ޑްރަގާއެކު ވީއައިއޭއިން އަތުލައިގަތް މީހާއަށް 50 އަހަރުގެ ޖަލު ހުކުމެއް އިއްވައިފި

ގއ. ކޫއްޑޫއަށް ދަތުރުކުރުމަށް ވެލާނާ އިންޓަރނޭޝަނަލް އެއާޕޯޓުގެ ޑިޕާޗާ ޗެކް ޕޮއިންޓުން ބަލާފާސްކުރުމުގެ ތެރޭގައި މަސްތުވާތަކެތި ފެނުނު މީހާއަށް 50 އަހަރުގެ ޖަލުހުކުމެއް އިއްވައިފިއެވެ.

މި މައްސަލާގައި ށ. ނޫމަރާ ހަވީރީގެ ޢަބްދުﷲ ފަޞީހު މައްޗަށް ކްރިމިނަލް ކޯޓުން އިއްވާފައިވަނީ، ކެނެބިސް ޓްރެފިކް ކުރުމުގެ ކުށާއި ޑައިފޯމިން ޓްރެފިކް ކުރުމުގެ ދައުވާއެވެ. ދައުލަތުން އޭނާގެ މައްޗަށް ކުރި ދައުވާތައް ވަނީ ސާބިތުވެފައެވެ.

ވީއައިއޭ ޑިޕާޗާ ޗެކްޕޮއިންޓުން އޭނާ ބަލާފާސްކުރިއިރު، ފައިގެ ފަލަމަސްގަނޑުގައި ޑަކް ޓޭޕް ބޭނުންކޮށް ތަތްކޮށްފައިވާ ދެ ރަބަރު ޕެކެޓެއްގައި ޑައިފޯމިން ފޮރުވާފައި ހުއްޓެވެ. އަދި ފިލްމު ހުސްކުރި ދަޅުތަކެއްގެ ތެރޭގައި ކެނެބިސް ހުރިކަން ވަނީ ސާބިތުވެފައެވެ. ފަޞީހު ވަނީ އޭނާގެ މައްޗަށް ކުރި ދެ ދައުވާއަށް ވެސް އިންކާރުކޮށްފައެވެ. އެހެން ނަމަވެސް، ދައުލަތުން ހުށަހެޅި ހެއްކާއި ޤަރީނާގެ މައްޗަށް ބިނާކޮށް ކޯޓުން ނިންމީ ދެ ދައުވާ ވެސް ސާބިތުވާ ކަމަށެވެ.

ކެނެބިސް ޓްރެފިކް ކުރުމުގެ ކުށުގައި ކޯޓުން ހުކުމްކޮށްފައިވަނީ އުމުރު ދުވަހަށް ޖަލަށްލައި 100،000 ރުފިޔާއިން ޖޫރިމަނާ ކުރުމަށެވެ. އަދި ހަމައެހެންމެ ޑައިފޯމިން ޓްރެފިކް ކުރުމުގެ ކުށުގައި ވެސް އުމުރު ދުވަހުގެ ޖަލު ހުކުމަކާއި 100،000 ރުފިޔާގެ ޖޫރިމަނާއެއް ވަނީ ކޮށްފައެވެ.

ދެ ޖޫރިމަނާ ވެސް ދެއްކުމަށް 12 މަސް ދުވަހުގެ މުހުލަތެއް ކޯޓުން ދީފައިވެއެވެ. ޑައިފޯމިން ޓްރެފިކް ކުރުމުގެ ކުށުގެ ހުކުމުގައި ފަޞީހު މިހާތަނަށް ބަންދުގައި ހޭދަކުރި މުއްދަތު އުނިކުރަން ކޯޓުން އެންގި އިރު އެ މުއްދަތު ކެނޑުމުން އޭނާ ޖަލުގައި އިތުރަށް ހޭދަކުރަންޖެހެނީ 24 އަހަރާއި ހަތަރު މަސް ދުވަހެވެ.

ރާއްޖޭގެ މަސްތުވާތަކެއްޗާ ބެހޭ ޤާނޫނުތައް ހަރުކަށިކޮށް ބޮޑެތި އަދަބު ކަނޑައެޅިފައި ވާ އިރު، ރާއްޖެއަށް މަސްތުވާތަކެތި އެތެރެކުރާ މީހުންނަށް މަރުގެ ހުކުމް ވެސް އިއްވެވޭނެ ކަމަށް ޤާނޫނުގައި ވަނީ ބަޔާންކޮށްފައެވެ.