މީހުންގެ އަބުރަށް އަރައިގަނެ ފަޟީޙަތްކުރަން ތެދުވެއްޖެނަމަ މާތް الله އެމީހަކު ފަޟީހަތްކުރައްވާނެ: ޑރ. ޞަލާޙުލް ބުދައިރު

މީހަކު އެހެން މީހުންގެ އަބުރަށް އަރައިގަނެ ފަޟީޙަތްކުރުމާއިގެން ތެދުވެއްޖެނަމަ މާތް الله އެމީހަކު ފަޟީހަތް ކުރައްވާނެ ކަމަށާ އެެހެން ކަމުން އެފަދަ ކަންކަމާއި ދުރުވުމަށް މިއަދުގެ ހުކުރު ހުތުބާގައި މަސްޖިދުއްނަބަވީގެ އިމާމު ފަޟީލަތުއްޝައިޚް ޑރ. ޞަލާޙުލް ބުދައިރު ގޮވާލައްވައިފި އެވެ.

ޝެއިހް މިކަމަށް ގޮވާލެއްވީ މިއަދު އިސްލާމީ މަރުކަޒުގައި އިއްވެވި ހުކުރު ހުތުބާގަ އެވެ. "ތިޔަބައިމީހުންނީ ލޯބިވާ އަޚުންތަކެއް ކަމުގައިވާށެވެ" މި މައުލޫއަށް ޝެއިހް އިއްވެވި ހުތުބާގައި ވިދާޅުވީ އެކަކު އަނެކަކަށް ރަޙުމުކޮށް އޯގާވެރިވެ އުޅުމަކީ މަތިވެރި ކަމެއް ކަމަށެވެ.

الله ތަޢާލާއީ އޯގާވެރީންގެ މައްޗަށް އޯގާވެރި ރަސްކަލާނގެ ކަން ފާހަގަ ކުރައްވާ ހުތުބާގައި ވިދާޅުވީ އެ ކަލާނގެއީ އަޅުތަކުންގެ ސިއްރުތައް ވަންހަނާކޮށްދޭ މީހުންގެ ސިއްރުތައް ވަންހަނާކޮށްދެއްވާ ރަސްކަލާނގެ ކަމަށެވެ. އެ ކަލާނގެއީ މީސްތަކުންނަށް މަޢާފުކުރާ މީހުންނަށް ގިނަގިނައިން ޢަފޫކުރައްވާ، އެ މީހުންގެ ފާފަ ފުއްސަވާ ރަސްކަލާނގެ ކަމަށާ އެއީ އެ ކަލާނގެ އަޅުތަކުން ކުރެ ރަޙުމުހުރި އޯގާވެރީންގެ މައްޗަށް ނުހަނު އޯގާވެރި ރަސްކަލާނގެ ކަމަށް ވެސް ޝެއިހް ވިދާޅުވި އެެވެ.

އަދި الله އީ ހިތް ހަރު، ހަރުކަށި މީހުން ދެކެ ކޯފާވެވޮޑިގެންވާ ރަސްކަލާނގެ ކަމަށާ ކުލުނުވެރީންނަށް ކުލުނުވެރި، ކެތްތެރިކަމަށް ލޯބިކުރައްވާ، މީހުންނަށް ހެޔޮކޮށް ހިތާ މީހުންނަށް ހެޔޮ ގޮތް މެދުވެރިކުރައްވާ، ޢަދުލުވެރީން ދެކެ ލޯބިވެވޮޑިގެންވާ ޢަދުލުވެރި ރަސްކަލާނގެކަން ޝެއިހް ވަނީ ހުތުބާގައި ފާހަގަ ކުރައްވާފަ އެވެ.

"ޢުޛުރުވެރިޔާގެ ޢުޛުރު ޤަބޫލުކުރާ މީހުންގެ ޢުޛުރު ޤަބޫލުކުރައްވާ ރަސްކަލާނގެއެވެ. އެ ކަލާނގެ އަޅުތަކުންނަށް، މިފަދަ މާތް ސިފަތަކުގެ ސަބަބުން އެއާ އެއްފަދަ ހެޔޮ ޖަޒާ ދެއްވައެވެ. ޢަފޫކުރާ މީހުންނަށް ޢަފޫކުރެއްވުމުންނެވެ. އެ ކަލާނގެ އަޅުތަކުންނަށް ހެޔޮކޮށް ހިތާ މީހުންނަށް ހެޔޮކޮށް ހިއްތެވުމުންނެވެ,"

އަދި ވިދާޅުވީ މީހަކު އެހެން މީހުންގެ އަބުރަށް އަރައިގަނެ ފަޟީޙަތްކުރުމާއިގެން ތެދުވެއްޖެނަމަ މާތް الله އެމީހަކު ފަޟީހަތް ކުރައްވާނެ ކަމަށެވެ. އެހެން މީހަކަށް ހެޔޮކަމެއް ލިބޭން ނޭދޭ މީހާ ހެޔޮކަމުން މަހްރޫމު ކުރައްވާނެ ކަމަށާ މީހަކަށް ދަތިކޮށްފި މީހާއަށް ދަތިކުރައްވާނެ ކަމަށެވެ.

އެހެން މީހަކަށް މަކަރު ހަދައި ކެހިދީފި މީހަކަށް އެކަމާ އެއްފަދަ ސަޒާ ދެއްވާހުއްޓެވެ. އަޅާ މީހަކާ މުޢާމަލާކުރާ ގޮތަކަށް، ދުނިޔެއާއި އާޚިރަތުގައި ވެސް މާތް الله އޭނާއާ މުޢާމަލާ ކުރައްވާނެ ކަމަށް ވެސް ހުތުބާގައި ޝެއިހް ވިދާޅުވި އެެވެ.