކުޅި މުޖުތަމަޢަކަށް ބަދަލުވެދާނެ ކަމުގެ ކަންބޮޑުވުން އުފެދިއްޖެއެވެ.

އިންޑިއާގެ ރެޖިސްޓްރާ ޖެނެރަލް އެންޑް ސެންސަސް ކޮމިޝަނަރުގެ އޮފީހުން މިދިޔަ މަހު ނެރުނު ސާމްޕަލް ރެޖިސްޓްރޭޝަން ސިސްޓަމް (އެސްއާރުއެސް) ރިޕޯޓުގައިވާ ގޮތުން އަންހެނުން ދަރިމައިވާ ރެޓް ވަނީ ވަރަށްބޮޑުތަނުން ދަށަށް ގޮސްފައެވެ.

ތަޖުރިބާކާރުން ފާހަގަކުރާ ގޮތުގައި ތަޢުލީމު ހޯދުމަށް ހުރި ގޮންޖެހުންތަކާއި ދަރިން ނުލިބޭނެ ގޮތް ހެދުމުގެ ވަސީލަތްތައް ފަސޭހައިން ލިބުމާއި ދަރީން ބެލެހެއްޓުމުގެ ޚަރަދު ބޮޑުވުމަކީ ދަރިމައިވުމުގެ ނިސްބަތް ދަށަށް ދާން މެދުވެރިވި މައިގަނޑު ސަބަބުތަކެވެ. ހަމައެއާއެކު ތުއްތު ކުދީން މަރުވާ ނިސްބަތް ދަށްވުމުން ގިނައިން ދަރީން ހޯދުމުގެ ބޭނުންވެސް ކުޑަވެފައިވެއެވެ. އެސްއާރުއެސް ހިސާބުތައް ދައްކާ ގޮތުގައި ތުއްތު ކުދީންގެ މަރުގެ ނިސްބަތްވެސް ވަނީ ދަށަށް ގޮސްފައެވެ.

އިންޑިއާގެ ޑިވެލޮޕްމެންޓް އިކޮނޮމިސްޓެއް ކަމުގައިވާ ޑީޕާ ސިންހާ އަލް ޖަޒީރާއާ ވާހަކަދައްކަވަމުން ވިދާޅުވެފައިވަނީ، ދަރިމައިވުމުގެ ނިސްބަތް ދަށަށްދަނީ ގިނަ ފަހަރު މުޖުތަމަޢުގައި ގިނަ އަންހެނުންނަށް ތަޢުލީމާއި ދަރިން ނުލިބޭނެ ވަސީލަތްތަކާއި ގޭތެރޭގެ ނިންމުންތަކުގައި ބާރު ލިބޭ ހިސާބުން ކަމަށެވެ. އަދި އިޤުތިޞާދު އަގުބޮޑުވުމުން ދަރީން ބެލެހެއްޓުމުގެ ހަރަދުތައްވެސް ބޮޑުވަމުން އަންނަ ކަމަށް އޭނާ ވިދާޅުވިއެވެ.

ޤައުމުގެ އެކި ސަރަހައްދުތަކުގައި މި ނިސްބަތް ވަރަށް ބޮޑަށް ތަފާތެވެ. ތަޢުލީމީ ފެންވަރު ދަށް އަދި ތުއްތު ކުދިން މަރުވާ ނިސްބަތް އެންމެ ބޮޑަށް އުޅޭ އެއް ސްޓޭޓަކީ ބިހާރެވެ. އެގޮތުން އެ ސްޓޭޓްގައި ވިހެއުމުގެ ތެރޭގައި ތުއްތުކުދިން މަރުވާ ރޭޓް 2.9 ގައި ހުރި އިރު އުއްތަރް ޕްރަދޭޝްގައި މި ރޭޓް ހުރީ 2.6 ގައެވެ. އިންޑިއާގެ ވެރިރަށް ނިއު ދިއްލީއަށް ބަލާއިރު މި ރޭޓް 1.2 އަށް ވެއްޓިފައިވާ އިރު ތަޢުލީމާއި ޞިއްޙީ ނިޒާމު ރަނގަޅު ދެކުނުގެ ޓެމިލް ނާޑޫ އާއި ކެރެލާ ފަދަ ސްޓޭޓްތަކުގައި މި ރޭޓް ހުރީ 1.3 ގައެވެ.