ރާއްޖޭގައި މިހާރު ގިނައިން ހޯދަނީ ދެދަރިން، އެކަން ބަދަލުކުރަންޖެހޭ: މެމްބަރު ހަމީދު
ރާއްޖޭގައި މިހާރު އެކެއް ނުވަތަ ދޭކަށްވުރެ ގިނަ ދަރިން ނުހޯދުމަކީ ފެޝަނަކަށްވެފައިވާ ކަމަށާއި އެކަން ބަދަލުކުރުމަށް ސަރުކާރުން އިސްނަގައިގެން މަސައްކަތްކުރަން ޖެހޭ ކަމަށް ކުޑަހުވަދޫ ދާއިރާގެ މެންބަރު ހުސައިން ހަމީދު ވިދާޅުވެއްޖެއެވެ.
ރީއެމްޕްލޯއިމެންޓް ބިލުގެ ބަހުސްގައި ވާހަކަފުޅު ދައްކަވަމުން މެންބަރު ހަމީދު ވިދާޅުވީ ރާއްޖޭގެ އާބާދީ އިތުރުކުރުމަށް ކުރެވެން ހުރި ހުރިހާ މަސައްކަތެއް ކޮށްދިނުމަށް ކަމާއި ބެހޭ ފަރާތްތަކަށް އެދޭ ކަމަށާއި، އާބާދީ އިތުރުކުރުމަށް ސަރުކާރުން ހާއްސަ އިނާޔަތެއް ދީގެން ވެސް އެކަންކުރުމަށް އެދޭ ކަމަށެވެ.
އަޅުގަނޑު ހަމަ ދިވެހި ސަރުކާރަށާއި ދިވެހިރާއްޖޭގެ ކަމާ ބެހޭ ހުރިހާ މުއައްސަސާތަކަށް ގޮވާލަން ދިވެހިރާއްޖޭގެ އާބާދީ އިތުރުކުރުމަށް ކުރެވެން ހުރި ހުރިހާ މަސައްކަތެއް ކޮށްދިނުމަށް އަދި އެހީތަކާއި އިންސެންޓިވްތަކެއް ދީގެން ނަމަވެސް މިކަން ކުރުމަށް އަވަސް ފިޔަވަޅުތަކެއް އެޅުމަށް
ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެންބަރު ހުސައިން ހަމީދު
މެންބަރު ހަމީދު ވިދާޅުވީ، އެ މައްސަލައަށް އަވަސް ފިޔަވަޅުތަކެއް އެޅުން މުހިންމުކަމަށާއި، އެކަން އެހެން ނުވެއްޖެނަމަ ކުރިއަށް އޮތް 40 ނުވަތަ 50 އަހަރުގެ ތެރޭގައި ރާއްޖޭގެ އާބާދީ އިތުރުވުން މައިނަސް އަދަދަކަށް ދާނެ ކަމަށް ސާވޭތަކުން ދައްކާ ކަމަށް މެންބަރު ވިދާޅުވިއެވެ.
އަދި 65 އަހަރުވެ ރީޓަޔާ ކުރަން ޖެހޭ ގޮތަށް ސިވިލް ސާވިސް ގާނޫނުގައި މިހާރު އޮތް ބައި ބަދަލުކޮށް، ރިޓަޔާ ކުރުން މީހުންގެ އިހްތިޔާރަށް ދޫކޮށްލަން ޖެހޭ ކަމަށް ވެސް މެންބަރު ވަނީ ވިދާޅުވެފައެވެ.
މެންބަރު އެފަދައިން ވިދާޅުވިއިރު، ޤައުމީ ތަފާސް ހިސާބުތަކާއި ބެހޭ އިދާރާގެ ހިސާބުތަކުން ދައްކާ ގޮތުން، ރާއްޖޭގެ އާބާދީގެ ޖުމްލަ ފާޓިލިޓީ ރޭޓް ވަނީ 1990 ވަނަ އަހަރުން ފެށިގެން ވަރަށް ބޮޑަށް ދަށަށް ގޮސްފައެވެ. އެގޮތުން 1990 ވަނަ އަހަރު އޭރު ކޮންމެ އަންހެނަކު އެވްރެޖް ގޮތެއްގައި 6 ކުއްޖަކު ހޯދާއިރު، 2022 ވަނަ އަހަރު އެ އަދަދު ވަނީ އެއް ކުއްޖަކަށް ދަށްވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
