ދިރިއުޅުމުގެ ދަތިތަކާއި ތަކުލީފުތަކަކަށް އޮތް އެންމެ ފުރިހަމަ ފަރުވާއަކީ ގިނަގިނައިން މާތް الله ހަނދުމަކުރުން: ޚުތުބާ

މިއަދުގެ ދިރިއުޅުމުގައި ކުރިމަތިވާ ހާސްކަމާއި، ނަފުސާނީ އެކި ގޮންޖެހުންތަކާއި ތަކުލީފުތަކަށް އޮތް އެންމެ މަތިވެރި އަދި އެންމެ ފުރިހަމަ ފަރުވާއަކީ ގިނަގިނައިން މާތް الله ހަނދުމަކުރުން ކަމަށް މިއަދުގެ ހުކުރު ޚުތުބާގައި ބުނެފިއެވެ.

ރާއްޖޭގެ އެކި ކަންކޮޅުތަކުގައި މިއަދު އިއްވި "ގިނަ ގިނައިން الله ހަނދުމަކުރުން" މި މައުޟޫއުގެ ޚުތުބާގައި ބުނީ، މިއަދު އަހަރެމެން ވޭތިކުރަމުން މިދަނީ ދިރިއުޅުމުގެ ދަތިތަކާއި ފިކުރުތައް ގިނަ ދުވަސްތަކެއް ކަމަށާއި ނަމަވެސް، ޛިކުރުކުރުމަކީ ހިތްތަކަށް ހަމަޖެހުމާއި އުފާވެރިކަން ގެނެސްދީ ހާސްކަން ފިލުވައިދޭނެ ކަމެއް ކަމަށެވެ.

މިކަމާ ގުޅޭގޮތުން ކީރިތި ޤުރުއާނުގެ ރަޢްދު ސޫރަތުގެ 28 ވަނަ އާޔަތުގައިވާ ވަޙީ ބަސްފުޅުގެ މާނާގައިވެއެވެ. "އެއުރެންނީ، إيمانވި މީހުންނެވެ. އަދި اللَّه ހަނދުމަކުރުމުން، އެއުރެންގެ ހިތްތައް ހަމަޖެހޭ މީހުންނެވެ. ހިތްތައް ހަމަޖެހެނީ، اللَّه ހަނދުމަކުރުމުން ނޫންހެއްޔެވެ“.

ޚުތުބާގައި ބަޔާންކުރި ގޮތުގައި، މާތް الله ހަނދުމަކުރުން މައިގަނޑު ތިން ބަޔަކަށް ބެހިގެންވެއެވެ. އެއީ؛

- ހިތުގެ އިޚްލާޞްތެރިކަމާއެކު ހަނދުމަކުރުން

- ދުލުން ތަސްބީޙަ ކިޔައި، ޤުރުއާން ކިޔަވައި ޛިކުރުކުރުން

- ނަމާދާއި ރޯދަ ފަދަ އަޅުކަންތަކާއި މީސްތަކުންނަށް އެހީތެރިވުން ފަދަ ހެޔޮ ޢަމަލުތަކުގެ ޒަރީޢާއިން ޢަމަލީ ގޮތުން ހަނދުމަކުރުން.

ޛިކުރުކުރާ މީހާއާއި ޛިކުރުނުކުރާ މީހާގެ ތަފާތު ބަޔާންކޮށްދެއްވަމުން ކީރިތި ރަސޫލާ ﷺ ޙަދީޘްކުރައްވާފައިވާ ބަސްފުޅެއްގައި ވެއެވެ.

(مَثَلُ الَّذِيْ يَذْكُرُ رَبَّهُ وَالَّذِيْ لَا يَذْكُرُ، مَثَلُ الْـحَيِّ وَالْمَيِّتِ)

މާނައީ: "އެ މީހެއްގެ ވެރިރަސްކަލާނގެ ހަނދުމަކުރާ މީހާއާއި، އެކަލާނގެ ހަނދުމަނުކުރާ މީހާގެ މިސާލަކީ، ދިރިހުރި މީހަކާއި މަރުވެފައިވާ މީހެއްގެ މިސާލެވެ."

ހަމައެއާއެކު، މާތް اللهގެ ޙަޟްރަތަށް އަޅަކު ކުއްތަންވާ މިންވަރަކުން، އެކަލާނގެ ރަޙުމަތާއި މަދަދު މާ ދީލަތިކޮށް ދެއްވާނެކަން ޤުދުސިއްޔަ ޙަދީޘުން އެނގޭ ކަމަށާއި، ކޮންމެ ވަގުތެއްގައި އަދި ކޮންމެ ޙާލަތެއްގައި ވެސް الله ހަނދުމަކުރުންމަތީ ދޫ ތެތްކޮށް ބެހެއްޓުމަށް ރަސޫލާ ﷺ އިރުޝާދު ދެއްވާފައިވާ ކަމަށް ޚުތުބާގައި ހަނދާންކޮށްދިނެވެ.

އެކަލޭގެފާނު ޙަދީޘްކުރެއްވިއެވެ:

(لَا يَزَالُ لِسَانُكَ رَطْبًا مِنْ ذِكْرِ اللَّهِ)

މާނައީ: "މާތްالله ހަނދުމަކުރުމުން ތިބާގެ ދޫ އަބަދުވެސް ތެތްކަންމަތީ ބާއްވާށެވެ."

ޚުތުބާ ނިންމާލަމުން ވަނީ، ހަމައެކަނި ދުލުން ކިޔާލުމުގެ ބަދަލުގައި ހިތް ހާޒިރުކޮށްގެން ޛިކުރުކުރުމަށާއި، ފާފަތަކާ ދުރުހެލިވުމަށާއި، ހެނދުނާއި ހަވީރުގެ ދުޢާތަކާއި ނަމާދުގެ ފަހުން ކުރާ ޛިކުރުތަކަށް ރައްކާތެރިވުމަށް ނަސޭހަތްތެރިވެފައެވެ.