ވީއައިއޭގެ އައު ޓާމިނަލާއި އެކު ރާއްޖޭގެ އިގުތިޞާދު 5.2 އިންސައްތަ މައްޗަށް

ވޯލްޑް ބޭންކުން އާންމު ކޮށްފައިވާ "މޯލްޑިވްސް ޑިވެލޮޕްމަންޓް އަޕްޑޭޓް" ރިޕޯޓުގައިވާ ގޮތުން، ރާއްޖޭގެ ވައިގެ ބަނދަރު، ވެލާނާ އިންޓަރނޭޝަނަލް އެއަރޕޯޓު (ވީއައިއޭ) ގެ އައު ޓާމިނަލް ހުޅުވުމާއެކު މި އަހަރު ރާއްޖޭގެ އިގުތިޞާދު 5.2 އިންސައްތައިން ކުރިއަރާނެ ކަމަށް ވޯލްޑް ބޭންކުން ލަފާކޮށްފިއެވެ.

މި ރިޕޯޓުގައި ވޯލްޑް ބޭންކުން ލަފާކޮށްފައިވާ ގޮތުން، އައު ޓާމިނަލްގެ ޚިދުމަތްތައް ފެށުމާއިއެކު ފަތުރުވެރިންގެ އަދަދު އިތުރުވެ، އިގުތިޞާދަށް ބޮޑު ކުރިއެރުމެއް ލިބޭނެކަމަށެވެ. ހަމަ މިއާއިއެކު، އިގުތިޞާދީގޮތުން ގިނަ ގޮންޖެހުންތަކަކާއި ރާއްޖެ ކުރިމަތިލާންޖެހޭނެކަމަށް ވެސް ފާހަގަކޮށްފައި ވެއެވެ. ސަބަބަކީ ބައިނަލްއަގުވާމީ ބާޒާރުގައި އަގުތައް އުފުލުމާއި، މިއަހަރާއި އަންނަ އަހަރު އަނބުރާ ދައްކަންޖެހޭ ލޯނުތައް ހުރުން ފަދަ ކަންކަމެވެ.

މިކަންކަމުގެ ސަބަބުން ރާއްޖެއަށް އެއްޗެހި އެތެރެ ކުރުމަށް ހުރަސްއެޅި، ރައްޔިތުންނަށް ބޭނުންވާ ރާއްޖެއިން ބޭރުން އެތެރެކުރާ ސާމާނު ލިބުމަށް ދަތިވުން އެކަށީގެންވެއެވެ. އެއްޗެހި އެފެއްދުމުގެ އަގާއި އެކު އެއްޗެހީގެ އަގު މަތުވުމަކީ އާންމު ރައްޔިތުންނަށް ލިބޭ މުސާރައިން ގޭގޭ ޚަރަދު ހިފެހެއްޓުމަށް ދަތިވާކަމެކެވެ.

އެހެންނަމަވެސް، ސަރުކާރުގެ ޚަރަދުތައް މި ވަގުތުން ކުޑަކުރުމަށް ފިޔަވަޅުތައް އަޅައިފިނަމަ ކުރިއެރުން ލިބޭނެކަމަށް ވޯލްޑް ބޭންކުން ފާހަގަކުރެއެވެ. ބަޖެޓަށް ގެންނަ ބަދަލުތަކުން ވަޒީފަވެރިންގެ މުސާރައަށްވެސް އަސަރު ކޮށްފާނެކަމަށް ފާހަގަކޮށް ވޯލްޑް ބޭންކިން ލަފާދެނީ ރައްޔިތުންނަށް ދަތި ނުވާ ގޮތަށް ޚަރަދުތައް ހަމަޖެއްސުމެވެ. މިފަދަ ބަދަލުތަކާއި އެކީ އިގުތިޞާދު ކުރިއަރާނެކަމަށް ވޯލްޑް ބޭންކުން ލަފާކުރެއެވެ.