ރާއްޖޭގެ ސުކޫކުގެ އަގު މައްޗަށް ޖެހިލައިފި

ބައިނަލްއަޤްވާމީ ބާޒާރުގައި ރާއްޖޭގެ ސުކޫކުގެ އަގު މައްޗަށް ޖެހިލައިފިއެވެ.

މިކަމާ ގުޅޭގޮތުން ފިނޭންސް މިނިސްޓްރީން ބުނީ، އިގްތިސާދު ރަނގަޅުކުރުމަށް އެޅުނު ފިޔަވަޅުތަކުގެ ކާމިޔާބީއާއެކު ރާއްޖޭގެ ސުކޫކުގެ އަގު 87.44 އެމެރިކާ ޑޮލަރަށް އަރާފައިވާކަމަށެވެ. މިއީ މިއަހަރުގެ އޭޕްރިލްމަހުގެ ކުރީކޮޅު ސުކޫކުގެ އަގު ހުރި 64.72 އަދަދަށްވުރެ ބޮޑު ކުރިއެރުމެއްކަމަށް ފިނޭނުންސުން ފާހަގަކުރިއެވެ.

ފިނޭންސް މިނިސްޓްރީން ބުނީ ސުކޫކުގެ އަގު މައްޗަށްދިއުމަކީ ސަރުކާރުގެ މާލީ ސިޔާސަތުތަކާއި އިގްތިސާދީ އަސާސްތައް ހަރުދަނާކުރުމަށް ގެންގުޅޭ އުސޫލު ދައްކައިދޭ ކަމެއްކަމަށެވެ. ރާއްޖޭގެ ސުކޫކުގެ އަގު މައްޗަށް ޖެހިލާފައިވާއިރު، ސަރުކާރުން ވަނީ މިއަހަރުގެ މާޗްމަހުގެ ތެރޭގައި ނިމިގެންދިޔަ އެމްޑީޕީ ސަރުކާރުގައި ނެގި 100 މިލިއަން ޑޮލަރުގެ ލޯނެއް ދައްކާފައެވެ.

މި ލޯނު ނަގާފައިވަނީ، 2022 ވަނަ އަހަރު އެމެރިކާގެ ކާގިލް ފައިނޭންޝަލް ސަރވިސް އިންޓަނޭޝަނަލްއިންނެވެ. ބަޖެޓް ސަޕޯޓަށް އެ ލޯނު ނަގާފައިވަނީ، 7.15 އިންޓަރަސްޓް ރޭޓްގައި 3 އަހަރުދުވަހުގެ ތެރޭގައި އަގުއަދާކުރާގޮތަށް ކަމަށެވެ. ލޯނު ދައްކާ ނިންމާފައިވަނީ އިންޓަރެސްޓާއެކުގައެވެ. އެގޮތުން ލޯނު އަދާކޮށް ނިމުނުއިރު 100 މިލިއަން ޑޮލަރުގެ އިތުރުން 26 މިލިއަން ޑޮލަރު ވަނީ އިންޓަރސްޓްގެ ގޮތުގައި ދައްކާފައެވެ.

ކާގިލްގެ ލޯނު އަދާކުރުމުގެ އިތުރުން ސަރުކާރުން ވަނީ އޭޕްރިލްމަހުގެ ތެރޭގައި ސުކޫކް ކޫޕަން ޕޭމަންޓްވެސް ދައްކާފައެވެ. ފިނޭންސުން ބުނީ، ސުކޫކްގެ އަގު ބޮޑުވުމަކީ ސަރުކާރުގެ އިޤްތިސާދީ ސިޔާސަތުތަކާއި ދުނިޔޭގެ މާލީ މުޖުތަމައުއާ ގުޅިގެން ކުރާ މަސައްކަތުގެ ހެޔޮ އަސަރު ކަށަވަރުކޮށްދޭ ބައިނަލްއަގްވާމީ ބާޒާރުން ލިބުނު އިތުބާރުގެ ސާފު ވޯޓެއްކަމަށެވެ.