”އާޝޫރާ ދުވަހުގެ ހާދިސާއިން އެނގެނީ اللهގެ މަގަށް ރުޖޫޢަވެގެން މެނުވީ ދެ ދުނިޔޭގައި ވެސް ސަލާމަތެއް ނެތްކަން“

މުޙައްރަމު މަހުގެ ދިހަވަނަ ދުވަހަކީ ނުވަތަ ޢާޝޫރާ ދުވަހަކީ އިސްލާމީ ތާރީޚުގައި ނުހަނު މާތް، އަދި އެތައް ޢިބުރަތްތަކަކާއި ފިލާވަޅުތަކެއް ލިބިދޭ ދުވަހެއްކަން މިއަދުގެ ހުކުރު ޚުޠުބާގައި ބުނެފިއެވެ.

މިއަދުގެ ޚުޠުބާ ޚާއްސަކޮށްފައިވަނީ ޢާޝޫރާ ދުވަހުގެ މާތްކަމާއި، އެ ދުވަހު ރޯދަހިފުމުގެ މުހިންމުކަމުގެ މައްޗަށެވެ. ޚުޠުބާގައި ބަޔާންކޮށްފައިވާ ގޮތުގައި، ޢާޝޫރާ ދުވަހަކީ އަނިޔާވެރި ފިރުޢައުނުގެ ކިބައިން މޫސާގެފާނާއި އެކަލޭގެފާނަށް ތަބާވީ މީހުން މާތް الله ސަލާމަތްކޮށްދެއްވި ދުވަހެވެ. އަދި ފިރުޢައުނާއި އޭނާގެ ލަޝްކަރު ޣަރަޤުކުރެއްވީ ވެސް ހަމަ މި ދުވަހުއެވެ. މި މަތިވެރި ނިޢުމަތަށްޓަކައި ޝުކުރުވެރިވުމުގެ ގޮތުން މޫސާގެފާނު އެ ދުވަހު ރޯދަހިއްޕެވިކަން ޚުޠުބާގައި ފާހަގަކުރިއެވެ.

މުޙައްރަމު މަހަކީ الله ޙުރުމަތްތެރިކުރައްވާފައިވާ ހަތަރު މަހުގެ ތެރޭގައި ހިމެނޭ މައްސަރެއްކަން ފާހަގަކޮށް، ޚުޠުބާގައި ބުނީ، ކީރިތި ރަސޫލާ ﷺ މަދީނާއަށް ހިޖުރަކުރެއްވިއިރު ޔަހޫދީން އެ ދުވަހު ރޯދަހިފާތީ ފެނިވަޑައިގެން ސުވާލުކުރެއްވުމުން، އެއީ މޫސާގެފާނު ސަލާމަތްވީ ދުވަސްކަމަށް ބުނުމުން، "މޫސާގެފާނަށްޓަކައި ތިޔަބައިމީހުންނަށްވުރެ އެކަންކުރުން ޙައްޤުކަން ބޮޑީ ތިމަންކަލޭގެފާނަށެވެ" ހަދީޘްކުރައްވައި އެ ދުވަހު ރޯދަހިފުމަށް އަމުރުކުރެއްވި ކަމަށެވެ.

ޢާޝޫރާ ދުވަހުގެ ރޯދައިގެ ސަވާބާ ބެހޭގޮތުން ޚުޠުބާގައި ބުނީ، އެ ދުވަހު ރޯދަހިފުމަކީ ވޭތުވެދިޔަ އަހަރުގެ ކުދި ފާފަތައް ފުއްސަވައިދެއްވާނެ ކަމެއް ކަމަށް ރަސޫލާ ﷺ ޙަދީޘްކުރައްވާފައިވާ ކަމަށެވެ. އަދި ރޯދަހިފުމުގައި ޔަހޫދީންނާ ޚިލާފުވުމުގެ ގޮތުން، ޢާޝޫރާ ދުވަހުގެ ކުރިން ދުވަހެއް (9 ވަނަ ދުވަސް) ނުވަތަ ފަހުން ދުވަހެއް (11 ވަނަ ދުވަސް) ހިމަނައިގެން ރޯދަހިފުމަށް އިރުޝާދު ދިނެވެ.

ޚުޠުބާގައި އިތުރަށް ބުނި ގޮތުގައި، މި ފަދަ ތާރީޚީ ޙާދިސާތަކުން އެނގެނީ މުޞީބާތްތަކުން ސަލާމަތްވެވޭނީ އީމާންކަމާއި އިސްލާމްކަމުން ކަމެވެ. އަދި الله އަށް ކާފިރުވެ، ދުނިޔެ ފަސާދަކުރަން އުޅޭ މީހުންނަށް އެކަލާނގެ ގަދަފަދަ ޢަޛާބު ދެއްވާނެކަމެވެ.

މީގެ އިތުރުން، ޢާޝޫރާ ދުވަހާ ގުޅުވައިގެން މުޖުތަމަޢުގެ ތެރޭގައި ފެތުރޭ ބައެއް ބިދުޢަތަކާއި، ދީނާ ޚިލާފު އާދަކާދަތަކަށް ޚުޠުބާގައި ވަނީ އިންޒާރު ދީފައެވެ. ވަކިން ޚާއްޞަކޮށް، މީހަކު މަރުވުމުން ހިތާމަކުރުމުގެ ގޮތުން ހަށިގަނޑަށް އަނިޔާކުރުމާއި، ދީނުގައި ނެތް ކަންކަން ކުރުމަކީ ރަސޫލާ ﷺ ނަހީކުރައްވާފައިވާ ކަންކަން ކަމުގައި ޚުޠުބާގައި ހަނދާންކޮށްދިނެވެ.

ޚުޠުބާ ނިންމާލީ، މިފަދަ ބިދުޢަތަކުން ދުރުހެލީވެ، ސުންނަތާ އެއްގޮތަށް ރޯދަހިފައި، اللهގެ ޙަޟުރަތާ ކުއްތަންވުމަށް މަސައްކަތް ކުރުމަށް ހުރިހާ މުސްލިމުންނަށް ގޮވާލަމުންނެވެ.