މީގެ ފަހުން، އެޕެއް މެދުވެރިކޮށް ޓެކްސީގެ ހިދުމަތް ދޭ ނަމަ މިނިސްޓްރީގެ ހާއްސަ ހުއްދައެއް ހޯދަން ޖެހޭނެ

މޯބައިލް އެޕްލިކޭޝަނެއް މެދުވެރިކޮށް ޓެކްސީގެ ހިދުމަތް ދޭ ނަމަ، ޓްރާންސްޕޯޓް މިނިސްޓްރީގެ ހާއްސަ ހުއްދައެއް ހޯދަން މަޖުބޫރުކޮށް، ޓެކްސީ ގަވާއިދު އިސްލާހުކޮށްފި އެވެ.

ޓެކްސީ ގަވައިދު އިސްލާހުކޮށް އިއްޔެ ގެޒެޓު ކޮށްފައިވާއިރު، އެ ގަވާއިދުގެ 8 ވަނަ މާއްދާގެ (ހ) ގެ ފަހަތަށް (ނ) ގެ ގޮތުގައި އަކުރެއް ވަނީ އިތުރުކޮށްފައެވެ.

އޭގައި ބުނެފައިވާގޮތުން ޓެކްސީ ސެންޓަރު ހިންގުމުގެ ލައިސަންސް ދޫކޮށްފައިވާ ފަރާތްތަކުން މިނިސްޓްރީގައި ރަޖިސްޓަރީކޮށްފައިވާ ފޯނު ނަންބަރު ފިޔަވައި އެހެން ވަސީލަތެއް މެދުވެރިކޮށް ދަތުރު ހަމަޖެއްސުމުގެ ޚިދުމަތް ދޭން ގަސްތުކުރާ ނަމަ، އެފަދަ ޚިދުމަތެއް ފެށުމުގެ ކުރިން މިނިސްޓްރީއަށް ލިޔުމުން ހުށަހަޅައި، އެކަމުގެ ހުއްދަ ހޯދަންވާނެއެވެ.

އެހެން ވަސީލަތްތަކިގެ ގޮތުގައި ގަވާއިދުގައި ފާހަގަކޮށްފައިވަނީ ވެބްސައިޓް، އޮންލައިން ޕޯޓަލް ނުވަތަ މޯބައިލް އެޕްލިކޭޝަން އެވެ.

ގަވާއިދުގައި ވާގޮތުން، މިނިސްޓްރީގެ ހުއްދަ ލިބިފައިނުވާ އެއްވެސް ވަސީލަތެއް މެދުވެރިކޮށް، އެ ޚިދުމަތް ދިނުމަކީ، މަނާ ކަމެކެވެ.

މިކަމާ ގުޅިގެން މިނިސްޓްރީން ބުނީ، އެ ހުއްދަ ހޯދައިގެން ޑިޖިޓަލް ހިދުމަތް ދިނުމަކީ ހިދުމަތް ދޭ ޑްރައިވަރުން ޖަވާބުދާރީ ކުރުވުމަށް ލިބޭ ބާރެއް ކަމަށެވެ.

މީގެ އިތުރުން، ޓެކްސީ ސެންޓަރެއް ރަޖިސްޓްރީ ކުރުމަށްޓަކަައި ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް މަދުކޮށްފައިވާއިރު، ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓަރީވެގެން މަސައްކަތް ކުރުމުގެ ފުރުސަތު ވަނީ އާ އިސްލާހާއެކު ފަހިވެގެން ގޮސްފައެވެ.