ދަރަންޏެއް ނަގަން ޖެހިއްޖެ ހާލުގައިވެސް ރިބާ ހިމެނޭ ދަރަނިތަކާ ދުރުހެލިވޭ: ހުކުރު ޚުތުބާ

ދަރަންޏެއް ނަގަން ޖެހޭ ފަދަ ހާލަތެއް މެދުވެރިވެއްޖެ ނަމަ، ރިބާ އެކުލެވޭ ދަރަނިތަކާ ދުރުހެލިވުމަށް މިއަދުގެ ހުކުރު ޚުތުބާގައި މުޅި ރާއްޖޭގެ މުސްލިމުންނަށް ގޮވާލައިފިއެވެ.

ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުތުބާ ޚާއްޞަކޮށްފައިވަނީ "މާލީ މުޢާމަލާތުތަކުގައި ތެދުވެރިވުން" މި މައުޟޫޢަށެވެ. ޚުތުބާގައި ބަޔާންކޮށްފައިވާ ގޮތުގައި މުދަލަކީ الله ތަޢާލާ އިންސާނާއާ ހަވާލުކުރައްވާފައިވާ އަމާނާތެކެވެ. އަދި ޤިޔާމަތް ދުވަހުން އެ މުދާ ހޯދި ގޮތާއި ހޭދަކުރި ގޮތާ މެދު ސުވާލުވެވޭނެ ކަމަށް ހަނދާންކޮށްދީފައިވެއެވެ.

ޚުތުބާގައި ފާހަގަކުރި ގޮތުގައި މުދާ ހޭދަކުރުމުގައި އިސްރާފުނުކުރުމާއި، ދަހިވެތިނުވެ މެދުމިންކަން ޚިޔާރުކުރުމަކީ މުދަލުގައި ބަރަކާތް ލައްވާނޭ ކަމެކެވެ. އަދި ދިރިއުޅުމުގައި ކުރިމަތިވެދާނެ ކުއްލި ކަންކަމަށާއި އަތްމަތި ދަތިވާ ހާލަތްތަކަށް ވިސްނައި، މުސްތަޤުބަލަށްޓަކައި ފަހަށް ރައްކާކުރުމަކީ ސަލާންޖެހުން ފަދަ ކަންކަމުން ރައްކާތެރިކޮށްދޭނެ ކަމެއް ކަމަށް ވެސް ބުނެފައިވެއެވެ.

ބޭނުމެއް ނެތި އަދި އަދާކުރެވޭނެ ގޮތެއް ނެތި ދަރަނި ނެގުމުގައި ހައްދުފަހަނައަޅައި ދިއުމުގެ ނުރައްކާތެރިކަމަށް އަލިއަޅުވާލަމުން ޚުތުބާގައި ބުނީ، "ދަރަންޏަކީ ދަރަނިވެރިޔާގެ ބޮލުގައި އެޅިފައިވާ އަމާނާތެއް" ކަމަށެވެ. އަދި ދަރަނި ނަގަންވާނީ ކޮންމެހެން އެކަމަށް ބޭނުންވެ، އެ އަދާކުރެވޭނެ މަގު ތަނަވަސްވެފައިވާ ނަމަ ކަމަށާއި، ދަރަންޏެއް ނަގަން ޖެހިއްޖެ ހާލަތެއްގައި ވެސް ރިބާގެ މުއާމަލާތްތަކާ މުޅިން ދުރުހެލިވާން ޖެހޭނެ ކަމަށް ޚުތުބާގައި ވަނީ ބުނެފައެވެ. އެއީ ރިބާ ކާމީހާއަށާއި، އެކަމުގައި އެހީތެރިވެ ހެކިވާ މީހުންނަށް ރަސޫލާ ޞައްލަالله ޢަލައިހި ވަސައްލަމަ ލަޢުނަތް ލައްވާފައިވާތީއެވެ.

ރިބާގެ މުޢާމަލާތްތަކުން ދުރުހެލިވުމަކީ ކޮންމެ މުސްލިމެއްގެ މައްޗަށް ވާޖިބުވެގެންވާ ކަމެކެވެ. މާތް ނަބިއްޔާ ﷺ ގެ އަރިހުން جَابِرُ رَضِيَ اللهُ عَنْهُ ރިވާކުރައްވައިފައި ވެއެވެ. (لَعَنَ رَسُوْلُ اللهِ صَلَّى اللهُ عَلَيْهِ وَسَلَّمَ آكِلَ الرِّبَا، وَمُوْكِلَهُ، وَشَاهِدَهُ وَكَاتِبَهُ) މާނައީ: "ރިބާ ކާ މީހާއަށާއި، ރިބާގެ ގޮތުގައި ފައިސާއާއި މުދާ ދޫކުރާ މީހާއަށާއި، އެ މުޢާމަލާތުގައި ހެކިވެރިވާ މީހާއަށާއި، އެ މުޢާމަލާތްތައް ލިޔާ މީހާއަށް، رَسُوْلُ اللهِ صَلَّى اللهُ عَلَيْهِ وَسَلَّمَ ލަޢުނަތްލެއްވިއެވެ."

މީގެއިތުރުން، ވިޔަފާރިއާއި ކުއްޔަށް ދިނުން ފަދަ މާލީ އެންމެހައި އެއްބަސްވުންތަކަށް އިޙުތިރާމުކޮށް ވަފާތެރިވުމަށާއި، ތިމާ ބަލަހައްޓަންޖެހޭ އަނބިދަރިންނަށް ޚަރަދުކުރުމަކީ މަތިވެރި އަޅުކަމެއް ކަމަށް ޚުތުބާގައި ހަނދާންކޮށްދިނެވެ. އަދި ތެދުވެރި، އަމާނާތްތެރި ވިޔަފާރިވެރިން ޤިޔާމަތް ދުވަހު ވާހުށީ ނަބިއްޔުންނާއި ޞިއްދީޤުންނާއި ޝަހީދުންނާ އެކުގައި ކަމަށް ވެސް ބުންޏެވެ.

މިއަދުގެ ޚުތުބާ ނިންމާލަމުން ވަނީ، މާތްވެގެންވާ މައްކާއާއި މަދީނާގެ ޙުރުމަތް ކަނޑައި، ޙޫޘީން ދެމުންދާ އަނިޔާވެރި ލާއިންސާނީ ހަމަލާތަކާއި އިންޒާރުތައް ހަރުކަށި އިބާރާތުން ކުށްވެރިކޮށްފައެވެ.