ހުޅުމާލޭގައި 15 ޕާކިން ބިލްޑިން އެޅުމަށް އެޗްޑީސީން ޓްރާންސްޕޯޓާއެކު އެމްއޯޔޫގައި ސޮއިކޮށްފި
ހުޅުމާލޭގައި 15 ޕާކިން ބިލްޑިންގ އެޅުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އާއިއެކު، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ސޮއިކޮށްފިއެވެ.
އެކަމަށްޓަކައި އުމަރު ޒާހިރު ބިލްޑިންގައި ބޭއްވި ރަސްމިއްޔާތުގައި ޓްރާންސްޕޯޓް މިނިސްޓްރީގެ ފަރާތުން ސޮއިކުރެއްވީ މިނިސްޓަރު މުހައްމަދު އަމީނެވެ. އަދި އެޗްޑީސީގެ ފަރާތުން ސޮއިކުރެއްވީ، އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރު އަމީން ވިދާޅުވީ މި ސަރުކާރު ވެރިކަމާ ހަވާލުވިއިރު، މަގުތައް ބޮއްސުންލައިގެން ގޮސްފައިވާކަމަށެވެ. މިހާތަނަށް ކުރި މަސައްކަތްތަކުން ހަރުދަނާ ބަދަލުތަކާއެކު އެދެވޭ ހައްލުތަކެއް މިކަމަށް އައިސްފައިވާއިރު، ޕާކިން ބިލްޑިންތަކާ އެކު ބޮޑު ހައްލެއް އަންނާނެ ކަމަށް މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ، މި ޕާކިން ބިލްޑިންތަކަކީ ރަޖިސްޓްރީ ކުރެވޭ ގޮތަށް ފަރުމާކުރާ ތަންތަން ކަމަށެވެ.
"މި މައްސަލައަށް ވަރަށް ބޮޑު ހައްލެއް އަޅުގަނޑު ގަބޫލުކުރާ ގޮތުގައި ލިބޭނެ. މި ޕާކިން ބިލްޑިންތަކަކީ ރަޖިސްޓްރީ ކުރެވޭ ގޮތަށް އަދި އެ ބޭނުންކުރައްވާ ބޭފުޅުން ބޭނުންކޮށް ނިމުނީމަ ގެންގޮސް ވައްދާނެ ގަރާޖެއް ގޮތުގައި ވެސް މި ޒަމާނަށް ފެތޭ، އަޅުގަނޑު ގަބޫލުކުރާ ގޮތުގައި މި ބިލްޑިންތައް އަޅާ ނިމޭއިރު ހުންނާނީ އޮޓޮމޭޝަންއާއެކީ އައިސްފައި. އެހެންވީމަ އެ ބޭނުންކުރާ ފަރާތްތަކަށް ޕާކް ކުރުމުގައި އުނދަގުލެއް ނުވާނެ."
މިނިސްޓަރު އަމީން ވިދާޅުވިއެވެ.
އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދު ވިދާޅުވީ، ޕާކިން ބިލްޑިން ހެދުމަށް ހަމަޖެހިފައިވަނީ، ވިޔަފާރީގެ އެކިއެކި ބޭނުންވެސް ކުރެވޭ ގޮތަށް ކަމަށެވެ. ޕާކިން ދެ އިމާރާތުގެ މަސައްކަތް ކުރިއަށްދާނީ ދެ ފިޔަވައްސަކަށް ބަހާލައިގެން ކަންވެސް ފަޒުލް ވިދާޅުވިއެވެ.
ޕާކިން ބިލްޑިންތަކުގައި ޖުމްލަ 3،920 ކާރު ސްލޮޓު އަދި 3،426 ސައިކަލު ޕާކްކުރާނެ ޖާގަ ދޫކުރާއިރު، އޭގެ ތެރެއިން 90 ޕަސެންޓް ދޫކުރަން ނިންމާފައިވަނީ ބީލަމުގެ އުސޫލުންނެވެ. ބާކީ 10 ޕަސެންޓް ދޫކުރުމަށް ހަމަޖެހިފައިވަނީ ޕާކިން ބިލްޑިންތަކުގެ ގްރައުންޑް އަދި އެންމެ މަތީ ފްލޯގައި ހަދާ ކެފޭ ނުވަތަ ރެސްޓޯރެންޓު އަދި ކުޅިވަރު ހޯލުތަކަށް ދާ މީހުންނަށްކަން ފާހަގަކޮށްލަން ޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
